كيف بدأ الـ delulu وهل فعلًا هو الـ solulu؟
الفترة الأخيرة انتشر على التيك توك مصطلح اسمه “Delulu is the solulu”
والمصطلح ده غرق الدنيا ومعناه بالظبط delusion is the solution يعني من الأخر الوهم هو الحل فعشان كده هنقولك في الموضوع ده كيف بدأ الـ delulu وفقًا لموقع forbes وموقع verywellmind
كلمة “delulu” ظهرت من قبل التيك توك في ثقافة الكيبوب سنة 2014م ومعناها المعجب اللي فاكر إنه هيدخل في علاقة مع نجمه المفضل وفقًا للجارديان
وكانت في الأول بترمز للعلاقات اللي مش حقيقية زي أنك تحب حد وهو مش مهتم بيك وأنت مصمم تصدق إنه بيحبك وبتخلق علامات على مزاجك تمشي وراها وأنت عارف إنها مش حقيقية!
ومع الوقت اتطور الـ delulu أكتر وفضل يكبر ماهو delulu بقى.. وبقى مربوط بكل حاجة تقريبًا بنفكر فيها ونفسنا تحصل رغم استحالتها وبقى بيتطبق على كل حاجة نفسك تحصل معاك عن طريق إنك تفضل تقنع نفسك بيها على أمل إنها تتحقق في يوم يعني من الأخر بقى معناه إنك تمسك حاجة مالهاش أي دليل وتحولها لحقيقة في دماغك بالعافية.
بس تفتكر ليه أصلا فيه ناس بتعتبر إن هو الحل ؟
الخبراء بيقولوا على قد ما كلمة الوهم بتبان كلمة مخيفة لكنها نوع من الهروب من الواقع بعض الناس بتستخدمه عشان تواجه بيه الصدمات اللي بتحصلها لأن الوهم بيخليهم راضيين حتى لو شوية صغيرين عن الواقع الصعب اللي بيمروا بيه وبيكون مرضي ليهم.. لأن ده الأسهل على دماغهم إنهم يستوعبوه.. لأن تقبل الخسارة شيء صعب على الإنسان.
بس كل حاجة ليها عيوب ومميزات:
لوهم زي ماهيخليك اهدا شوية ممكن يسيطر على دماغك ويدمر حياتك عشان كده ماتخليش الوهم يسيطر عليك.. بس ممكن تاخده سلمة إنك تحاول تسيطر على مشاعرك من جديد.. وتعتبره مجرد وسيلة تحارب بيها القلق والتوتر بس مش وسيلة للهروب من الواقع!
لأننا مش هنقدر نحل المشاكل بشكل صح إلا لو اتحكمنا في أفكارنا وعواطفنا.. وده لأننا لما بنخاف من الرفض بنحاول نهرب منه بأي طريقة والهروب بالوهم هو مجرد مسكن بيدينا شوية شعور بالسعادة وشوية دوبامين بس بيطلع على دماغنا في الأخر لأنه مش هيحل أي حاجة خالص بالعكس هيطول مدة الحزن والتراكمات اللي جوانا وهيعملنا ترومات جديدة على المدى الطويل..
والأحسن إنك تحاول تاخد خطوات بسيطة واحدة واحدة لحل المشاكل اللي مضايقاك
ودكتورة علم النفس “راشيل هوفمان” بتقول إنك تتظاهر بالحاجة جايز يخليها تتحقق بس مش بيحصل دايمًا فلو لقيت صحتك النفسية بدأت تتأثر بسبب التظاهر يبقى لازم تبطل Dululu حالًا.
عشان كده لو في حاجة مضايقاك وخايف تواجهها أحسن حاجة تعملها إنك تقعد مع نفسك قعدة صفا وتهديها بالراحة خالص وده لأن الاعتماد على عقلية ال “delulu” هتضرك لأنها هتخليك تعمل حاجات أو تغير في شخصيتك عشان الواقع اللي في دماغك ده يتحقق حتى لو هتقاوم حاجات ممكن تخليك أنجح..
وبتقول كمان دكتور “راشيل هوفمان” إن لازم نحافظ على التوازن في وجهات نظرنا لأن جايز يجيلنا فرصة كنا مستنينها بس لو معملناش حاجة عشان نكون مستعدين ليها وفضلنا في الوهم ده هيخلينا نخسرها!
ده غير إن تقبل الواقع مفيد أكتر.. وفي دراسة أتعملت سنة 2018 بتقول إن الأفراد اللي بيتقبلوا تجاربهم السلبية بتكون صحتهم النفسية أفضل لأن القبول ساعدهم على تجربة مشاعر أقل سلبية.. يعني من الأخر خيبة الأمل والحزن و أي مشاعر سلبية بنمر بيها.. هي اللي بتخلينا أشخاص ثابتة ومتوازنة نفسيا.
وفي الأخر فكر نفسك إن الحياة صعبة وساعات مابنقدرش نستحملها دايمًا فماتجلدش ذاتك لو كنت بتستخدمه بشكل مؤقت كمهرب بس حاول ماتعملش كده تاني وماتخليش الوهم يقود حياتك.. وحاول على قد ماتقدر تحط نفسك في ظروف واقعية توصلك للي أنت عايزه.. ولو عايز فعلا delulu يبقى الـ solulu يبقى خد خطوات حقيقة توصلك للي أنت عايزه زي إنك تشتغل على نفسك وعلى كاريرك عشان تعرف توصل للفرص اللي عايزها وخليك فاكر إن مفيش حاجة بتيجي من غير مجهود ومن غير مجهود delulu عمره ما هيكون ال sululu.
