في يوم محبي الموز.. شوية معلومات ممكن تهمك عنه

كل ما تمسك موزة وتاكلها المفروض تصعب عليك.. لأن الموز بتاع دلوقتي واللي بناكله ده “عقيم”.. وفي يوم محبي الموز.. قولنا نقولك شوية معلومات عنه مش مهمة خالص.

1- الموز مابيخلفش

الموز الحالي نتيجة تهجين قديم خلى تركيبته الوراثية اتلخبطت (بقى عنده 3 نسخ من الكروموسومات بدل 2 زي الطبيعي)…  والنتيجة إنه ما يقدرش يعمل بذور زي الموز البري… عشان كده المزارعين ما بيزرعوش بذور.. لكن بياخدوا أجزاء من جذور أو فسائل النبات ويزرعوها… وده بيخلي كل الموز مستنسخ من بعضه

2- بيقلل من التقلصات العضلية

لو رجلك وإيدك بيشدوا كتير.. فياريت تشتري موز وانت مروح.. لأنه غني بالبوتاسيوم واللي بيساعد في تقليل التقلصات العضلية

3- مش عارف تنام؟

لو النوم بالنسبة ليك حاجة صعب ومالكش في جو المنومات.. فالموز بيساعد في النوم وده لأنه بيحتوي على تربتوفان واللي بيتحول في النهاية لميلاتونين وده الهرمون المسئول عن النوم في جسم الإنسان

4- الموز في الجيم

لو انت بتمارس رياضة.. فالموز مصدر كويس جدًا للطاقة وده لأنه غني بالكربوهيدرات البسيطة زي الجلوكوز والفركتوز والسكروز وده بيخليه مصدر سريع للطاقة 

5- الموز مش شجرة

عكس ما قال محمد منير “شجر الموز طرح.. ضلل على عيدانه”.. فالموز مش شجر.. هو ممكن يبان كأنه شجرة.. لكنه في الحقيقة عشب عملاق

6- من أقدم المحاصيل

العلماء بيقولوا إن الموز من أقدم المحاصيل اللي البشر زرعوها.. ولقوا آثار لزراعته في مناطق في غينينا الجديدة وقالوا إن عمرها بيوصل لأكثر من 6 آلاف سنة.

7- الموز ألوان

.الموز مش بس أصفر.. لكنه ليه ألوان مختلفة زي الموز الأحمر والبنفسجي

ومع كل ده.. فالموز حلاوته في إنه يمشي معاك في أي وقت.. تحطه على شوفان.. على زبادي.. تاخده معاك قبل الجيم أو في الشغل.. قولنا بقى انت ليك في الموز ولا لأ؟