قصة نجاح تكوين وإنماء أسنان بشرية في المختبر لأول مرة

فريق علمي من كلية “king’s college london” نجح في إنماء أسنان بشرية في المختبر وده إنجاز بيحصل لأول مرة.. طب عملوا كده إزاي وفايدة الإنجاز إيه؟.. ده اللي هنحكيلك عنه 

إيه الإنجاز؟

الدراسة دي حصلت بالتعاون بين “king’s college london” و”Imperial College London” وأخدت منهم أكتر من 10 سنين عشان يعملوها.. والدراسة وضحت إن أسماك القرش والفيلة أسنانها بتتجدد طول حياتها عكس الإنسان اللي أسنانه بتجدد لحد فترة البلوغ بس.. فبالإنجاز ده الإنسان يقدر يجدد أسنانه حتى بعد سن البلوغ.. ففريق الباحثين طوروا مادة بتحاكي البيئة اللي أسنان الإنسان بتنمو فيها.. وده هيساعد الخلايا البشرية إنها تبعت إشارات والسن يبدأ يتكون.. 

طب إيه الفرق بين الأسنان المخترعة حديثًا وزراعة الأسنان القديمة؟

الأسنان اللي نمت في المختبر دي بتتجدد بشكل طبيعي وبتندمج في الفك كأنها أسنان حقيقية فبتصلح نفسها زي ما الأسنان الطبيعية بتعمل بالظبط… فهتكون أقوى وهتدوم وقت أطول وده هيغير مستقبل علاج فقدان الأسنان بشكل كبير علشان هتكون حل بديل عن الحشوات وزراعة الأسنان.

“شيويه تشن تشانغ” الباحث في كلية طب الأسنان وعلوم الفم والوجه والفكين في كلية “king’s college london”.. قال إن الحشوات مش هي الحل الأمثل لإصلاح الأسنان  وإنها مع مرور الوقت بتضعف بنية الأسنان.. وعمرها الافتراضي بيبقى محدود وده ممكن يجيب تسوس أو حساسية في الأسنان.

إيه الأفكار المستقبلية للإنجاز؟

وأضاف “تشانغ” إن الباحثين دلوقتي بيدرسوا طريقتين لتطبيق التقنية الجديدة دي.. الأولى هي إنهم يعملوا إنماء لسن كامل في المختبر قبل زراعته في فك المريض.. أما الطريقة التانية هي إنهم يحطوا خلايا سنية في مراحلها المبكرة في فك المريض علطول وتكمل نموها جوا فكه.. وقال إن في الحالتين هما يبدأوا عملية التكوين بدري تحت ظروف خاضعة للرقابة.