لو لما بتضايق أو بتقلق بتروح تروق وتنضف.. فانت محتاج تقرأ الموضوع ده!

تبقى قاعد كده في أمان الله تلاقي شوية أفكار عملوا رباطية عليك وهاتك يا عجن ومش عارف تسيطر على القلق اللي بتحسه.. تسكتلهم انت بقى؟ ودي تيجي برضه لازم توريهم العين الحمرا وتبان إنك مسيطر.. فحيث كده تقوم واخد الجروف والمقشة وجايب الأوضة من فوقها لتحتها ترويق وتنضيف لدرجة إنك بتلاقي مذكراتك اللي كاتبها في إعدادي.. وهنا هنقولك أسباب علمية بتخليق تقوم تنضف وتروق لما بتقلق أو تضايق

1- الإحساس بالسيطرة والتحكم (Control Restoration Theory)

لما بتقابل مشكلة أو بتحس بشوية قلق ومابتكونش عارف تتحكم في الحاجات دي بتحس إنك فقدت السيطرة على حياتك وإنك في الشلاحات.. فبتحتاج تحس إنك جامد ومفيش حد قدك وكله تحت الكونترول فتمسك أوضتك تروقها.. فلما تحس إنك رتبت الفوضى اللي برا بيتهيألك إنك رتبت الفوضى اللي جوه دماغك.. وده حسب دراسة انتشرت سنة 2010 في مجلة Personality and Social Psychology Bulletin اللي قالت إن مستويات القلق قلت عند الأشخاص اللي نضفوا حواليهم وقت قلقهم وده عشان إحساسهم باستعادة السيطرة والتحكم

2- الإلهاء الإيجابي (Positive Distraction)

لما بتركز إنك تعمل أي نشاط ملموس زي الترويق مثلًا.. انتباهك بيروح من مصادر القلق لتاسكات بسيطة وصغيرة قادر تنجزها وده هيحسسك براحة نفسية مؤقتة.. وعلم النفس المعرفي بيسمي سلوكك ده بـ “ممارسة التأمل الواعي” اللي دماغك بتركز فيه على اللحظة اللي انت عايشها وبس 

3- الارتباط بالذاكرة العضلية

فيه حاجة اسمها الذاكرة العضلية/ Muscle Memory ودي اللي بنستخدمها لما بنعمل أي تاسك روتيني جسمنا ومخنا متبرمج عليه زي الترتيب والترويق مثلًا.. ومابيحتاجش تركيز أو تفكير منك كتير وده عشان الجسم بيعمله بشكل تلقائي وده بيدي فرصة للدماغ إنها تسترخي وترتاح من الجهد والتعب فبيقل القلق جوانا.. عشان حسب علم الأعصاب الحركي إن تكرار الحركات البسيطة بيقلل هرمون القلق اللي هو الكورتيزون 

4- غريزة البقاء والإنسان البدائي 

زمان أوي الإنسان البدائي كان بيحس إن فرص نجاته هتزيد لو رتب البيئة اللي حواليه زي إنه يجيب أكل وفواكه ويرتبها في مكان قريب منه أو إنه يخزن خشب مسنن حواليه حتى لو مش محتاجه دلوقتي.. وانت على فكرة بتعمل زيه كده وقت الامتحانات يعني تسيب كتبك وملازمك مفتوحين وتقول مش هقدر ابدأ غير بكوباية الشاي حتى لو مابتحبهوش أو تقول مابعرفش أذاكر غير لما أدي الأوضة فُمين رغم إن مامتك بتتحايل عليك تروق سريرك لما تصحى.. المهم إن ده بقى رد فعل تلقائي منك تجاه القلق والتوتر عشان الدماغ بيربط الكركبة بالخطر

5- الرمزية النفسية (Psychological Symbolism)

مخك ده يا حول الله في منتهى الغُلب فاكر إنه لو نضف الكركبة اللي بره يبقى كأنه نضف الكركبة اللي جوه ومابقاش عاوز حاجة من الدنيا.. هو من سذاجته شبه الكركبة اللي جواه بكركبة الأوضة وده اللي بيخليك تحس بالاسترخاء لما تروق أوضتك وانت مضايق

6- الدوبامين والمكافأة

الواحد لما بيعمل أي حاجة صح بيكون مستني شكرًا أو ميرسي أهو أي تقدير.. وعقلك كده كمان لما بيحس إنه أنجز حاجة يقوم فارز شوية دوبامين يحسسك بالراحة والرضا.. فلما تروق أوضتك مخك بيديك نجمة وعشرة من عشرة ويخليك تهدى

وفي الآخر يا عمنا مش مهم بتروق أوضتك عشان قلقان المهم إنك بتروقها أهو وخلاص وبتسمع كلام الست الوالدة اللي لسانها نشف عشان بس تروق سريرك!