كيف بدأت كذبة أبريل؟

كل سنة العالم بيحتفل بيوم كذبة أبريل.. والناس حوالين العالم بيتفننوا إزاي يعملوا خدعة في صحابهم وقرايبهم في شهر أبريل عشان يبقوا احتفلوا بالكذبة.. ده غير الإعلانات والميمز على السوشيال ميديا اللي بتتكلم عن الموضوع.. بس عمرك سألت نفسك إزاي بدأت فكرة كذبة أبريل؟.. عشان كده في الموضوع ده هنقولك السر وراها وفقا لموقع RT وموقع aawsat وموقع cnn

في روايات كتير بتتكلم عن بداية كذبة أبريل من ضمنها الأكثر تداول هي وجود قصيدة فلمنكية سنة 1561م في أحداثها بيبعت فيها واحد من النبلاء خادمته في مهمات سماها “مهمات حمقاء” في أول أبريل..

وفي رواية تانية بتقول إن في نفس الزمن في فرنسا في وقت تغيير التقويم من اليولياني للغريغوري.. كان الناس اللي أتأخروا في تعديل التقويم بتاعهم من آخر مارس لبداية أبريل كان بيطلق عليهم اسم “حمقى أبريل” واستمروا في الاحتفال اعتمادا على التقويم القديم وأطلقوا عليهم عبارة “poisson d’avril” ومعناها كذبة أبريل.

وفي رواية تالتة بتقول  إن الكنيسة الكاثوليكية كان ليها دور في اليوم من خلال “عيد الحمقى”اللي كان بيحصل في بداية يناير  وكان شبه الكرنفال.. وكان بيقام في فرنسا وإنجلترا وقتها في العصور الوسطى لكن تم حظره في القرن الـ 15.
ومع بداية القرن الـ 19.. بدأت أغلب الثقافات تحتفل بيوم “كذبة أبريل”
وبقى جزء مهم من الثقافة الأميركية وبيتم الاحتفال بيه دايما..


ومن أشهر المقالب اللي حصلت في العالم بمناسبة كذبة إبريل:

مقلب المكرونة سنة 1957:
هيئة الإذاعة البريطانية (بي بي سي)  قالت يومها أن المزارعين السويسريين بيحصدوا المكرونة السباجيتي من الأشجار وعرضت فيديو لمجموعة من الأشخاص بيحصدوها فعلا!

مقلب التليفزيون الملون 1962:
الشبكة الوطنية السويدية عينت وقتها خبير تقني قال للجمهور إنهم يقدروا يغيروا التليفزيون بتاعهم من أبيض وأسود لألوان بسهولة ..من خلال المشاهدة من
الشرابات النايلون.

مقلب ساعة بيج بين 1980:
قالت BBC إن ساعة بيج بين هيتم تحديثها وتتحول لساعة رقمية والنكتة كانت بعد ما ناس كتير صدقت المقلب واعتذرت BBC وقالت إنها مجرد مزحة.

مقلب أسرع لاعب بيسبول 1985:
الكاتب الساخر “جورج بليمبتون”اخترع قصة عن رامي كرة بيسبول في فريق “نيويورك ميتس” اسمه “سيدهارتا فينش” ونشرها في العدد الأول من مجلة  Sports  Illustrated يوم 1 أبريل..قال إن اللاعب ده يقدر يرمي الكورة بسرعة 168 ميل في الساعة وده طبعا حاجة مش حقيقة وكانت مجرد خدعة.

ولسه لحد النهاردة فيه مقالب وكذبات كتيرة بتحصل كل سنة في شهر أبريل حوالين العالم