ليه أغلب الأخوات في الكورة واحد نجم.. والتاني كبش فداء؟

دايما الأخوات في أي مكان بيبقى لكل واحد فيهم مواصفات مختلفة عن التاني.. فيه الطيب واللي بيعرف يجيب حقه بأيده.. وفيه الذكي وفيه الأقل ذكاء منه بس بيكون في الأغلب أحسن منه في حاجات وبيكون عنده مهارات تانية.. بس هل بتحس إنك بتشوف الفارق ده في الكورة؟

عوامل كتير بتخلي أخ ينجح عن التاني في مجال الكورة.. مثلًا إن اللاعب ده بيكون هو الأخ الأكبر و بدأ قبل أخوه.. فالأصغر في أغلب الوقت بيحب يعمل نفس اللي بيعمله أخوه الكبير.. زي جود وجوب بيلينجهام.

الاتنين الفارق بينهم سنتين “جود 22 وجوب 24 سنة” فكانوا في الطفولة بيتشاركوا نفس الهوايات زي لعب الكورة.. وده خلى الموضوع يتشكل في شخصيتهم بأنهم عايزين يبقوا لعيبة كورة.

بس طبعًا اللي بدأ المسيرة الاحترافية الأول كان جود بيلينجهام في نادي بيريمينجهام سيتي.. وعمل أداء كبير لدرجة إن النادي قرر يمنع حد من إنه يلبس الرقم 22 بعده بسبب الأداءات اللي قدمها وإنتقاله بعدها مباشرة لبوروسيا دورتموند بمبلغ قياسي 30 مليون يورو تقريبًا.. على العكس أخوه بقى اللي اتصعد سنة 2022 وقدر يعمل أداء كبير مع بيرمينجهام وينتقل بعدها لسندرلاند وبعدها تألق مع الفريق الملقب بـ”القطط السوداء” سندرلاند وصعدوا للبريميرليج لأول مرة من 8 سنين بعد فوز مهم على شيفيلد بنهائي البلاي أوفز بنتيجة 2-1.

وبعدها جيه قرار مهم لجوب.. وهو إنه أما يكمل مع سندرلاند في البريميرليج ويفضل في فريقه ويتشاف أكتر في إنجلترا.. أو يوافق على العرض الألماني من بوروسيا دورتموند.. وفعلًا وافق على عرض بروسيا وكانت فرصة قوية له بس مقدرش يثبت نفسه ويتأقلم.. ولا حتى يتألق زي أخوه.

بيلينجهام دلوقتي في ريال مدريد و تالت أهم نجم في الفرقة بعد مبابي وفينيسوس من وجهه نظر الإعلام الرياضي وناس كتير من الجماهير.. وجوب بيلينجهام معرفش يتأقلم في فريقه الجديد دورتموند وطبعًا في مشكلة كبيرة لإنه كل يوم بيتضغط من فريقه.. وبيتقارن بأخوه وإنه لازم يبقي زيه وأحسن منه كمان.. وده بيسبب ضغط إضافي على اللاعب اللي مش عارف يتحسن ويتطور من نفسه.

وفيه أمثلة أخوات ضحوا بمسيرتهم عشان لاعيبة تظهر للنور زي ترينت ألكسندر أرنولد اللي قال في تصريحاته إنه: “اتضحى كتير من أجلي للعب كرة القدم.. وأخوه الكبير والصغير كانوا بيفوتوا ماتشات وتدريبات فرقهم عشان يتفرجوا على أخوهم بيلعب”.

وفيه أخوات كبار بدأت مسيرتهم الأول قبل أخواتهم الأصغر منهم بس مع ذلك منجحوش زي إروين كومان الأخ الأكبر لـ رونالد كومان.. اللي منجحش في إنه يلعب بره هولندا زي أخوه رونالد اللي بقى واحد من أساطير برشلونة وسجل هدف أول دوري أبطال للبرسا.

فمش دايمًا الحسبة بتقول أن الأخ الأكبر هو اللي لازم ينجح بس نجاح واحد منهم بيشكل ضغط غير مباشر على الطرف التاني سواء من أهله.. أو العلام أو حتى الأندية والأمثلة كتير أكيد افتكرت تلات أربع أمثلة بعد اللي قولناه بس المهم الهدف بقى واضح.