لو ماتعرفش أي حاجة عنه.. إزاي تبدأ استثمار في فلوسك وتحافظ على قيمتها؟

الفلوس تحت البلاطة قيمتها بتقل يوم بعد يوم.. ومع الوقت بتلاقي اللي كان ممكن تشتريه بيهم من سنة أغلى ويادوب اللي معاك تكمل عليه وتشتري ساندويتش.. 

وده اللي قالت زيه الكاتبة “كالبانا فيتزباتريك” في كتابها “Invest Now: The Simple Guide to Boosting Your Finances” إنك لو كنت استثمرت “1000” جنيه استرليني سنة 1999 كان هيبقى النهاردة “3300” جنيه استرليني.. وده اللي هيحفظ القوة الشرائية للفلوس حتى مع حساب أسعار التضخم..

وهنا يظهر الفرق بين الادخار والاستثمار زي ما وصفه “روب مورجان” كبير مسؤولي الاستثمار في شركة تشارلز ستانلي واللي بتقدم استشارات ونصايح مالية إن “الادخار من أجل الاستقرار والاستثمار من أجل النمو.. الهدف من الادخار هو بناء احتياطي.. إما لحالات الطوارئ أو للإنفاق المخطط له”

ودي نقطة مهمة نبدأ منها الحاجات اللي انت محتاج تركز عليها وانت بتستثمر فلوسك.. انت مش بتستثمر عشان دلوقتي.. انت بتستثمر عشان بكرة.. عشان فلوسك تكبر على المدى الطويل.. 

كمان محتاج تعرف حاجتين مهمين تاني قبل ما تحط فلوسك في أي سهم:

1- تكون مغطي احتياجاتك المعيشية لمدة 3-6 شهور.. وده اللي قاله “برينس دايكس” مؤسس مجموعة رويال فاينانشال للاستثمار إنك ماتستثمرش أبدًا بفلوس ممكن تحتاجها على المدى القصير

2- حدد أهدافك من الاستثمار.. يعني انت بتستثمر ليه؟ عندك حاجة عايز تحققها؟ عايز فلوس أكتر بعد فترة؟ ولا ببساطة عايز تحفظ قيمة فلوسك؟
لما تحدد هتقدر تحط إطار زمني لاستثمارك ومقدار مخاطرة تقدر تتحمله عشان الهدف اللي عايز توصله 

بعد ما تحدد هدفك وتشوف هتقدر تستحمل لحد فين.. تقدر تبدأ.. بس موقع “Investopedia” عنده كام نصيحة كمان ليك هتساعدك في البداية حاول تخلي بالك منهم

1- اعرف ايه اللي ناجح في السوق واستثمر فيه.. وده تقدر تعرفه من خلال متابعة حالة الأسهم.. خد كورسات واعرف أكتر عن طرق الاستثمار الناجحة.. لإن الاستثمار علم وفيه معلومات كتير لازم تفضل مطلع عليها 

2- اعرف نفسك وبناء عليها حدد استراتيجية استثمارك.. لإن كل شخص فينا له نمط سلوكي وطريقة تفكير بياخد القرارات بناء عليها.. وفي نموذج اسمه “BB&K” بيقسم المستثمرين لـ “5” مجموعات:

فيهم اللي بيستثمر بشكل فردي وواثق في نفسه وفيهم المغامر وفيهم اللي بيحب الترندات وفيهم المحافظ اللي بيحب يمشي جنب الحيط.. لازم تحدد انت مين ومحدش هيعرف يعمل ده أحسن منك

3- اعرف أصدقائك من أعداءك.. الاستثمار والسوق مصالح.. والمصالح ساعات بتتقاطع مع بعض.. فحاول ماتثقش أوي فاللي بيتظاهر إنه صاحبك وعايز يعرف استراتيجيتك وهدفك واللي هتختاره.. ببساطة ممكن ينصحك بحاجة تضرك 

4- حدد استراتيجيتك.. في ناس بتقولك ماتحطش البيض كله في سلة واحدة.. ودي جملة مشهورة في الاستثمار ومعناها ببساطة انك توزع استثماراتك في مجالات مختلفة.. وفي اللي هيقولك حط البيض في سلة واحدة بس راقبه كويس.. وفي اللي هيقولك مكس الاتنين واطلع بنظام تالت خالص وظبط سلتك على مزاجك.. المهم انت بقى هتعمل إيه؟

5- اعمل الاستراتيجية للمدى الطويل.. وحاول تلتزم بالاستراتيجية دي أكبر وقت ممكن وماتخليش حد يأثر على قراراتك وابعد عن العواطف.. الفلوس مافيهاش ياما ارحميني

6- حاول برضو تخليك مرن.. يعني الاستراتيجية مش مقدسة.. لو لقيت السوق اللي انت فيه رايح في داهية خلاص والمركب بتغرق نط عادي وجرب حاجة جديدة.. دايمًا في فرصة للتعلم من الأخطاء فا لازم تتقبل وتتعلم لحد ما تقف على أرض صلبة

وطبعًا مش عايزين ننسى نفكرك إن دي مجرد مقالة بتشجعك تعمل حاجة أحسن بس هي مش خريطة تمشي عليها ولو عندك فرصة تسأل مستشار مالي خاص وتبني خطتك معاه يا حبذا وده هيكون أحسن في كل الأحوال.