لو بتعوم.. تعليمات مهمة ليك ولأطفالك لازم تعرفها
في الساعات اللي فاتت للأسف توفى السباح يوسف محمد اللي عنده 12 سنة لاعب نادي الزهور غرقًا اثناء مشاركته في بطولة الجمهورية تحت 12 سنة اللي كانت بتتلعب في استاد القاهرة امبارح.. وعشان كدة قولنا نعرفك شوية معلومات لازم تعرفها لو قررت أي وقت تنزل المية تعوم وده كلام نقوله ليك وفقًا لمصادر كتيرة بس منها لو حابب تعرف usms.org ودي منظمة غير ربحية بتقدم خدمات للمساعدة والتحذيرات والتنبيهات والتمارين عمومًا في السباحة
ولازم نبقى عارفين إن المية ليها احترامها والسباحة تعتبر من أفضل الأنشطة اللي بتحقق ده لأي عمر بس الأهم من الرياضة نفسها إن كل واحد فينا يكون عارف إزاي يحافظ على نفسه وعلى اللي حواليه ؟ والموضوع فعلاً أبسط مما تتخيل بس أنت خد بالك مهما كان سنك
قواعد الأمان للكبار
– عوم بهدوء وبلاش تهوّر
أغلب إصابات حمام السباحة بتحصل من الهزار التقيل: حد يزقّ حد في المية وحد يجري على الأرض المبلولة وحد ينط من مكان مش مناسب.. وكل ده ممكن يسبب خبطة جامدة في الرأس أو الظهر وممكن يزود خطر الغرق
– سيطر على أعصابك
الخوف الزايد بيسبّب ارتباك وده للأسف بيودّي لمشاكل ولو المياه عميقة افتكر إن القاع مش بعيد وإنك تقدر تزقّ نفسك من الحيطة في أي وقت.. وأهم حاجة إنك تتنفس صح وتفضل هادي لأن الهدوء بيساعدك تطفو بسهولة
– خد راحة قبل ما جسمك ينهار
لو فاجأة حاسس بدوخة؟ برد؟ حرارة؟ إرهاق؟ بلاش تنزل المية ولو التعب حصل وإنت جوّة اعمل طفو وخلي جسمك مرتاح ووشّك لفوق وخد نفسك هتلاقي نفسك بتطلع فوق بس أهم حاجة تبقى عارف توازن التنفس كويس وحركاتك
– أشرب مياه وراقب الجو
ناس كتير بتفتكر إن السباحة تعني إن الجسم مش محتاج مية بس الحقيقة إن الجسم بيعرّق برضه بس مش بنحس عشان كده لازم تشرب مية بانتظام عشان مايحصلش جفاف
وعايزين نقول برضه أن البرق أخطر عدو للي في المية لأن المية موصل ممتاز للكهربا ولو البرق ضرب سطحها ممكن تحصل كارثة فورًا لقدر الله.. الأمان بيقول: استنى نص ساعة بعد آخر صوت رعد قبل ما ترجع تنزل تعوم
– خد بالك من التحذيرات
وده بيكون بشكل أكبر في البحر زي اليفط اللي بتكون مكتوبة.. وحاول قبل ما تنط اتأكد إن العمق مناسب وإن مفيش صخور أو حاجات تحت السطح لأن الحاجات اللي زي دي بتعمل إصابات في العمود الفقري والرأس.. وحاجة مهمة بقى بلاش تتجاهل التحذيرات اللي بتكون مكتوبة ولا حتى العلامات.. ولا حتى الراجل اللي هتلاقيه في البحر وبيدي إشارات وأحيانًا بيقعد يزعق عشان خاطرك.. فبلاش تطنّشها أرجوك.. وحتى على فكرة في حمامات السباحة.. أحيانًا بيكون ممنوع تنزل تعوم بليل أو في توقيت معين.. فبلاش تتجاهل برضه كل ده
قواعد الأمان للأطفال
الأطفال بيحبّوا المياه جدًا بس بنفس القدر هي خطيرة عليهم لو اتسابوا لوحدهم ومن أهم القواعد:
- السباحة في أماكن فيها منقذين يعني وجود حد متخصص بيقلّل مخاطر كتير جدًا
- الطفل ماينفعش يسبح لوحده.. لازم حد كبير يكون موجود حتى لو الطفل بيعرف يعوم كويس
- ممنوع نعتمد على طفل يراقب طفل.. لأن الطفل مهما كان واعي.. هيفضل طفل
- الطفل لازم يستأذن قبل ما يدخل المية عشان متفاجئش إنه داخل لوحده في لحظة
- استخدام سترة نجاة لكن مش بديل عن الرقابة.. السترة بتساعد بس مش بتمنع الخطر بنسبة 100%
- سور حوالين المسبح.. دي واحدة من أهم إجراءات الأمان لأن أغلب حوادث الغرق للأطفال بتحصل في أقل من 5 دقايق
- أنت كأب أو أم ماينفعش تشيل عينك عن طفلك.. الموبايل والمكالمات وأي حاجة تانية تتأجل دقيقة غفلة كفيلة بكارثة
- واقي الشمس والمية.. الطفل لازم مايتعرضش للشمس القوية.. ويشرب مية باستمرار حتى لو مش عطشان زي ما قولنا فوق كده
الأكل قبل السباحة خطر؟
ناس كتير بتظن أن الأكل قبل العوم غلط والاعتقاد ده منتشر من زمان بس الحقيقة إنه مش صحيح علميًا والأكل قبل السباحة مش بيعمل مشاكل خطيرة لكنه ممكن يسبب اللي هقولك عليهم دول: تقلصات.. إحساس بعدم الراحة.. غثيان بسبب الوضع الأفقي في المية وعشان كده يُفضّل طبعًا الأكل قبل السباحة بساعتين أو تلاتة وأفضل الأكلات الخفيفة زي البطاطا
خطوات إسعاف الغريق
لو حد لقدر الله كان بيغرق.. في الحالات دي كل ثانية بتفرق حرفيًا اطلب منقذ أو إسعاف فورًا سواء أنت اللي بتغرق أو حتى شوفت حد كده وطلّع الغريق من المية وشوف بيتنفس ولا لأ ولو مفيش تنفس شوف النبض 10 ثواني ولو مفيش نبض ابدأ إنعاش قلبي رئوي
ولو مش عارف بتتعمل إزاي هنقولك.. للبالغين: الضغط في نص منطقة الصدر 2 بوصة عمق – 100 لـ120 ضغطة في الدقيقة.. وللأطفال: نفس الطريقة لكن بحرص جدًا وللرضع: بإصبعين بس ونص بوصة ضغط تقريبًا.. وبعد كل 30 ضغطة ادي نفسين وكمّل لحد ما الإسعاف يوصل أو الشخص يستعيد نفسه تاني
عايزين نقول في الآخر السباحة فعلًا متعة وصحة وحياة بس محتاجة التزام بسيط.. وشوية قواعد سهلة بس بتمنع مشاكل خطيرة جدًا ولو كل واحد فينا لعب دوره كويس سواء كبير أو طفل هنستمتع بالمياه بأمان من غير قلق.
