قصة البومة الدهبية اللي بـ 150 ألف يورو.. وبيدوروا عليها بقالهم 31 سنة
مش كل الناس بتحب الألغاز ولا حلها ناس كتير بتتخنق منها ومابتقدرش تكمل أو بتفقد الشغف ولو شافوا لغز أو فزورة على فيسبوك بعد 30 ثانية بيتخنقوا ويجروا يبصوا على الكومنتات أو يعملوا سيرش.. بس بالنسبة للناس اللي بتحب الفوازير والغموض بقى فيه لغز لكنز اتحل بعد 31 سنة في فرنسا.
بعد 31 سنة و5 شهور و9 أيام أخيرًا رحلة البحث عن الكنز أو البومة الدهبية في فرنسا انتهي واللغز بتاعها قدر يحله شخص زي ما تم الإعلان عنه.. طاب إيه الكنز ده وإيه حكاية البومة الدهبية دي؟
سنة 1993 المؤلف “ريجيس هاوزر” نشر كتاب اسمه “على درب البومة الذهبية” أو “Sur la trace de la chouette d’or” ونشر الكتاب باسم مستعار وهو ماكس فالتين.. وخبى البومة الدهبية دي بجد كنوع من الدعايا للكتاب بتاعه وقال إن اللي هيلاقيها هياخدها
خصوصا إن البومة دي عبارة عن منحوتة وزنها حوالي عشرة الكيلوهات ومصنوعة من المعادن الثمينة اللي معظمها من الفضة وفيها كمان دهب ومرصعة بالماس.. وقيمتها اتقدرت في البداية بحوالي 150 ألف يورو
وكان فيه في الكتاب ده 11 لغز لو الشخص قدر يحلهم هيقدر يوصل للبومة الدهبية اللي خباها المؤلف واتوقع وقتها “ريجيس هاوزر” إن اللغز ده هيتحل بسرعة عادي.. لكن توفى سنة 2009 قبل ما أي حد يحل اللغز ده
ولكن مصمم تمثال البومة لحسن الحظ لسه عايش وهو اسمه “ميشيل بيكر” وهو مصمم بس لكن اللي صنع التمثال صايغ عادي.. ميشيل عرض اللغز في برامج تلفزيونية حضر فيها ضيف وهو أصلا نفسه ماكنش يعرف الحل.
واتفق وقتها ريجيس هاوزر” و”ميشيل بيكر” إنهم هيدفنوا نسخة طبق الأصل من البومة، وهيحتفظوا بالنسخة الأصلية الثمينة في مكان آمن.
وكتب ميشيل عن طريق صفحة خاصة باللغز ده على منصة “ديسكور” وقال “بنأكد إنه تم حل لغز البومة الدهبية امبارح”.. وقال لكل اللاعبين اللي فاكرين إنهم حلوا اللغز “ماتروحوش تحفروا إحنا هنتحقق الأول من صحة الحل المقترح”
ومؤلف الكتاب أو اللعبة عمل لنفسه اسم مستعار عشان محدش يضايقه ولما ظهر في العلن كام مرة كان بيحط قناع على وشه.
الجدير بالذكر إن الكتاب حقق شعبية كبيرة أوي بين الجماهير ووصل عدد اللاعبين لأكتر من
200 ألف لاعب ومعروفين باسم “البومة” سواء من فرنسا أو من خارجها.. ولكن تقريبا إعادة إطلاق اللعبة تاني على منصة “ديسكور” مع شوية أدلة إضافية حليتها.
وفي الأخر حابين نقولك إن زي ما لغز البومة اتحل بعد 31 سنة مش بعيد مشاكلك كمان تتحل بس أهم حاجة الصببرررر
