لو بتحب أفلام المغامرة والبحث عن الكنز.. شوية ترشيحات ليهم!

ناس كتير بتحب لما تبقى عندها وقت في الويك إند أو أي يوم بليل يتفرجوا على أفلام فيها مغامرة وتدوير على حاجات مفقودة خصوصا لو كانت كنز عشان الفرهدة اللي أبطال الفيلم بيرفهدوها والرحلة نفسها والفرحة اللي بيوصلولها للأخر لو هيوصلوا للكنز يعني لو ماطلعش الكنز في الرحلة.

وبمناسبة يوم البحث عن الكنز عملنالكوا بلاي ليست بالأفلام اللي فيها بحث عن الكنز: 

1- فيلم “Lara Croft: Tomb Raider”:

 أحداث الفيلم بتدورعن شخصية “لارا كروفت” وهي بتحب تجمع الآثار القديمة من أنقاض المدن والمعابد في العالم كله وده عن طريق استغلال قدرتها الفائقة على القتال اليدوي واستخدام الأسلحة واتقانها للغات كتير وفي الجزء ده بتواجه جماعة اسمها المتنورين في صراع إنهم يدوروا على تعويذة بتدي صاحبها القدرة على التحكم بالوقت، وتعتبر واحدة من الكنوز اللي الناس بتحاول تمتلكها.

الفيلم بطولة أنجلينا جولي وجون فيت ودانيال كريج وإيان جلين ونواه تايلور وكريس باري وغيرهم

2- فيلم جزيرة الشيطان: 

بتدور أحداث الفيلم عن جزيرة قريبة من الغردقة، فيها كنز مفقود لواحدة من السفن الغرقانة وفيه بنت اسمها فاطمة بتاخد خريطة لمكان السفينة من جارها الشواف اللي بيأتمنها عليها قبل ما تقتله عصابة الزغبي اللي بتدور هي كمان على الخريطة، وبتتفق فاطمة مع واحد من الغواصين اللي اسمه جلال إنه يعلمها الغطس هي وخطيبها محمود لكن بتضطر تكشف سر المهمة للغواص جلال عشان يساعدهم يلاقوا الذهب الموجود في السفينة المفقودة، وبتراقبهم عصابة الزغبي اللي بتبقى عايزة تستولى على الذهب فيبدأ الصراع بينها.

الفيلم بطولة عادل إمام ويسرا ومصطفى متولي وأحمد راتب وجمال إسماعيل وحاتم ذو الفقار.

3- فيلم “Pirates of the Caribbean: On Stranger Tides”: 

وده واحد من أجزاء “Pirates of the Caribbean” لجوني ديب واللي اتعرض في 2011 وأحداثه  بتدور عن جاك سبارو اللي بيقابل بنت غامضة اسمها أنجيليكا، وبتجبره يركب سفينة “كوينز آن ريفنج” بتاعة بالقرصان الشرير، فبيلاقي نفسه في مغامرة فيها مفاجآت ومخاطر عشان يدور على كأسين قيمتهم كبيرة عشان يشربوا مياتهم اللي بيخلوا صاحبهم مخلد 

الفيلم بطولة جوني ديب وبينلوبي كروز وإيان ماكشين وجيفري راش وسام كلافلن وكيفن ماكنالي.

4- فيلم “THE MUMMY”: 

اتعرض أول جزء فيه سنة 1999، وبتدور أحداثه عن أمينة مكتبة  اسمها”إيفي” اللي بتدور على آثار في “هامونابترا” وهي مدينة مصرية قديمة، ومعاها ريك وأخوها لكن بالصدفة بسببهم بيرجع الكاهن “إيموحتب” للحياة تاني بعد لما بيلاقوه في المدينة المفقودة وكنوزها وكان  إيمحوتب تحت لعنة مصرية من أقوى اللعنات.

الفيلم من بطولة برندان فريزر وريتشل وايز وآرنولد فوسلو. 

5- فيلم الكنز:

بتدور أحداث الفيلم إن في سنة 1975 حسن بشر بيقرر يرجع من أوروبا بعد دراسته لعلم المصريات لبيت العيلة في الأقصر، وبيكتشف إن والده قد سابله وصية مسجلة بيحكي فيها  تفاصيل كتير من حياته، وسابله كمان برديات بترجع لفترة حكم الملكة حتشبسوت، ومذكرات مكتوبة بخط الأيد ومنسوبة للبطل علي الزيبق، والأحداث بيتروح وتيجي بين العصر الفرعوني والعصر العثماني والنص الأول من القرن العشرين في حكم الملك فاروق عشان يدور حسن من خلال كل ده عن اللي سابه أبوه له.

الفيلم بطولة محمد سعد ومحمد رمضان وهند صبري وروبي وأحمد رزق وهيثم أحمد زكي وأمينة خليل وسوسن بدر.

6- فيلم “National Treasure”: 

الفيلم اتعرض سنة 2004 وبتدور أحداثه عن واحد من صيادين الكنوز اللي قرر يطارد كنز أسطوري تاريخه بيرجع لقرون كتير قديمة وصاحب الشغل بتاعه بيتحول لعدو له وبيبقى عايز هو اللي يوصل للكنز.

الفيلم من بطول نيكولاس كيدج وديان كروجر وأرابيلا فيلد وجاستن بارثا وكريستوفر بلامر وشون بين.

7- فيلم “Lord of the Rings”:

الفيلم بيبدأ بمخلص عن العصور اللي ما قبل التاريخ وإن كان فيه من فترة طويبة 20 خاتم 3 منهم للجن و7 للأقزام و9 للرجالة وواحد بتاع “سورون” اللي هو ملك الظلام وهو أقوى خاتم عشان بيقدر منه يتحكم في كل الخواتم التانية، وحط فيه “سورون” كل الشر بتاعه وكان عايز يدمر الأرض الوسطى بيه فتحالف الجن والبشر قاوموه وفازوا ضده في المعركة 

وبعد كده بيظهر “فرودو” وصحابه اللي بيبقى عايزين ينتصروا على ملك الظلام وبيساعدهم على ده “إلروند” وهو جني صاحب قوى كبيرة وبيعرف حاجات كتير عن الخاتم ده

8- فيلم “The Lost City”: 

بتجور أحداث الفيلم عن كاتبة روايات معروفة اسمها “لوريتا” ومن خلال جولة بكتابها الجديد بتتخطف من راجل غني بيبقى عايزاها تساعده عشان يوصل لكنز في مدينة مفقودة، ومحدش يقدر يفك شفرات خريطة المدينة دي غير الكاتبة دي واللي بدورها بتتعرض لمواقف صعبة عشان توصل في النهاية للمدينة المفقودة والكنز الموجود فيها.

الفيلم من بطولة ساندرا بولوك ودانيال رادكليف وتشانينج تاتوم وبراد بيت وباتي هاريسون ورايموند لي وتوماس فوربس جونسون.