قبل نهاية الدراسة المراحل كان ليها بداية ونهاية دلوقتي المفروض نعمل إيه في حياتنا عشان التوهان؟

كتب: عمر عزت 

لحد من 3-4 سنين كده كانت حياتي فيها مراحل ليها بداية ونهاية فده كان بيخلي الواحد عارف امتى هيبدأ وامتى هيريح وساعتها بيكون متطمن شوية وكمان عارف هيعمل إيه بالظبط ويوزع مجهوده على الفترات دي إزاي ولكن.. 

وانت صغير في الغالب حاجات كتير محدش هيقولك عليها ولازم هتجربها وتقابلها بنفسك.. حاجة منهم كانت الموضوع ده وهو إن أنا زمان على مدار المراحل الدراسة سواء ابتدائي أو إعدادي مرورًا بالثانوي لحد ما خلصت كلية وبعدها كان الجيش.. الواحد كان بيبدأ مثلا سنة أولى وهو عارف إن كمان 6 سنين في تطور أو اختلاف أو نقلة هتحصل وكمان هتبدأ رحلة جديدة فهنا انت متطمن شوية لأنك عارف إن فيه نهاية

لما خلصت كلية قعدت كام شهر قبل ما أدخل الجيش فكانت مرحلة توهان ولكن مش زي المرحلة اللي هتكلم عليها دلوقتي وهي إنك لما تخلص دراسة خالص وجيشك ومفيش عندك حاجة خلاص غير إنك هتشتغل بقى

جت مرحلة الشغل من كام سنة كده ولقيت إنه طب ماذا بعد؟ إحنا هنخلص امتى ولا هنروح فين؟ بس في نفس الوقت أكيد التفكير هيوديك لحتة معينة يا هتدور فيها على حل يا هتسأل عشان اللي بيسأل مايتوهش

أنا من مدرسة “الكنز في الرحلة” فبدأت أركز شوية في حياتي وحياة اللي حواليا وألاقي إن فيه مراحل موجودة بس مش باين إن ليها نهاية إلا لو ركزت معاها شويتين أو انت اختارت إنها تكون كده كمراحل في حياتك 

لما دورت برضه لقيت حاجات بتدعم ده وهي إن فيه نظرية اسمها “سوبر – Super” عبارة عن 5 مراحل أو تقسيمات بس عشان مبحبش حد يحطلي حدود وفورمات معينة هعرضها على طريقتي:

• أول فترة في حياتك كده لحد متخلص ثانوي بتبقى مرحلة التعليم ومرحلة إنك تعرف نفسك أكتر ودي بتبقى رينج 17-19 سنة كده وبتعرف برضه أصلا الشغلانات اللي موجودة من المحيط بتاعك وهكذا أو بتنزل تجرب بنفسك لو ظروفك حطتك في ده
• تاني فترة بقى التجربة الفعلية سواء من خلال كليتك لو هي عملية أو من خلال تدريب وسوق عمل وساعتها بتكون أكبر شوية فبتعرف أكتر عن أول مرحلة وتقدر تقول إنك رسمت طريق لقدام شوية حلوين “ممكن يتغير عادي في أي وقت مش كتالوج هو” ودي مبتطوش كتير لأنك لو عندك جيش بتكون وصلت 23 مثلا أو حاجة ولو معندكش جيش هتبقى في نفس الرينج وهتبدأ بقى تدخل في قصة الشغل فعلا
• المرحلة التالتة بتبدأ فيها تبني مهارات أساسية بتكمل معاك سنين طويلة أوي مع شوية استقرار وملل لأن هنا دي المرحلة اللي بتبدأ تكتشف فيها إن إيه ده أنا مش بخلص أنا تقريبا مكمل للأبد ودي هقولك حلها كمان شوية والمرحلة دي أطولهم إلا لو ربنا بارك في عمرك وكملت بعد المعاش كتير يعني
• رابع فترة بتكون مجرد تعديلات على الأساس اللي بنيته عشان تحاول توصل لأفضل نسخة من كل حاجة بتعملها وبتحاول تحسن وضعك وفي المرحلة دي بتكون غالبا متجوز يعني
• المرحلة الأخيرة ودي من بعد الستين كده بتبدأ تأهل نفسك لسن التقاعد وهنا غالبًا بتبقى تحدي صعب لأنك بالفعل وصلت لنهاية وبدأت حاجة مجهولة شويتين وهي قدرك.. هتعيش لحد امتى!

