قصة “أتشيربي” لاعب إنتر ميلان اللي هزم السرطان وهزم برشلونة في نص نهائي دوري الأبطال
امبارح الثلاثاء 7-5-2025 إنتر ميلان صعد لنهائي دوري أبطال أوروبا بعد ما كسب برشلونة بشكل مثير.. “فرانشيسكو أتشيربي” جاب التعادل للإنتر في الوقت الضايع الدقيقة 93′ عشان يلعبوا إكسترا تايم وبعدها يكسبوا ويصعدوا للنهائي.. ولكن إيه هي قصة المدافع “أتشيربي”اللي هزم السرطان قبل برشلونة؟
مين هو أتشيربي؟
فرانشيسكو أتشيربي عنده 37 سنة بدأ مسيرته تقريبًا في الدوري الإيطالي مع كييفو فيرونا في 2011 وكمل مسيرته في الكورة لحد دلوقتي مكمل مع إنتر ميلان بعد ما انتقل لهناك من فريق لاتسيو ولكن فيه بين 2011 و 2025 قصة ملحمية عاشها اللاعب أتشيربي مع السرطان قبل ما يوصل النهائي مع إنتر امبارح
محاربة السرطان:
في يوليو 2013 أتشيربي بيعمل الكشف الروتيني مع ساسولو اكتشف الأطباء أنه مصاب بسرطان الخصية.. عشان بعدها يبدأ رحلة العلاج بجراحة إزالة الورم ورجع بشكل طبيعي
وبدأ يشارك في شوية ماتشات لكن بعد وقت قليل وفي ديسمبر 2013 بيفشل في اختبار المنشطات وبيعمل تحاليل تاني بيكتشف أنه اتصاب تاني بالسرطان وبيضطر يخضع لعلاج كيميائي مدته 3 شهور
الانتصار:
“التحدي ضروري دائمًا في الحياة.. كنت بحاجة إليه أولًا مع والدي ثم مع المرض”
وده عشان تحدي قابله مع والده في بداية مسيرته لما توفى وهم كانوا قريبين لبعض بشكل كبير.. لكن خلينا في التحدي الأهم واللي هو موضوعنا “انتصاره على السرطان”.. بيتكلم أتشيربي لصحيفة La Gazzetta وبيتناول الموضوع أنه كان تحدي بالنسبة له وهو السبب لوصوله للنجاح اللي هو فيه دلوقتي
بدأ أتشيربي القتال بينه وبين المرض وفي كل مرة كان بيحاول يتغلب على المرض بيشوف فيها أبوه ويقول “أنا هواجه ده كأني في ماتش كورة ولازم أكسب.. ومش هسيب المرض يفرح بسقوطي”
وبيقول كمان “لولا السرطان كنت اعتزلت كرة القدم في سن الـ 28” أو كان الموضوع هينتهي بيا بلعب في الدرجة التانية للدوري الإيطالي.. لكن بسبب السرطان شوفت فرصة حقيقية للتحدي
في مارس 2014 وفي سن الـ 26 اللي كل متابعين الكرة عارفين إن مسيرة اللاعب ماينفعش تبدأ من هنا.. ولكن “أتشيربي” بيثبت العكس وبيعلن انتصاره وأنه خف من مرض السرطان تمامًا ومش هياخد جرعات كيماوي تاني وبيبدأ رحلة الانتصار على أسطورة “السن” وأنه لازم يكون صغير عشان يحقق إنجازات
تكملة سلسلة الانتصارات:
بعد ما انتصر أتشيربي على السرطان بيروح للتحدي الجديد وهو عودته للملاعب واللي وقتها أثبتت التقارير أنه كان بيتمرن عشان ما يخسرش كتلته العضلية ويحافظ على لياقته.. وفي 2018 إنزاجي مدرب لاتسيو بيطلب التعاقد معاه ونافس بعدها اليوفنتوس على الدوري مع الفريق وكمان كسب كأس إيطاليا
والانتصار التاني له هو أن تم استدعائه لمنتخب إيطاليا وحقق مع مدربه مانشيني بطولة يورو 2020
وفي 2021 بيخلف بنت وبيسميها “Vittoria” واللي معناه “انتصار” وبعدها بسنة في 2022 بيروح إنتر ميلان إعارة وبعدها في 2023 بيروح الإنتر ويكمل معاه لدلوقتي.. وبيحقق في موسم 2023 الثلاثية المحلية وهي “الدوري والكأس والسوبر”
وبيختم كل ده بالهدف اللي جابه امبارح قدام برشلونة في نص نهائي دوري الأبطال وباحتفاله الأيقوني.. وكأنه بيقول رسالة مهمة وهي أنك لازم تحارب أي تحدي يقف قدامك ويكون هدفك حاجة واحدة بس “الانتصار”.
