لو انتي أم جديدة.. دليل إزاي تفطمي طفلك بشكل صحي ويحافظ على نموه
الأمومة رحلة طويلة بتبدأ بولادة طفلك.. أينعم هي جميلة وكل المشاعر اللطيفة دي بس ده قبل ما تتحطي الموضوع بنفسك وبتبقي محتاجة تاخدي قرارات خاصة بصحته ونموه.. مثلًا زي موضوع الرضاعةوالفطام.. المفروض أفطمه إمتى؟ طب وأكله إيه؟ وشغلانة زرقا وحياتك.. بس ماتقلقيش هنديكي زتونة فترة الفطام وهتلاقي إجابة على كل سؤال في دماغك بخصوص المرحلة دي
إزاي تفطميه صح؟
- ماتوقفيش الرضاعة الطبيعية عن طفلك على طول.. خلي الموضوع تدريجي عشان تطمني من حتة إنه ممكن مايتقبلش الأكل الجديد اللي هتدخلهوله وكمان عشان مايجيلوش جفاف
- بدلي رضعة واحدة من الرضعات الطبيعية برضعة من اللبن الصناعي كل كام يوم كده.. وده عشان تجهزيه للرضاعة من اللبن الصناعي
- دخلي الأكل الصلب واحدة واحدة وماتوقفيش اللبن فجأة.. فالأفضل تدخلي أكل صلب للبن الطبيعي أو الصناعي وبعدها بمدة وقفي الرضاعة بالتدريج
- دخلي لطفلك نوع واحد من الأكل الصلب.. يعني لو اختارتي تأكليه حبوب فاختاري إما رز مثلًا أو مكرونة ماتدخليش الاتنين ليه سوا
- وعشان تعوديه يشرب من كوباية أو أزازة بدل الرضعة.. حطي السوايل اللي بيحب يشربها في كوباية أو أزازة عشان يتعلق بيها.. لكن السوايل اللي مابيحبهاش حطيها في الرضعة مش هيكون شايفها وكمان عشان يقل ارتباطه بالرضعة
- لو بترضعيه وقت النوم.. حطيه في سريره قبل ما يغطس في النوم عشان يتعلم إنه لازم ينام من غير رضاعة
- افضلي احضنيه وحسسيه بحبك ليه.. وده عشان تعوضيه عن التلامس اللي كان بيحصل وقت الرضاعة بينك وبينه
أنواع الفطام
- الفطام التدريجي: بتبدأي تقطعي اللبن الطبيعي عنه بالتدريج وده بيحصل ببطء وبياخد وقت طويل ممكن تبدأ بأسبوع وتفضل لشهور أو سنة
- الفطام المؤقت: وهنا انتي بتوقفي الرضاعة الطبيعية لفترة صغيرة انتي بتحدديها وبعدها ترجعي ترضعيه تاني.. وده انتي تلجأي ليه لو محتاجة تعملي عملية جراحية مثلًا أو عندك مشكلة صحية
- الفطام الليلي: بتوقفي ترضعيه بالليل وترجعي ترضعيه الصبح عادي
- الفطام المفاجئ: ده أسوأ نوع للفطام ممكن تعمليه مع طفلك.. لأنك ساعتها بتوقفي اللبن الطبيعي عنه من غير تمهيد ليه وتصدميه باللبن الصناعي
- الفطام الذاتي: بتبدأ بتدخلي للطفل أكل صلب ياكله هو بنفسه سواء بقى بإيده أو بمعلقة بدل الأكل المهروس وتقطعيهوله بحجم صغير.. وده اعمليه لو لقيتي عليه علامات هنقولهالك
علامات هتقولك ده وقت تدخلي الأكل لطفلك
- لو بدأ يقعد من غير مساعدة
- لما يعرف يتحكم في راسه ورقبته
- لما يبطل يخرج أي حاجة تدخليها بوقه بلسانه
- لما يبص باهتمام للأكل لما يشوفه.. زي إنه يحاول يدخله لبوقه
- لما يطلب يرضع كميات كبيرة وإضافية من اللبن
في فترة الفطام طبيعي هتلاقي تغيرات بتحصل عليكي وعشان تخرجي من المرحلة دي وعقلك وجسمك كويسين.. كلي أكل صحي فيه كل العناصر الغذائية الأساسية.. واعملي أي رياضة عشان التوتر اللي انتي فيه يخف وتروقي.. بس بعد شوية النصايح دي هتعدي منها سليمة من غير توتر ومانقدرش نقولك غير “يو أر سترونج!”
