لو عايش لوحدك.. دي شوية أكلات سهلة تعملها في رمضان

لو انت عايش لوحدك أو مغترب.. عارفين إن بطنك وجيبك وجعوك بسبب أكل الشارع فعشان كده جمعنالك شوية أكلات سهلة وسريعة تشبعك وتسد معاك في فطار رمضان!

• صينية بطاطس بالفراخ

هتقشر بطاطساية كبيرة (أو 2 صغيرين) وقطعها حلقات.. وقطع بصلاية وفلفلاية صغيرين حلقات برضه.

 

حط كل ده في صينية مع شوية زيت ورشة من: الملح والفلفل الاسود والبابريكا وبهارات الفراخ وقلبهم كويس بإيدك.. بعد ما تغسلها طبعًا.

 

شايف بقى البهارات دي؟ حط رشة تانية منهم على معلقة صغيرة زيت وادهن بيهم الفراخ من كل ناحية وحطها فوق البطاطس.

 

غطي الكلام ده كله بنص كوباية شوربة أو صلصة طماطم (طماطم في الخلاط مع حبة ماية ورشة ملح وفلفل).. لو مفيش يبقى نص كوباية ماية مع مكعب مرقة هيقضى الغرض.

دخلها بقى فرن سخن على 180 من 30 لـ 40 دقيقة أو لحد ما تستوي.

 

 

• كشري إسكندراني

هتحتاج كوباية رز أبيض ونص كوباية عدس أصفر.. وطبعًا إغسلهم كويس.

 

حطهم سوا في حلة واحدة مع كوباية ونص ماية وشوية ملح (بس ماتزودش).. أول ما يبدأ يغلي وطي النار وغطيه وسيبه ربع ساعة كده لحد ما يستوي.

 

وهو بيستوي بقى.. في طاسة برا شوح نص بصلاية صغيرة مع فص ثوم في ملعقة صغيرة زيت لحد ما يدبلوا.. وإنزل عليهم بعصير الطماطم أو بمعجون الطماطم الجاهزة.. اللي عندك إستخدمه.. مع رشة ملح وفلفل وكمون.. وسيبها تغلي وتتقل لحد ما تتسبك.

 

• بانية ومكرونة

الأكلة الرسمية بقى.. تبل البانية بملح وفلفل إسود وبابريكا وتوم وبصل بودرة ولو عندك بهارات فراخ يبقي أحلي وأحلي.. وإرميها في التلاجة دلوقتي.

 

لما تيجي من التلاجة.. إسلق المكرونة في ماية مغلية ورشة ملح.. وماتنساش تقلبها كل شوية عشان ماتلزقش في بعضها.. وماتحطش زيت.

 

في طاسة برا حط معلقتين زيت.. مع فص توم ونص بلاصية مبشورة لحد ما يبقي لونهم دهبي.. بعدها حط عصير الطماطم ومعلقة من معجون الطماطم الجاهزة ولو حسيته تِقل زود “سنتوفة” ماية.

 

بهاراتك بقى: ملح وفلفل إسود وكمون.. ورشة السكر عشان الحموضة ها.

بعد ما تتسبك وتتقل.. إنزل عليهم بالمكرونة المسلوقة.

 

خرج البانية من التلاجة وحطه في البيض “مع رشة الفلفل الاسود عشان الزفارة” ومن البيض للبقسماط للزيت المغلي.. وإقليه على نار متوسطة.

 

 

• كباب حلة

قطع اللحمة مكعبات صغيرة.. حطها في حلة فيها شوية زبدة/زيت سخن وإديها تشويحة 5 دقايق كده.

 

عايزين بصل (بصلتين كبار أو زود براحتك.. كباب الحلة بيحب البصل).. قطعه جوانح وقلب لحد ما يدبل وياخد لون مع اللحمة.. زود بقى فلفل إسود ورشة كمون وبهارات لحمة.. ولو عندك ورق لورا وحبهان حط مايهمكش.

 

سيب الملح للأخر عشان اللحمة تستوي.. زود فلفلاية وطماطماية متقطعين وسيب الخضار يدبل شوية.

 

حط كوباية ماية مغلية وإستنى لحد ما اللحمة تستوي وزود الملح.. كُلها مع رز أبيض أو عيش.

