لو ما انجزتش حاجة من بداية السنة وعايز تعوض في آخر كام شهر.. اعرف إيه هي قاعدة الـ 90/90/1؟
في بداية السنة كتبت أهداف كتير وقعدت تعمل vision board أو ليست بالأهداف.. ودلوقتي خلاص داخلين على الربع الأخير من السنة.. فلو حاسس إن السنة عدت هوا وماحققتش أي حاجة من من اللي كتبتها.. انت محتاج تكمل قراءة عشان هنقولك طريقة تساعدك تحقق اللي كنت مخطط ليه في الكام شهر اللي فاضلين دول.
إيه هي قاعدة 90/90/1؟
حسب موقع VeryWell mind ده مفهوم طوره كاتب كندي اسمه “روبن شارما” في كتاب “The 5 AM Club”.. وشرح إن طريقتها:
- 90 يوم: تلتزم بروتين محدد خلال 3 شهور .. ودي فترة ولا هي طويلة ولا برضه قصيرة لكنها فترة كفاية أوي إنك تشوف منها نتائج حقيقية
- 90 دقيقة: خصص أول ساعة ونص من يومك للروتين الجديد.. وده عشان طاقتك وتركيزك بيكون عالي أوي في بداية اليوم.. وماعندكش تاسكات كتير ولا حاجة تشتتك فبيبقى عندك وقت مناسب تشتغل فيه على أهدافك
- هدف واحد: بدل ما تتوه وسط أفكار وأحلام كتيرة.. رتب أولوياتك وركز على أهم حاجة وحط قدامك هدف واحد تديله كل تركيزك خلال فترة الـ 90 دقيقة بتاعة الـ 90 يوم
طب إزاي تطبق القاعدة دي؟
- مدربة إدارة الوقت والإنتاجية “أليكسيس هاسلبرجر” بتقول إن الـ 90 دقيقة ماتستغلهاش في تحقيق الهدف اللي حددته بس.. لكن كمان اعمل فيه أي تاسك مرتبط بالهدف ده.. فمثلًا لو خصصتها لكتابة كتاب معين.. فتقدر تقعد الـ 90 دقيقة تعمل سيرش عن موضوع الكتاب أو تفكر في اقتراحات تخلي الكتاب مميز
- خلي معاك أدوات تشجعك وتساعدك: “هاريسون” بتقول سجل خطتك في الـ calendar واظبط منبه لمدة 90 دقيقة ونزل مثلًا أبلكيشن يفكرك بالتاسكات اللي وراك
- خليك مع الصحبة الكويسة: مامتك لما بتقولك “الصاحب ساحب” عندها حق.. وده عشان لما تشتغل مع صحاب كويسة تشجعهم ويشجعوك وتقعدوا سوا تعملوا تاسكات مختلفة هتتحفز وتنجز أسرع.. ويا عم لو مقتنع إن الرحلة فردية وعايز تبقى لوحدك فتقدر تكتب إنجاز كل يوم في كشكول زي ما “هاريسون” بتقول
- استغل آخر دقايق من الـ 90 دقيقة: واكتب تاسكات اليوم اللي بعده
- ركز على الإيجابيات: بدل ما تفكر في اللي ماتحققش.. دور على نص الكوباية المليان زي الخبرة اللي خدتها من التجارب دي وإزاي هتساعدك في اللي جاي
- خليك مرن: الأحسن طبعًا زي ما قولنا إنك تبتدي في أول اليوم.. لكن أوقات الدنيا مابتظبطش فلو ده حصل.. خليك مرن وممكن تعمل ده في أي وقت في اليوم بس المهم إنك تعمله.. كل الدراسات بتقول إن العادات المرنة بتكون العادات الثابتة مع الوقت
- ابعد عن المشتتات: خلي المكان اللي بتشتغل فيه هادي عشان ماحدش يقاطعك.. ووقف إشعارات الموبايل أو حتى اقفله خالص
- خليك لذيذ مع نفسك: يعني مش لازم تضغط نفسك بالمثالية وتهاون مع نفسك.. يعني لو ماقدرتش تخصص 90 دقيقة مشيها 40 دقيقة ومش هيحصل حاجة في الدنيا ومش شرط أساسي تحقق اللي في دماغك بالظبط فلو حققت نصه كتر خيرك
علم النفس بيقول إيه عن فعالية القاعدة دي؟
- القاعدة مبنية على مبادئ نفسية بتخلي نتايجها مضمونة.. زي تكوين العادات وده لأنك بتاخد وقت عشان تلتزم بروتين ثابت.. والالتزام بسلوك جديدة خاصة الصبح بيخليه السلوك عادة دايمة بكل سهولة
- ومن المبادئ النفسية التانية هي فكرة التاسك الواحد وده عشان كل ما تخلي عقلك منتبه لهدف واحد هتنجز بشكل كبير وتحققه بكوالتي كويسة كمان
- لما يتحدد لك وقت محدد تشتغل فيه على هدف بعينه بتحس إنك بتنتج جامد عكس لو زنقت نفسك في يومين هتفقد الشغف
من الآخر كده الهدف إنك تشتغل بذكاء مش بحرق والسلام “Work smart not hard” عشان فعلًا تحقق اللي نفسك فيه.. وبعد اللي قولناهولك مابقاش ليك حجة تأجل أهداف السنة دي للسنة الجاية.. عندك 3 شهور تعمل ريمونتادا وتولع الدنيا
