لو شايف رأيك انت بس اللي صح.. اعرف إيه هو الإجماع الزائف أو False Consensus Effect؟
ساعات بتدخل خناقات في كومنتات الفيسبوك وتبقى انت واللي بتكلمه بتدافعوا عن وجهة نظركم عشان كل واحد فيكم متمسك إن رأيه هو اللي صح ومنتشر وأكتر من حد بيأيده.. وهو ده الإجماع الزائف أو الـ False Consensus Effect اللي هنشرحهولك في الموضوع ده حسب موقع Psychology Today وVeryWell Mind
إيه هو الإجماع الزائف/ False Consensus Effect؟
دي طريقة تفكير غلط بتحصل بسبب مبالغتك في اتفاق اللي حواليك معاك في الأفكار والمعتقدات.. وإنهم بيتشاركوا معاك نفس الرأي رغم إن دي مش حاجة حقيقية.. وعشان نبسطهولك هنديك مثال.. لو بتطلب آيس كريم مع صاحبك وهو اختار شوكولاتة وانت طلبت عكسه هيستغرب ويقول إزاي مش هتطلب زيي وهيديك مثال بإن كل أهله وصحابه بيحبوا الطعم ده.. فهو بالغ في اشتراك الناس معاه في اختياره رغم اختلاف الأذواق والآراء
إمتى طلع المصطلح ده؟
عالم النفس الاجتماعي في جامعة “ستانفورد” اسمه “لي روس” عمل بحث في أواخر سبعينيات القرن اللي فات عن التحيزات والقرارات والحكم على المواضيع عشان يفسر ليه الناس ممكن تفهم بعضها غلط
إيه تفاصيل التجربة؟
طلب من المشاركين إنهم يقرأوا موقف مشكلة حصلت وخيرهم بين طريقتين لحل المشكلة وقالهم يخمنوا الطريقة اللي هيختارها باقي المشاركين ويوصفوا نوعية الأشخاص اللي هتختار كل طريقة من الطريقتين.. فلقى “روس” إن المشاركين مالوا إن معظم الناس هتختار الطريقة اللي هما اختاروها.. ووصفوا الناس اللي مختارتش زيهم بإنهم غلط
ليه بيحصل الإجماع الزائف؟
علماء النفس حددوا مجموعة من الأسباب للإجماع الزائف وهي:
- استدلال التوافر/ availability heuristic: بمعنى إنك لما بتحاول تثبت للي حواليك إن كلامك صح بتبدأ تقنع اللي قدامك بإن الفكر ده منتشر جدًا وبيحصل كتير.. فأول حاجة بتيجي في بالك هي الأمثلة اللي بتظهر في دماغك
- لما بتحاول تأيد صحة رأيك بإنه منتشر بتفكر في الأشخاص اللي متشابهين معاك زي العيلة والصحاب وده لأنك بتتعامل معاهم كتير ودماغكم واحدة فطبيعي تختارهم أول ناس
- الرغبة في الانتماء: بترتاح لما بتحس إنك صح ومش بس كده لأ ده فيه كتير كمان بيفكروا زيك وده بيقلل شعورك بالوحدة وإنك مش غريب فبتحس إنك راضي عن نفسك
- بتتعامل إنك محور الكون فسهل عليك تفكر إن الكل بيشوف الدنيا زي ما انت بتشوفها
- بتمثيل إنك تقعد وقت طويل مع أشخاص بتدعم كلامك وده بيخليك تفتكر إن رأيك ده هو الصح والمنتشر
- انت أكتر حد عارف نفسك: وأفكارك فدايمًا بتكون أول حاجة تخطر على بالك.. فلو انت بتحب اللون الأحمر ولقيت حد بالصدفة لابس أحمر تفتكر إن اللون الأحمر لون محبوب بين الناس رغم إن دي حاجة مش حقيقية
إزاي السوشيال ميديا بتخلق الإجماع الزائف؟
لما بتتفاعل مع محتوى معين على السوشيال ميديا.. الخوارزميات بتعرض لك مواضيع مشابهة للمحتوى ده كتير.. وده بيخدع عقلك وبيخليك تفتكر إن رأيك منتشر وفيه ناس شبهك.. ومع كل لايك أو شير بيتعمل للبوست بتاعك بتفتكر إن أفكارك مش بس منتشرة دي كمان مقبولة من العالم كله.. بس في الحقيقة انت في Bubble مش شايف براها
تأثير الإجماع الزائف/ False Consensus Effect؟
- العزلة الفكرية: عن أي أفكار مختلفة وده بيعطل تطور ونضج دماغك.. لأنك بتتعامل بس مع اللي بيدعموا كلامك
- صدمة الاختلافات: الانفصال عن الواقع ده بيخلي الحوار الحقيقي صعب لأنك هتكون بتدور على أي كلمة من اللي قدامك تسمعها عشان ترضيك وخلاص بتأييد كلامك
طب تحمي نفسك إزاي من الإجماع الزائف ده؟
- دور على الاختلاف: تابع ناس مختلفين عنك في الرأي والمعتقدات وماتحبسش نفسك بين أفكارك انت بس
- اسأل على طول: هل ده رأيك فعلًا انت لوحدك؟ ولا الناس متفقين معاك بشكل حقيقي فيه وانت مش موهوم؟
- حاول تفهم أفكار ومشاعر الناس اللي مختلفين عنك في الرأي.. وده لأن أفكارهم بتتكون من كل تجربة مختلفة عدوا بيها
- اهتم بالـ Feedback: وخلي دايرة الجمهور اللي بتاخده منهم أكبر وأوسع.. عشان تعرف تاخد تقييم حقيقي من ناس مختلفين
وخليك فاكر إن صوابعك مش زي بعضها ولولا اختلاف الأذواق لبارت السلع فاسمع للي حواليك يمكن حتى تتعلم حاجات جديدة منهم
