كيف بدأ الآيس كريم!

الآيس كريم مش مجرد حاجة بناكلها وخلاص أو زي أي حلويات.. لا هو يعتبر رمز من رموز السعادة للأطفال وللكبار ومابيفشلش إنه يخلينا مبسوطين بمجرد ما بناكله واحنا حرانين أو حتى واحنا متضايقين وعايزين ناكل حاجة تبسطنا.. وعشان وقفته معانا في كل وقت هنقولك في الموضوع ده الاختراع العظيم ده جه منين وفقًا لموقع history و موقع TED

الحكايات اللي بتتحكي عن تاريخ الآيس كريم مالهاش أخر عشان كده مفيش شخص محدد اتقال اسمه إنه مخترع الآيس كريم.. عشان كده هنقولك كل الروايات اللي بتتكلم عن تاريخه.. يقال إن في بلاد كتيرة عرفته من زمان زي الفرس والرومان والصينيين وكان مخصص للنخبة من الملوك بس.. يعني مثلًا اتقال إن الصينيين كانوا بيخلطوا اللبن المجمد مع الرز وبينتج حلويات شبه الآيس كريم لكن ماتمش ذكر أول شخص عمل كده..


وفي رواية بتقول إن أصل المشروبات والحلويات المجمدة في سنة 4000 قبل الميلاد
وقت زمن النبلاء اللي كانوا عايشين في نهر الفرات وعندهم مخازن للتلج للتخفيف من حر الصيف وكانوا بيحفظوا فيها المواد الغذائية.

وكانت أول حلويات مجمدة وقتها هي “السوربيه” وكانت بتتصنع من مزج التلج والفاكهة مع بعض .

أما بقى بدايات الجيلاتو الإيطالي يقال إنها بترجع لأغنياء فلورنسا في نهاية القرن الـ 13 لما كانوا بيضيفوا التلج للبن.. وأشهر مرة استخدم فيها في فرح الأميرة “كاثرين دي ميدتشي” على ملك فرنسا وقتها.. وطلبت وقتها توزيعه على المعازيم في فرحها.

وبينسب “جيلاتو” لـ” برناردو بونتالنتي” اللي اتسمت ماركة الجيلاتو الأمريكية على “تلانتي” على اسمه.. لإنه سنة 1565م ابتكر حلويات “السابايوني” المكونة من الكاسترد واللبن والليمون والبرتقال والبيض.. ومن بعدها الفرنسيين بدأوا يعملوا آيس كريم بأطعمة مختلفة.

وفي الدولة العثمانية انتشر فيها الشربات أو الشربت العثماني وده كان اسم  بيطلق على المشروبات المحلاة واللي غالبا بتكون متلجة .. وكمان كان عندهم “الفالودية” اللي عبارة عن مكرونة محطوطة في عصير متلج برضو.

أما بقى في الهند هنلاقي “الكولفي” وهو عبارة عن أيس كريم من اللبن المكثف محطوط في قوالب وكان بيحبه أباطرة المغول ولحد دلوقتي بيتعمل في شوارع الهند.

ويقال إن المسافرين الأوروبيين جابوا معاهم وصفات الآيس كريم من الدول اللي عدوا عليها وبدأوا يعملوا منها الوصفة بالشيكولاتة والصنوبر.

وسنة 1696م الطباخ النابولي”أنطونيو لاتيني” عمل وصفة مميزة المؤرخين بيقولوا إنها تعتبر أول نسخة من الآيس كريم.

وفضل الأيس كريم للطبقات العالية بس لأن مكوناته كانت غالية ومش أي حد يقدر يشتريها من الطبقة العاملة.

واتطور الآيس كريم اكتر لما في فيلادلفيا سنة 1843م عملت  “نانسي جونسون” ثورة في صناعة الأيس كريم لما عملت آلة لصناعته وكانت سهلة الاستخدام لأي شخص..

ومع تطور صناعة الثلج بقى منتشر في كل البيوت الأمريكية وبقى سهل تصنيع الأيس كريم وكمان في أواخر القرن الـ 19 لما زاردت حركة المهاجرين الإيطاليين وكانوا بيبيعوا آيس كريم كباعة جائلين في لندن ونيويورك وده خلاه ينتشر أكتر في العالم.. ومع نهاية الحرب العالمية الثانية كان أغلب البيوت عارفة إيه هو الآيس كريم.

وفي الأخر مهما اختلفت روايات وقصص بداية الآيس كريم.. الحاجة الوحيدة اللي مش هنختلف عليها هي حبنا ليه.