قواعد النوم الخمسة.. اعرف إزاي تظبط نومك!
كلنا الفترة اللي فاتت لغبطنا يومنا وطبقّنا باليومين عشان مواعيد رمضان، طيب دلوقتي رمضان خلص كل سنة وأنت طيب ودخلنا في سهر العيد اللي مابيخلصش للصبح.. بس للأسف حياة ما بعد العيد مستنياك بمواعيدها الطبيعية، يعني السهر للصبح ده مش هينفع، طيب نعمل إيه علشان نظبط نومنا تاني؟
تعالى أقولك على “قواعد النوم”، وهو النوم فيه قواعد؟ أحب أعرّفك إن النوم زيه زي أي نشاط بتمارسه في حياتك، له قواعد وله عادات صح وعادات غلط، فا لو أنت “بتنام كده وخلاص” يبقى الموضوع ده عشانك!
دول خمس قواعد للنوم هيساعدوك تنام صح:
١-بيئة النوم:
لازم البيئة اللي حواليك تبقى مُهيئة للنوم، يعني تتأكد إن مكان نومك هادي وإن جيرانكم اللي فوق مش هينقلوا العفش، وإن
البيئة مظلمة، وكمان مهم إن المخدة اللي بتستخدمها تبقى مريحة بالنسبالك.
٢- قانون الساعة ونصف:
سمعت عن قانون الساعة ونصف قبل كده؟ القانون ده بيقول إن ال sleeping cycle بتاعتك بتتكون من وحدات صغيرة من النوم العميق، كل وحدة فيهم ساعة ونص، إحسب عدد ساعات نومك إنها تتكون من الوحدات الصغيرة دي وبحد أقصى تنام من ٧-٩ ساعات متواصل في اليوم!
٣ -ال Naps:
بلاش تمشي بمبدأ “أنا هريحلي حبتين”عشان القيلولة في نص اليوم بتبوظ نظام نومك الأساسي لأن النوم معاده بليل، بس لو ضروري يبقى متزدش عن ٢٠- ٣٠ دقيقة.
٤- تمارين النفس والتأمل
القلق وال overthinking أعداء النومة الحلوة!علشان كده لازم تحاول تفصل دماغك في مواعيد النوم وده بإنك تهدي نفسك بتمارين التنفس العميق والتأمل.
٥- مواعيد النوم الثابتة
وأخيراً وصلنا لأهم نقطة، لازم تثبت مواعيد نومك وصحيانك كل يوم على قد ما تقدر علشان تعرف تنفذ الخطوات اللي فاتت، وبكده هتبقى أستاذ في النوم وبشهادة!
