لو حاسس إنك معملتش حاجة في حياتك يبقى لازم تشوف الفيلم ده

في الفترة دي من كل سنة بيبدأ يجيلنا اكتئاب آخر السنة ونحس إننا ماحققناش حاجة ويبدأ يجي في دماغنا كل السيناريوهات السوداوية اللي تخطر على بالنا واللي ماتخطرش.. بس هل فعًلا إحنا ماحققناش حاجة ولا فيه حاجات إحنا عملناها مهمة ومش واخدين بالنا؟.. أهو هو ده بالظبط اللي بيقولهولنا فيلم It’s a Wonderful Life
وهنحكيلك قصته إيه بالظبط في الموضوع ده

على الرغم من إن الفيلم اتعمل سنة  1946م لكنه مصنف من أفضل الأفلام في السينما  وواخد تقييم 8.6/10 على الـ IMDb  وتقييم 94% على موقع rotten tomatoes ولحد دلوقتي مرتبط ببداية السنة وفي ناس كتير بتحب تشوفه..
ده غير إن الرئيس السابق “جمال عبد الناصر” كان بيحب الفيلم ده جدًا وكان نفسه
يعمل منه نسخة عربية توصل لكل الشعب لأنه كان شايف إن الفيلم ده أثر فيه ونفسه يأثر في كل الناس

الفيلم من إخراج”فرانك كابرا” ومن بطولة النجم “جيمس ستيوارت”بيحكي عن “جورج بايلي” اللي بيحب يساعد الناس لكنه بيوصل لأزمة كبيرة في حياته بتخليه يحس إنه خسر كل حاجة وبيتمنى إنه يكون ماتولدش لأنه بيحس إنه مالوش أهمية وإنه محققش حاجة في حياته!.. وفعلا بتتحقق أمنيته وبتجيله فرصة ما إنه يشوف الحياة لو ماكانش اتولد كانت هتبقى عاملة إزاي؟
بيبدأ “جورج” يدرك إن كل مساعدة عملها حتى لو كانت بسيطة عملت تأثير كبير من وهو صغير لحد ما كبر ولولاه كان في ناس كتير حياتها هتدمر لو ماكانش ساعدهم أو مكانش موجود في الحياة.. والفيلم كمان ليه أبعاد نفسية فلسفية كتير زي إنه بيتكلم عن قيمة الشخص وإزاي قراراتنا وتصرفاتنا بتنعكس على اللي حوالينا وبتسيب فيهم أثر للأبد.. وكمان بيشارك مفهوم الرضا وتقدير النفس.. ده غير إنه عبر عن قيمة الصحاب في حياتنا وإن لولاهم في محن كتير ماكنتش هتعدي

ومش عايزين نحرق عليك الفيلم عشان لو عايز تشوفه بس يمكن دي فرصة تفكر نفسك بالحاجات اللي عملتها أو بتعملها وعملت تأثير من غير ماتاخد بالك وإن كل فعل صغير مهما كنت مش فاكره بسببك في شخص شايلهولك وبيفتكرك بسببه وحياته اتغيرت وأنت مش عارف!