لو محدش بيسأل عنك.. اعرف إيه الأبلكيشن الصيني اللي بيطمن عليك لو غيبتلك يومين؟
الفترة الأخيرة انتشرت أخبار عن أبلكيشن صيني اسمه “Are you dead؟” أو “انت ميت؟” وناس كتيرة بدأوا ينزلوه ويتكلموا عنه في السوشيال ميديا.. فياترى إيه قصة الأبلكيشن ده وإيه فكرته؟
بداية الأبلكيشن
الأبلكيشن بالصيني اسمه “سيليمي – Sileme” والشركة أطلقته في شهر مايو 2025.. وصممه 3 أشخاص من مواليد ما بعد سنة 1995 وكانوا بيديروه بشكل مستقل.. بس الأيام الأخيرة الاهتمام بيه زاد والكلام عنه زاد لدرجة إن الشركة قررت إن الأبلكيشن يبقى برسوم اشتراك تتدفع عشان المستخدمين يستفيدوا منه.. وغيرت الاسم من “سيليمي” لـ “Are you dead؟” عشان يناسب الجمهور العالمي.
طب إيه فكرته؟
الأبلكيشن عبارة عن أداة أمان بسيطة مصممة للأشخاص اللي عايشين لوحدهم وبيطلب منهم تحديد جهة اتصال واحدة للطوارئ.. وفكرته بتدور حوالين إن المستخدم يدخل كل يومين يدوس على زرار بيأكد إنه لسه عايش.. بس في حالة تأخيره إنه يدوس ويرد على السؤال.. الأبلكيشن بيبدأ يكلم جهة الاتصال اللي المستخدم حددها ويكلم الطوارئ عشان يتأكدوا من سلامته وإنه ماتعرضش لأي خطر.
ليه عملوا الأبلكيشن ده؟
- صحيفة “جلوبال تايمز” الصينية الرسمية بتقول إن الصين بحلول سنة 2030 هتكون بتضم ما يصل لـ 200 أسرة مكونة من شخص واحد بس ونسبة اللي عايشين لوحدهم هتتجاوز 30% سواء موظف بيشتغل لوحده أو طالب عايش بعيد عن بيته أو شخص قرر يختار أسلوب حياة منعزل
- مستخدم من مستخدمين الأبلكيشن قال إن الناس اللي بيعيشوا لوحدهم في أي مرحلة من مراحل حياتهم والانطوائيين والعاطلين عن العمل واللي بيعانوا من الاكتئاب بيحتاجوا لونس وحد يطمن عليهم.. وخايفين يموتوا من غير ما حد يحس بيهم ويكونوا منسيين ولا يقدروا يستنجدوا بحد
انتقادات للأبلكيشن
- مجموعة من الناس شافت إن حاجة الناس لأبلكيشن زي ده ظهرت بسبب آثار التكنولوجيا السلبية والتباعد الاجتماعي
- ناس تانية شافت إن اسمه “انت ميت؟” اسم تشاؤمي أوي وبيفوِّل على الناس ويأثر على صحتهم النفسية
وفي الآخر انت إيه رأيك هل التكنولوجيا فعلًا بتقربنا من بعض وبتسهل علينا حياتنا ولا بتبعدنا لدرجة تخلينا نحتاج أبلكيشن زي ده؟
