لو أنت من محبي الجريمة والغموض دول 6 من أغرب جرايم القتل في العالم!
الفترة اللي فاتت انتشرت أفلام ومسلسلات كتير بتحكي عن جرايم و serial killers بتسحلنا معاها في التفكير قد إيه كان في ناس دماغهم مش سهلة وقدروا يخبوا جرايمهم من غير ما يتعرفوا.. ده غير إن شكلهم بيبقى عادي جدًا ومش باين عليهم لدرجة إنك ماتشكش لحظة إنهم ممكن يعملوا حاجة شريرة أصلا!! وعشان كده الناس بتنخدع فيهم وما بتصدقش إنهم ممكن يعملوا حاجة زي دي.. عشان كده في الموضوع ده هنقولك على شوية قصص هتصدمك!
1-قصة لايل وإريك مينينديز:
سنة 1989 تحديدًا في يوم 20 أغسطس في أمريكا.. الأخين “لايل وإريك” اللي عمرهم كان 21 و 18 سنة.. اتصلوا بالشرطة وقالوا إنهم لقوا باباهم ومامتهم مقتولين لما وصلوا البيت وإنهم كانوا خارجين بيتفرجوا على فيلم في السينما.. وبعد سبع سنين من المحاكمات اتفاجأ العالم كله إن لايل وإريك هما اللي قتلوا أهلهم واتسجنوا مدى الحياة!.. وبقت من أشهر القضايا الجنائية وعملت ضجة كبيرة وقتها في العالم.. وده مش بسبب إنهم قتلوا أهلهم بس لكن بسبب الطريقة اللي ضللوا بيها القضاء الوقت ده كله وإن ماكانش يبان عليهم إنهم ممكن يعملوا حاجة زي دي..
لكن بعد موت أهلهم ابتدوا يعملوا تصرفات شككت الناس فيهم زي إنهم صرفوا كتير من فلوس باباهم بسرعة جدًا.. وبعد فترة إريك اعترف لدكتوره النفسي إنهم عملوا الجريمة دي هو وأخوه وفضلت الشرطة تدرس هيقدروا يستخدموا الشرايط دي ولا لا لحوالي سنتين.. وفضل إريك ولايل بينكروا التهمة وبيقولوا إنهم عملوا ده دفاعًا عن النفس لأنهم كانوا بيتعرضوا لإساة نفسية وجنسية من أهلهم.. لكن المدعي العام كان شايف إنهم عملوا كده عشان الفلوس.. وفي الأخر اتحبسوا واتحكم عليهم بالحكم المؤبد مدى الحياة!
2- قصة جيبسي روز:
“جيبسي روز “عاشت مع مامتها طول حياتها في أمريكا.. ومن وهي صغيرة كانت معتقدة إنها مريضة بأمراض خطيرة من ضمنها إن عندها سرطان في الدم وضمور في العضلات وماتقدرش تمشي.. لكن المفاجأة إن جيبسي اكتشفت إنها مش مريضة ولا حاجة وبتقدر تمشي ومش محتاجة تستخدم كل الأدوية اللي مامتها وصفتهالها وخلت الدكاترة يكتبوهالها بما إنها كانت ممرضة!.. لكنها كانت ماتقدرش تتكلم خوفًا منها..
وكل ما كانت جيبسي بتكبر في السن كل ماكانت مامتها بتغير في سنها عشان يفضلوا ياخدوا امتيازات بسبب إن بنتها صغيرة ومريضة!
وسنة 2011م حاولت جيبسي تتعرف على شخص لكن مامتها قالتله إنها لسه قاصر مع إن كان سنها وقتها 19 سنة وده خلى جيبسي تغضب جدًا وتحس إن حياتها بتضيع منها.. وبعدها بفترة كبيرة تحديدا سنة 2015م اتعرفت جيبسي على ولد اسمه “نيكولاس” من الإنترنت وطلبت منه يقتل والدتها وفعلا جه البيت وقتلها.. وبعدها اتسجنت جيبسي لمدة 10 سنين بسبب قتل والدتها والحكم كان من الدرجة التانية لأن ظهر مرض والدتها النفسي وإن جيبسي كانت بتدافع عن نفسها!
3-جريمة قتل “جون برايس”
ودي تعتبر من أبشع جرايم القتل في أستراليا.. والحكاية بدأت لما “كاترين نيت” دخلت في علاقة مع “جون برايس” وبدأت علاقتهم بقصة حب لكنها باظت فجأة بسبب تصرفات “كاترين” وسلوكها العنيف اللي اضطر “جون” إنه يطردها برة البيت خالص عشان يرتاح من أسلوبها.. وده طبعا خلى “كاترين” تتعصب جدا لدرجة إنها دخلت البيت وهو نايم وقتلته وبعد ما قتلته.. طبخت أجزاء من جسمه وكانت عايزة تأكلها لأولاده الصغيرين كمان!.. وبعدين اتقبض عليها وبقت أول ست في أستراليا تاخد حكم بالسجن مدى الحياة!
4-جرايم “تامارا سامسونوفا”:
من سنة 2000 لـ 2015 عملت “تامارا سامسونوفا” سلسة من الجرايم في مدينتها “سان بطرسبرج” في روسيا.. وكانت أول جريمة ليها هي اختفاء جوزها واللي بلغت إنه اختفى سنة 2000م وماحدش لقاه من وقتها..
وبعد ماجوزها اختفى ابتدت تأجر أوضة في بيتها وقتلت فيها ناس كتير من المستأجرين وكانت بتقطع جثثهم وترميها في أجزاء المدينة عشان ماحدش يقدر يوصلهم.. وفي 2015م اتقبض عليها بعد ما الشرطة لقت بواقي لجثة وتم الاشتباه فيها لكن ماتمش الحكم عليها لإنهم اعتبروها مريضة نفسيًا واتحكم عليها تقضي باقي حياتها في مستشفى للأمراض العقلية.
5-جريمة قتل “رينيه هارتفيلت”:
“رينيه هارتفيلت” هي طالبة هولندية كانت بتدرس في فرنسا
وللأسف قررت في يوم إنها تزور زميلها في الدراسة الياباني “إيسي”
وماكانتش تعرف إنه مهتم بأكل لحوم البشر من صغره غير لما دخلت بيته وقتلها وبعدها بدأ ياكل أجزاء من جسمها.. وتم القبض عليه ولكنهم قالوا إنه مريض نفسي ورحلوه لبلده وفي الأخر خد براءة!
6-جريمة”ديان داونز”
سنة 1983م.. بلغت ” ديان” الشرطة إن في راجل غريب حاول يسرق عربيتها وبعدها ضرب النار على ولادها التلاتة.. واتوفت واحدة من أطفالها والاتنين التانيين واحدة فيهم اتصابت بسكتة دماغية.. وابنها حصله شلل نصفي
لكن المفاجأة لما الشرطة شكت فيها ولقوا عندها مذكرات سرية بتحكي فيها عن حبها لراجل متجوز لكنه مش عايز يربي أطفال.. وتم اعتقالها والحكم عليها بالسجن مدى الحياة وزيادة عليهم 50 سنة!.
والعالم لسه مليان بجرايم أبشع وأغرب ومنها اللي ماتمش حلها لحد النهاردة وبقالها سنين زي جريمة اختفاء الطفلة “مادلين ماكين” اللي لحد دلوقتي مايعرفوش هى عايشة ولا ميتة!
