للناس اللي بتخاف من الرفض.. إيه هو العلاج بالرفض – الـ Rejection Therapy؟
لو بتدور على حل للخوف من الرفض وإزاي تتعامل معاه حبينا نجيبهولك لحد عندك.. ولأن إحنا عارفين إن أغلبنا مش متعود على الرفض وبيعمله مشكلة وكمان بيخليك تقلق تطلب حاجة أو بيضيع عليك فرص كتير فتعالوا نشوف مع بعض إيه هو “العلاج بالرفض”
حسب مقالات على CNN و TheGuardian و TheGoodTrade
الرفض بأشكاله
في البداية كده لو بتشوف إنك مولود بتحس بالقلق من كلمة “لأ” أو بشكل أوسع “الرفض عامة” وبتحس كمان إنها مش مجرد قفل الباب للموضوع وبيكون فيه توابع للحوار ده فا أنت مش لوحدك وفيه كتير معاك.
الرفض مش سهل وساعات كمان بيوديك للحتة بتاع إنه عبارة عن فكرة الناس عنك أو اللي أنت فاكر إنه كده.. لو هو في دراسة أو شغل أو عاطفيا أو حتى من أهلك بتحس بعده إنك قليل ومتضايق وبيشغّل الأفكار السلبية اللي عندك يعني عامل كده زي ماتحط نعناع على الصودا.. وساعات بتخليه يأكد على مخاوفك وطبعًا أكيد أنت بتحاول تهرب من الحوار ده في كل موقف بيحصل بس برضه بتلاقي نفسك واقع فيه.. طب ليه؟!
ليه بنخاف من الرفض؟
عندنا شوية أسباب كده أساسية وهي:
1- الوحدة
2- التجارب السلبية
3- الرفض من الأسرة
4- الخوف أو محاولة الحماية
5- القلق إن حد يحكم عليك
طب إيه هو بقى العلاج بالرفض؟
هو نوع من العلاج كده انتشر بشكل كبير مؤخرا على النت وخد شعبية كبيرة.. وتعريفه ببساطة إنك تعرض نفسك للرفض على قد ماتقدر وبكده تقدر تفرمت عقلك وتشكله من الأول تاني وتقرب من الطريقة المريحة والصح وتزود ثقتك بنفسك قدام الرفض.
بس خلي بالك!
الدكتور النفسي بيتر دبليو أستاذ في جامعة فيرجينيا قال إن النوع ده من العلاج مالوش أدلة ومش طريقة بيستخدمها أطباء النفس.. لكنه أسلوب ذاتي كده اخترعه الناس وعلى الرغم إن مالوش أدلة لكنه مش مضر بالعكس هو مفيد والمبدأ الأساسي بتاعه هو إن “مواجهة المخاوف اللي منها الرفض مش بيشكل خطر حقيقي بل هي مساعدة تخليك تتغلب على المخاوف دي”
على CNN قالت واحدة عملت التجربة بنفسها “تحدي الحصول على الرفض” على مدار 30 يوم.. بدأت تطلب من الناس الغريبة حاجات وتطبق الموضوع زي إنها مثلا تطلب من محل ملابس تعمل مانيكان أو من محل مراتب إنها تريح حبتين على سرير عندهم أو إنها تدخل تعمل ساندوتش بنفسها في مطعم جوة وفي كل التجارب دي كانت فاكره إنها هتسمع كلمة “لأ” بس المفاجأة..
إنها بتلاقي ناس كتير بتوافق على طلبها وكمان بتكتشف إن الإنسان بيضيع فرص كتير أوي كانت ممكن تحصل وحاجات كان ممكن يعملها بسبب إنه خايف من الرفض!
لازم يكون عندنا دم شوية
على الرغم إنك هنا هتعمل تجربة مفيدة ليك بشكل كبير بس أنت لازم تاخد بالك برضه من الشخص اللي قدامك.. بمعنى:
يكون عندك مبدأ مهم وهو إنك تحافظ على راحة اللي قدامك.. يعني تطلب بشكل كويس ومحترم ولو الشخص وافق يبقى حلو ولو ما وافقش يبقى أحلى وده لأن أصلا التجربة بتاعتك كلها قايمة على “الرفض” وتجربة الشعور والاستفادة منه.. وبيكون بإنك تتعرف على نفسك وتفهم إزاي المشاعر اللي مش مريحة بتظهر وإزاي بتتعامل معاها زي القلق والتوتر وغيرهم في مواقف معينة.
طب تواجه “الرفض” إزاي بقى؟
عشان توصل لحل في مواجهة الرفض في الحاجات الكبيرة اللي تأثيرها كبير.. لازم تجرب الأول في حاجات صغيرة وأثرها بسيط وده لأن أي مشاعر نتيجة الرفض هي مشاعر إنسانية طبيعية جدا فلما تجرب الشعور بالرفض من الحاجات الصغيرة هتأهلك للحاجات الكبيرة
تاني حاجة اعترف بمشاعرك تجاه الرفض ده في وقتها وأنت بتعمل ده فكّر نفسك بنقط قوتك وإنجازاتك عشان ده يديلك مساحة تكون قادر تتخطى وتتعافي
خلي عندك عزوة حلوة كده من أهلك وصحابك وحبايبك عشان دول هيقدمولك دعم ومنظور مختلف للموضوع.. والأهم هو الدعم العاطفي
بكل بساطة حدد توقعات منطقية.. الرفض جزء من الحياة ويمكن جزء كبير كمان فتحديد التوقعات بشكل منطقي هيخفف التأثير
دايمًا حاول تكون بتحقق إنجازات في هواياتك حتى يا أخي لو ماتشين بلايستيشن أو حتى لو بتعلبي مع صحابك أي لعبة.. ده هيديلك ثقة بنفسك وهيساعدك تتقبل الموضوع
في النهاية حاول تخلي قاعدتك في الحياة “لو اترفضت.. مش هتكون نهاية العالم” وكمان لو حسيت وأنت بتجرب التجارب الصغيرة إنك مش قادر ومش عارف تعمل ده جرب تشوف حد متخصص يساعدك في الموضوع.
قولنا بقى أنت بتتعامل مع الرفض إزاي؟
