لو بتدور على السعادة.. اعرف إيه هي أنواعها وأنهي فيها هو السعادة الحقيقية؟

“كتاب حياتي يا عين ماشوفتش زيه كتاب.. الفرح فيه سطرين والباقي كله عذاب”.. مابتحس انت بالسطرين دول بيعدوا هوا.. وكله نفسه يعرف تحويجة السعادة الحقيقية.. بس خلينا نقولك الأول على أنواع السعادة وبعدها نشوف موضوع السعادة الحقيقية ده 

أنواع السعادة

فيه كاتبة اسمها “بيكي ستوري” نشرت تقرير في موقع “لورنينغ مايند” بتقول إن السعادة بتختلف من شخص للتاني عشان فيه أنواع كتيرة للسعادة وإنها مصطلح بيعبر عن مشاعر حلوة وإيجابية مختلفة.. وإن الدراسات بتقسم السعادة لـ 3 مستويات: سعادة قصيرة الأجل وسعادة عميقة وسعادة طويلة الأجل.. وتحت كل مستوى فيهم بيكون فيه مشاعر معينة هنقولك عنها:

• السعادة قصيرة الأجل

دي السعادة اللحظية أو المؤقتة بتبقى في لحظتها وخلاص.. ودي بيكون تحتها:

1- الفرح: أبسط أنواع السعادة المؤقتة وبيحصل لما بتعيش اللحظة بلحظتها.. فمثلًا بتعمل حاجة بتحبها أو بتكلم صحابك أو أهلك

2- الاعتزاز: بتحسه لما بتنبسط إنك وصلت لحاجة معينة أو إن حد بتحبه حقق حاجة كان نفسه فيها.. وبتبقى السعادة مش سايعاك حسب عمق الإنجاز وتعبك عشان توصله 

3- الفكاهة: بتحسه لما حد يرمي نكتة حلوة وسط القعدة حتى لو انت مضايق بتحسه.. عشان ممكن تكون مضايق فتتفرج على حاجة بتضحك فتنبسط 

• السعادة العميقة

الكاتبة “بيكي” بتوضح إن نوع السعادة دة مش مجرد مشاعر بتخلص في ساعتها بس في نفس الوقت مش بتمثل حياتك كلها.. ودي بيكون تحتها:

1- التفاؤل: انبساطك إن اللي جاي هيبقى أحلى وأحلى حتى لو مش لاقي دليل واحد على كده.. وهو شعور بيعتمد على إنك شخص إيجابي واثق إن النتايج الإيجابية هي اللي هتنتصر على السلبية

2- الامتنان: ده بقى عكس التفاؤل لإنه بيحصل وليد اللحظة كده.. تحس بالامتنان للحاجات الموجودة في حياتك بداية من الحاجات البسيطة لحد حبايبك اللي ماتقدرش تستغنى عنهم

• السعادة طويلة الأجل

1- الحب: ده بقى من أعمق أنواع السعادة وده لإننا لما بنحب بنحس بقيمتنا.. وهنا الحب مش بس للحبيب والحبيبة ممكن للأم والأب والصديق أو حتى الجار

2- الرضا: النوع ده من السعادة بيبقى روحاني.. لأنك مش لازم تحس بالرضا عشان حققت حاجة في حياتك.. ممكن تحس بالرضا عشان ببساطة مبسوط باللي معاك وباللي في حياتك حتى لو اللي بيحصل مش أحسن حاجة 

طب إيه هي السعادة الحقيقية؟

الفلاسفة وعلماء النفس احتاروا وهما بيدوروا على معنى السعادة الحقيقية بس عملوا شوية اجتهادات كده عشان يوصلولها.. ودي شوية من آرائهم:

• اليودايمونيا:

دي كلمة يونانية معناها الرفاهية أو السعادة.. والفلاسفة شافوا إن السعادة الحقيقية سكتها بعيدة تمامًا عن أي حاجة تخليك محبوس جوه شهواتك.. وبتحصل بس لما بتعمل الواجب اللي عليك اللي مبادئك بتتفق معاه وبتحصل كمان لما تقوي علاقتك بالناس اللي بتحبهم وبتهتم بيهم

• مايك ويكنج الرئيس التنفيذي لمعهد أبحاث السعادة هو اللي قال إن السعادة في الرحلة ومش في الوصول.. وإن فيه نظرية اسمها “النقطة المحددة” اللي بتقول إن إحساسك الزيادة بالسعادة لما حاجة بعينها بتحصل في حياتك بيرجع لورا بعد مدة معينة وبتحس نفس اللي كنت حاسه قبل الحاجة دي ما تحصل
• مؤلفة كتاب “أكثر سعادة الآن: كيفية التوقف عن مطاردة الكمال واحتضان اللحظات اليومية” ناتالي كوغان بتقول إن السعادة الحقيقية هي الامتنان لأي حاجة بسيطة في حياتك.. وإن السعادة في الحياة مجرد قرار شخصي بتاخده

في الآخر السعادة مالهاش روشتة ثابتة.. وأهم حاجة تبقى عارف إن أيًا كان إيه اللي بتعيشه مش هيفضل معاك طول الوقت وده معناه إنها زي ما بتضلم عليك وبتزعل.. هتشرق الشموسة والسعادة هتعرف طريقها ليك يا عم.. المهم انت بس تنبسط بسطرين الفرح وتسيبك من باقي العذاب