كل الناس وحشة ولا كل الناس حلوة لحد ما يثبتوا العكس؟

تفتكر أول مرة روحت فيها مدرسة جديدة أو الجامعة أو اتعرفت على شلة صحاب جديدة أو شغل جديد حتى؟ تفتكر كنت خايف منهم ولا قررت تندمج عادي وتتعرف على الكل؟ غالبا هتبقى اتطورت في طريقة معاملتك مع الناس بس الطريقة اللي صعب تتغير فيك هي فكرة بتسيطر على دماغك قبل دخولك أي مجتمع جديد وهي “إن كل الناس وحشة لحد ما تثبت العكس” أو “كل الناس حلوة لحد ما يثبتوا العكس” 

فيه ناس بتحب تبدأ علاقتها بالثقة في اللي قدامهم على طول، وفيه ناس بتبقى حذرة وبتشك في الناس لحد ما يثبت العكس.. لكن السؤال هنا بيبقى أي طريقة أحسن أو إيه أكتر طريقة بتريح الواحد أكتر.. فتعالى نعرف مميزات وعيوب كل أسلوب وطريقة حسب ما قال موقع “Psychology Today” في واحد من مقالاته: 

في الأول خلينا نبدأ بالطريقة بتاعت “كل الناس كويسة لحد ما يثبتوا العكس” اللي هي افتراض حسن النية في الناس والاندماج معاهم على طول:

ودي مميزاتها: 

1- علاقات إيجابية:

لما بتفترض في الناس حسن النية وتثق فيهم من الأول ده بيساعدك تبني علاقات كويسة وقوية والناس غالبًا بتحس إنك بتحترمهم وبتثق فيهم، وده بيشجعهم يكونوا صادقين معاك

2- راحة نفسية:

كونك بتبدأ حياتك من غير شكوك أو تخوفات بيخليك تحس براحة نفسية أكبر لإن الشك بيسبب توتر وضغط نفسي، فالثقة اللي في الأول دي ممكن تقلل من القلق ده

3- بتشجع الناس إنهم يتصرفوا أحسن:

الناس اللي بتحس إنك بتثق فيهم غالبًا بيحاولوا يكونوا قد الثقة دي وبيتعاملوا معاك بصدق

4- بيخليك شخص أنضج:

إنك تبدأ بعقلية متفتحة وبتحسن النية ده بيعلمك التسامح والتفهم وده بيساعدك كمان تكبر على المستوى الشخصي

أما بقى العيوب:

1- ممكن تتخدع: 

لو وثقت في حد مش قد الثقة دي ممكن تتعرض للخداع أو الاستغلال

2-الإحباط:

لو الشخص ده خذلك أو خان ثقتك الصدمة بتكون أقوى لأنك كنت من الأول فاكره كويس

طيب لو أنت من النوع التاني من الناس اللي بيحب الطريقة التانية وهي إنه يفترض إن كل الناس وحشة لحد ما يثبتوا العكس وبتحب تتقل كده على الناس وتشوف مايتهم الأول: 

مميزاتها:

1- بتحمي نفسك:

الشك في الأول بيحميك من إنك تتعرض لخيبة أمل أو استغلال ودايمًا بيبقى عندك حدود واضحة من البداية وده بيخليك في أمان

2- قراراتك بتبقى محسوبة:

لما بتكون حذر في تعاملك مع الناس ده بيساعدك تكون واعي وحذر أكتر في اختيارك للي يدخل حياتك واللي بتقوله وده بيخلّيك تبعد عن الناس اللي مش كويسين من البداية

أما بقى العيوب:

1- بيبقى صعب تكون علاقات: 

لو طول الوقت مش واثق في اللي قدامك ده بيعمل مسافة بينك وبين الناس والشخص اللي قدامك هيحس إنك مش مصدقه وده ممكن يخليه يبعد عنك

2- توتر وضغط نفسي:

الشك دايمًا بيكون باكيدج مع بعض كده هو و التوتر والقلق وده بيخلي كل علاقة أو تعامل فيه ضغط نفسي مش مطلوب

3- بتضيع فرص:

 ممكن تفوت عليك فرص إنك تتعرف على ناس كويسة بسبب شكك المبدئي اللي مش مبني على أي حاجة منطقية وبيكون افتراضات بس وده بيحرمك من علاقات حقيقية وصادقة

وزي ما هو واضح كده إن الطريقتين فيهم عيوب ومميزات وزي ما الفنان حسين الجسمي قال “محدش مرتاح” فعلا ومهما تغير في طريقتك هتفضل برضه تعبان طيب إيه الحل بقى عشان تعيش مستريح أكتر؟ الحل هو التوازن 

يعني خليك متفائل بس حذر ويبقى عندك حسن ظن وتثق في الناس بس واعي لأي علامات بتحذرك منهم ماتبقاش بتتجاهل العلامات والإشارات اللي بتحصل قدامك.. وبكده تقدر تبقى شخص فاتح قلبه مع الناس من غير ما حد يستغلك أو يضرك بأي شكل أيا كان.. ومهم تعرف في الأخر إن كل واحد اختار طريقة تعامله دي مع الناس وافتراضاته دي بناءًا على تجارب شخصية مر بيها فماينفعش نلوم حد على طريقته اللي اختارها.