لو انت Gen Z.. اعرف إزاي بتحس بنوستالجيا لأيام الزمن الجميل رغم إنك ماعيشتهاش؟
بتشوف فيديوهات وصور كتيرة على السوشيال ميديا ليها ستايل فترة الخمسينات.. وتقول ياريتك اتولدت زمان أيام الزمن الجميل.. فترة هادية والناس ذوق وشيك وكل حاجة جميلة و aesthetic على رأي جيل Gen Z.. بس انت إزاي بتحس بنوستالجيا لأيام انت أصلًا ماعيشتهاش؟
إيه هي الـ “Idealized past” أو “الماضي المثالي”؟
“ريان ليزاردي” وده مؤلف وأستاذ في الإعلام الرقمي والعلوم الإنسانية في معهد بوليتكنك في كتابه “Mediated Nostalgia” اتكلم عن حاجة اسمها “Idealized past” أو “الماضي المثالي” وده ببساطة معناه إنك بطبعك بتميل إنك تفتكر إن زمان كان أفضل وأحلى وإنه كان عصر أبسط من الزحمة اللي عايش فيها دلوقتي.. لأنك ببساطة قادر تتخيل زمن ماعيشتش أحداثه ولا تفاصيله بشكل مثالي.. وبتضيف شوية بهارات كده رومانسية على شخصيات زمان وشكل حياتهم
الإعلام وتأثيره على الماضي المثالي
الكاتب كمان بيقول إن وسائل الإعلام بتخلق ذاكرة جماعية مثالية عن الماضي وده بيحصل من خلال السينما وأفلامها والمسلسلات والبرامج أو حتى الألعاب اللي بتصور الزمن الجميل بشكل بسيط وهادي.. و”ليزاردي” شاف إن وسائل الإعلام بتعمل ده بكام طريقة.. زي مثلًا إنها ماتحكيش كل مشاكل الفترة دي فتقدملك زمان على إنه كان الزمن البسيط والنقي الجميل اللي كل حاجة فيه ليها بركتها.. مع إن عادي زمان زي ما كان مليان جمال وبساطة كان فيه مشاكل وأحداث صعبة برضه.. فتشوف انت الفساتين الشيك والراجل الجينتل وتفتكر إن زمان كانت كل الستات سعاد حسني وإن الرجالة كلهم كانوا رشدي أباظة
الفرق بين “الماضي المثالي” و”الحنين المُعاد إنتاجه/ Mediated Nostalgia”؟
وده يودينا لنقطة مهمة وهي إن فيه فرق بين “الماضي المثالي” و”الحنين المُعاد إنتاجه”:
الماضي المثالي/ Idealized past: ده تخيل مثالي من تأليف عقلك وتصورك انت عن زمان بإنه أحسن من دلوقتي من جمال وهدوء الفترة دي اللي بتشوفها في الأفلام بس في الآخر ده معناه إنه نتيجة لمشاعرك انت
الحنين المُعاد إنتاجه” أو “Mediated Nostalgia”: اللي “ليزاردي” بيتكلم عنه في كتابه هي عبارة عن أداة تسويقية الشركات بتستخدم فيها النوستالجيا عشان تبيع لك منتج معين وهي مغلفاه كده بفكرة الحنين للماضي عشان تهتم بيه ويديك شعور معين.. يعني من الآخر كده بيبيعولك فكرة الماضي الجميل الهادي والبسيط في منتج الشركة
النوستالجيا بين المميزات والعيوب
مميزات: كتير بيحسوا إنهم لما بيفتكروا الزمن الهادي الجميل معنوياتهم بتترفع والحنين بيلعب دوره في إنه يحسسك بإنك ممكن تعيش حياة شبه الحياة الهادية دي فبيبقى عندك حماس وفضول عن شكل الحياة اللي هتكون فيها أحداث إيجابية ودي حاجة بتكسر الملل
عيوب: وفيه ناس تانية بتشوف إن النوستالجيا شكل من أشكال الخداع اللي بتمارسها على نفسك.. لأنك بتبدأ تحط التوابل والبهارات على الحياة اللي ماعيشتهاش دي.. وبتبقى محبوس في الماضي اللي عمرك أصلًا ما كنت فيه ولا في تفاصيله.. ومابتعرفش تعيش اللحظة اللي انت فيها
وفي الآخر محدش يقدر ينكر إن زمان كانت الدنيا أبسط ورتمها أهدى لكن برضه ماتقدرش تقول إنه كان مثالي للدرجة اللي مخك متخيله بيها.. وجميل إنك تحس بمشاعر حنين للزمن الجميل بس خليك في الواقع برضه عشان ماتتحبسش في زمان وبس
