ليه أنفلونزا الصيف أصعب من الشتاء؟
زي ما هو معروف، إن البرد والأنفلونزا مرتبطين بالشتاء، ولكن لما بتيجي في الصيف الوضع بيختلف لإنها بتكون أصعب ومزعجة، زي المثل اللي بيقول “برد الصيف أحد من السيف”
طيب إحنا ليه بيجي لنا برد في الصيف؟ إجابة السؤال ده بيقولنا عليها موقع دويتشه فيلة نقلا عن خبراء الجمعية الطبية في ولاية بادن فورتمبيرج الألمانية:
الجسم لما يكون عرقان أو حرارته عالية وبعدين يتعرض لهواء ساقع، الأغشية المخاطية* بتجف جدا وكذلك بتضعف ومش بتقدر تحمي الجسم من أي فيروس، وبتكون النتيجة هي الإصابة بالأنفلونزا اللي شبه نزلات البرد بتاعت الشتاء بنفس الأعراض
*الأغشية المخاطية: نقدر نقول عليه بالبلدي هو درع بيحمي ممرات الجسم اللي بتتصل بالخارج زي الجهاز التنفسي والتناسلي والهضمي وبتمتلك خلايا وغدد بتفرز مخاط ولذلك اسمه الأغشية المخاطية، ودي وظيفتها حماية الجسم من البكتيريا وترطيب الجسم وده حسب موقع “اليوم السابع وموقع الطبي”
طيب ليه بنحس إن أنفلونزا الصيف أصعب من الشتاء وبتعكنن علينا؟
بحسب موقع الكونسلتو، ده بيرجع لارتفاع درجات الحرارة فا الشخص مش بيقدر يتقل في الهدوم أو يشرب مشروبات ساخنة واللي ليها دور إيجابي فعال ضد أي فيروس، طبعا مع الأدوية اللي يكتبهالك الدكتور.
طيب إزاي تقدر تحمي نفسك من إنفلونزا الصيف؟
– اتباع نظام غذائي صحي عشان يساعد الجسم على مقاومة أي فيروسات أو بكتيريا
– تجنب الاجهاد وإنك تنام وترتاح، لإن قلة الراحة ممكن تقلل كفاءة الجهاز المناعي
– الإكثار من شرب السوائل وخصوصا الباردة لمساعدة الجسم إنه يحتفظ برطوبته
– تجنب الاختلاط بالأشخاص المصابين
– ممارسة الرياضة بشكل منتظم
– غسل اليدين
