لو أنت من مدمني وكييفي القهوة والشاي.. تستعد إزاي قبل رمضان؟
طبعا أغلبنا بيحب يصحى على كوباية قهوة جميلة كده يبدأ بيها يومه عشان يفوق ويقدر يتعامل مع البشرية أو حتى يحبس بكوباية شاي بعد الفطار والغدا عشان يظبط الجمجمة ويروق على حاله.. بس إحنا داخلين على رمضان ومش هيبقى فيه لا فنجان قهوة الصبح ولا كوباية شاي طول اليوم لحد المغرب.. طب ممكن نعمل إيه في الحوار ده عشان نتعايش الفترة الجاية؟
حسب موقع elconsolto وموقع businessinsider
1- قلل استهلاكك للكافيين قبل رمضان:
لسه فاضل حوالي 4 أيام على رمضان ودول محتاج فيهم تقلل الكافيين اللي أنت بتشربه كل يوم عن اليوم اللي قبله.. فلو بتشرب كمية معينة قللها في يوم للنص “لو بتشرب 2 قهوة خليهم 1 بس” وكل كوباية تقللها من الكافيين سواء قهوة أو شاي بدلها بكوباية مياه في اليوم ده.. وده هيخليك تقلل الأعراض الانسحابية في رمضان زي الصداع والتعب
2- بدل الشاي والقهوة بحاجات صحية:
طبعًا المياه أفضل بديل لكن أكيد مش هتقدر تكتفي بيها لوحدها عشان كده فيه كام حاجة ممكن تبدل الشاي والقهوة بيهم وهم:
“النعناع والشاي الأخضر والزنجبيل وأحلى وأحلى بقى العصائر الطبيعية” واللي هتخليك تحافظ على ترطيب جسمك وتخليه فريش كده وتقلل من اعتمادك على الكافيين
3- خد بالك من أعراض الانسحاب:
خليك عارف إن فيه أعراض انسحاب هتظهر زي الصداع والتعب والقلق وهيبقى صعب تركز كويس بس لازم تبقى عارف إنها أعراض مؤقتة وهتختفي مع الوقت وما تستسلمش ليها وترجع في كلامك.. ولو الموضوع كبير أوي ممكن تستشير دكتور
4- ظبط نومك:
نصيحة محتاجينها في كل وقت كده كده.. بس في حالة القهوة والشاي والكافيين “النوم” فعلًا حاجة مهمة جدًا وإنك تنام كويس وعدد ساعات مظبوط وعندك نظام محترم للنوم ده هيساعدك كتير في التأقلم مع التغييرات اللي بتحصل وهيقلل تأثير أعراض الانسحاب
5- خمسة تمارين أو أي رياضة:
أي شوية رياضة بعد السحور أو أول ما تصحى الصبح سواء تمارين أو حتى تتمشى شوية ده هيخليك نشيط أكتر ومش محتاج كافيين يفوقك ويديك طاقة
6- نظام أكل محترم:
ومن الحاجات المهمة أكلك يكون مظبوط في السحور كويس وكمان الفطار يكون مظبوط ومن الحاجات اللي بتقلل أعراض الانسحاب من الكافيين خلال فترة الصيام هي الألياف والخضروات والفواكه ويُفضل تبدأ النظام ده قبل رمضان وكمان تقلل الأكل الصناعي أو اللي بيحتوي على مواد صناعية والدهنية
في النهاية مع اتباع شوية الخطوات دي هتلاقي نفسك مش محتاج أوي للكافيين في رمضان ويمكن تبقى مش محتاج له في العموم زي ما أنت فاكر.. وهتريح الناس من عصبيتك أول ما تصحى من النوم وقريفتك في الشغل أو في أي مكان تاني وهتبقى لذيذ ومحبوب وعارف تتعايش وتصوم ويبقى رمضان كريم عليك وعلى اللي حواليييك.