 

 

• كبدة إسكندراني

هات طبق صغير وحط فيه: ملعقة كبيرة ثوم مفروم.. بهارات مشكلة..رشة ملح..كزبرة ناشفة.. شطة (لو حابب).. كمون و معلقة خل.

 

في طاسة على النار.. حط معلقتين زيت وإنزل بالكبدة ولما لونها يتغير.. حط مكونات الطبق اللي جهزناه برا ده وقلب كويس.

 

زود نص لمونة وفلفل حراق متقطع لو بتحبه مشطشط.. الكبدة مش بتاخد وقت في السوا يعني مجرد ما لونها يتغير بتبقي تمام.

 

 

• فاهيتا 

لو عايز ساندوتشات في السريع.. يبقي قطع صدور الفراخ شرايح رفيعة وتبلها بملح وفلفل وكمون وبابريكا.. توم بودرة وعصير الليمون وشوية زيت. 

 

في طاسة فيها معلقين زيت سخن وعلى نار متوسطة.. حط بصلاية وفلفلاية (الالوان اللي تعبجك بقى) متقطعين شرايح وقلبهم 10 دقايق وإنزل بعد كده بالفراخ اللي تبلناها تاخد صدمة وقلبها مع الخضار.. لو عايز دلع زيادة زود جبنة موتزاريلا أو شيدر وعلى العيش وشوية مخلل ياااه.

• مكرونة باللحمة المفرومة

في طاسة فيها معلقة زيت.. حط اللحمة المفرومة تاخد صدمة.. وزود بصل متقطع مكعبات صغيرة أو مبشور وفص توم مفروم.

 

ماتنساش ملح وفلفل وبابريكا وبهارات اللحمة ولو عندك رشة قرفة يبقي كتر خيرك.

 

إنزل بعصير الطماطم وسيبيها تستوي من 10 دقايق لربع ساعة.

 

في حلة إسلق المكرونة ومعاها رشة ملح.. وضيف المكرونة المسلوقة لللحمة اللي عملناها.

 

• حواوشي

دي بقى مش محتاجة.. لحمة مفرومة عليها بصلاية مبشورة وفص توم مهروس مع ملح وفلفل ورشة كمون وشوية بهارات زي ماتحب.. واعجنهم كويس لحد ما كله يمسك في بعضه.

 

في رغيف عيش بلدي حلو كده.. حط اللحمة واضغط عليها بإيدك وإدهنه من برا برشة زيت.. وفي طاسة كبيرة على نار متوسطة وقلبه على الناحيتين كل شوية لحد ما يستوي من جوا ويقرمش من برا.

• بسلة بالجزر 

سخن معلقة زيت في حلة وزود بصلاية مبشورة وبعد ما لونها يبقى دهبي إنزل بالبسلة والجزر المجمدين (ايوه اللي في السوبر ماركت دول)

 

بعد ما يدبلوا شوية حط عصير الطماطم مع شوية ملح وفلفل اسود ورشة السكر وكوباية ماية.. لحد ما يتقل والبسلة والجزر يستوا.

 

ممكن تعمل كده في أي نوع خضار جاهز من برا (فاصوليا.. لوبيا.. اللي تحبه) وممكن تاكلة مع رز أبيض أو رز بشعرية.

 

• مبكبكة بالسجق/ باللحمة

فى حلة على النار فيها ملعقتين زيت ضيف السجق المتقطع وقلب فيه لحد ما ياخد لون حلو.

 

زود بصلاية وفص توم مفرومين وفلفل أسود وقلب دقيقتين.. وإنزل عليهم بالفلفل الحراق.

بعد كده إنزل بالشوربة وعصير الطماطم ونص معلقة كمون وكزبرة ناشفة ورشة السكر المعتادة.. وأول ما يغلوا زود المكرونة ولما تغلي تاني.. هدي النار وسيبها تستوي.

 

بعد ربعاية كده هتكون إستوت.. سيبها ترتاح 5 دقايق قبل الأكل.

 

طبعًا ماتنساش تدلع نفسك بقى جنب الحاجات دي.. شوية مخلل.. بطاطس محمرة.. بتنجان مقلي.. طحينة.. خيار وطماطم متقطعين كده.

 

وكل سنة وانت طيب.. وبألف هنا وشفا.