طب والحل إيه أو الطريقة الكويسة للتعامل مع الحوار؟

1- في البداية أصلا لازم تدرك إن ده حاجة موجودة عشان تعرف إنها بتعمل مشكلة حسب دراسات كتير مع دخلة التلاتينات أو بين الأربعينات والستينات لأنك هتلاقي نفسك حاسس بعدم رضا عند اللي بيحصل ومحتاج تغير الوضع

2- تاني حاجة حاسس إنها بتفرق هي إنك تحط بقى لنفسك نهايات وهمية.. ولو بتكون مع نهاية أي سنة أو مع ذكرى وجودك في حاجة زي مثلا شغلك ساعتها هتحس إن فيه مراحل وإنك مش ماشي في حاجة للأبد

مثال: انت دلوقتي اشتغلت في مكان من نص السنة وبقالك فيه كذا شهر.. بعد سنة غالبًا بتكون مريت بتطور معين ولكن مستحيل تكون وصلت وقفّلت الشغلانة وهنا بعد سنة شوفها مرحلة عديت بيها وهي إنك بتقرا الدنيا وتفهم وتبدأ تطبق فتشوف تطور.. بعدها بسنة أو يا إما بتكون عديت مرحلة فعلية وهي إنك هتترقى لدرجة أعلى فهتكون في مرحلة مختلفة فعليا وهنا لازم تحس بده وتعرفه أو إنك هتلاقي نفسك بتروح مكان تاني ودي نهاية مرحلة وبداية مرحلة وهنا برضه لازم تحس بالشعور وتقف عنده عشان تطمن شوية إنها مرحلة

3- في حياتك العاطفية تقدر تطبق نظرية معينة وهي إنك مثلا مع شخص وبعد فترة ما لازم تروح لمرحلة تانية وهي إنك هتاخد معاه خطوة رسمية ويكون فيه خطوبة وهكذا لحد ما تتجوزوا وساعتها برضه هيكون قدامك مراحل ليها بداية وليها نهاية هي مش مرسومة أوي بالظبط حسب مزاجك لكنها مراحل 

4- جزء تاني مهم وهو إنك تعمل مشاريع جانبية سواء حاجات Freelance أو بروجيكت فعلي كبير جنب شغلك.. ده بيديك مرحلة تانية في حياتك برضه بتبدأها وفيها مراحل من البداية لحد ما البروجيكت ده يستقر ويكمل لنقطة معينة

5- المرونة عامة مطلوبة في كل حاجة في الدنيا بس في الموضوع ده بالذات بتكون مطلوبة زيادة شويتين لأنك جزء كبير من الاتجاهات اللي عايش فيها سواء شغل أو حياة اجتماعية وعاطفية بيكون محتاج تقف مع نفسك كل فترة وليكن 5 سنين وتبدأ تحسب أنا كنت فين وبقيت فين وبعدين حققت إيه وهل ده المطلوب ولا ناقص حاجة

6- ممكن تستغل حاجتين رئيسين زي مثلا نهاية السنة الميلادية أو الهجرية.. والحاجة التانية هي عيد ميلادك وده بإنك تحط أهداف على قد السنة دي وتبدأ تقيم وقتها وتقول إنك عديت من مرحلة لمرحلة

في النهاية الموضوع محتاج منك بس إنك تكتشفه وتعترف بيه إنه فعلا موجود لأن ممكن فجأة تلاقي نفسك جواه وبقى أزمة.. بعدها كل شيخ له طريقة زي ما بيقولوا وانت وقتها هتبقى فاهم نفسك أكتر من أي حد تاني وتشوف إيه لايق على حياتك وإيه هظبط وتتعامل بيه