في يوم محبين الكتب.. 8 طرق عشان تشجع وتحبب ابنك في القراءة

الجيل الجديد اللي طالع اتولد في عصر سريع مابقاش ليه خلق على أي حاجة رتمها بطئ ولا هادية.. عايز يشوف ريل أو تيك توك مدته ماتزيدش عن كام ثانية.. ومش كلها حاجات بتديله معلومة أو بتثقفه عكس القراءة مثلًا.. وعشان كده هنقولك على 8 طرق عشان تشجع ابنك على حب القراءة ويتعلق بالكتب

1- اقرأ له كتاب قبل النوم 

الأطفال بتتعلق جدًا بالروتين فلما تثبت له وقت محدد في يومه عشان يقرأ هيكبر متعلق بالعادة اللي علمتهاله من صغره.. ومش لازم وقت القراءة يكون قبل النوم المهم يكون ميعاد ثابت ومحدد

2- اقرأ قدامه

الأطفال بتحب تقلد الناس اللي بتحبها خاصة مامته وباباه.. فلما يلاقيك بتقرأ قدامه طول الوقت هيحب يعمل زيك 

3- فهمه إن كل القراءة مهمة

اشرح لابنك إن أي حاجة بيقرأها مهمة.. يعني مش لازم تخليه يقرأ عن المدينة الفاضلة لأفلاطون.. خليه بداية القراءة ليه تبدأ من اهتماماته فمثلًا خليه يقرأ قصص خيالية أو مجلات الأطفال.. المهم إنه يقرأ ويفهم إن كل أنواع القراءة مهمة ومفيدة حتى لو كان هيقرأ كتاب عن الطبخ لأنه ممكن يكتشف إن دي موهبة أو حاجة بيحبها

4- اقرأ اللي بيقرأه

ابنك لما يشوفك مهتم باللي بيقرأه وياخد انتباهك هيحس إنه بيعمل حاجة كويسة فهيكررها كتير.. عشان كده لما تشوفه ماسك حاجة بيقرأها اسأله عنها وقوله طب استفدت إيه من الكتاب أو القصة دي وإيه أكتر موضوع حبيته لما قرأت عنه وتحب تقرأ عن إيه تاني.. وده كمان هيساعدكم تقربوا من بعض

5- خلي الكتاب قريب منه دايمًا

خليه يوصل للكتب بشكل أسهل.. فحط الكتب جنب معظم الحاجات اللي بيستخدمها كتير زي المكتب مثلًا اللي بيذاكر عليه 

6- خلي الكتاب صديقه فعلًا!

بمعنى إنه يكون معاه وحواليه يلاقيه وقت ما يحتاجه.. فمثلًا لما تخرجوا خلي فيه كتاب في الشنطة عشان لو زهق.. ولو مستنيين ميعاد دكتور أو في مواصلات أديله كتاب يقرأه بدل ما يقعد على الموبايل

7- خليه يعيش القراءة

يعني اربط كل حاجة يقرأها بحياته وأحداث يومه.. فمثلًا لو بتقرأوا عن الرياضة وفوايدها.. اسأله أول مرة لعب رياضة كانت إمتى أو إيه أكتر رياضة عاوز يلعبها

8- ابني معاه حوار وقت القراءة

تفاعل معاه واسأله أسئلة ليها علاقة بموضوع الكتاب اللي قرأتهوله عشان تخلي ذهنه حاضر وتعلمه التفكير الناقد اللي هيساعده بعدين يعرف المعلومة اللي بيستقبلها صح ولا غلط بدل ما ياخدها عمياني وخلاص

وفي الآخر خليه يستبدل الوقت اللي بيقضيه على الموبايل بإنه يقعد يقرأ فيه كتاب.. واعرف إن كل حاجة بتيجي بالوقت والتعود.. فماتستجعلش تلاقيه ماشي بالكتب في الصالة بعد أول مرة أو مرتين يقرأ فيهم