ليه إنك تخسر حيوان أليف زيه زي خسارة شخص من عيلتك؟

ناس كتير مننا بتربي حيوانات أليفة في البيت سواء قطط أو كلاب أو حتى حيوانات تانية غيرهم.. والحيوان مابيكونش مجرد كائن إنت بتربيه أو تلعب معاه بس من أجل التسلية لكن في روابط عاطفية كبيرة جدا بتكون موجودة لدرجة اعتباره فرد من أفراد العيلة وبيتعامل زيهم بالظبط ولما بنفقده بيكون شعورنا نفس شعور الحزن على خسارة شخص من العيلة أو حد من صحابك المقربين كمان!

حسب موقع psychcentral ومنظمة helpguide

ليه فقدان الحيوان الأليف محزن بشكل كبير؟

زي ما قولنا الأشخاص اللي بيربوا حيوانات أليفة بيعتبروها فرد من أسرتهم بكل الأشكال.. فهتلاقي معمول حسابه في كل حاجة سواء أكل أو شرب أو حتى النشاطات في البيت وكمان التسلية واللعب سواء عشانه أو عشانك لأن الموضوع بيكون متبادل.. بيكون له نصيب من العاطفة والمشاعر على الأغلب من الأسرة كلها حتى لو أبوك وأمك أول ناس اعترضوا على وجوده هتلاقيهم أول ناس بيحبوه ويهتموا بيه ويلعبوا معاه كمان!

على عكس العلاقات الإنسانية اللي غالبًا بتكون معقدة ومحتاجة مجهود كبير عشان بس تتفهم ومجهود أكبر عشان تتعامل هتلاقي العلاقة بالحيوانات الأليفة مميزة بإنها فيها حب وتواصل مش معقدين ومش مشروطين بحاجة.. ممكن في البداية التعامل مع الحيوان بيكون مشروط بحاجات بسيطة بس بمجرد ماتفهمه بتكون العلاقة أبسط وأسهل كتير وفيها كل المشاعر اللي موجودة بدون شروط ولا قيود 

وده اللي بيودينا لنقطة الصعوبة في الفقد وكمان الاختبار الأصعب..

الاختبار الصعب

برغم إن الفقد أو الخسارة بشكل طبيعي بيشكلوا حزن كبير إلا إنك ممكن تتحط في اختبار أصعب وبيزعل أكتر من الخسارة العادية وهو “القتل الرحيم”.. وده بيحصل لما يكون في إجبار تموت الحيوان بتاعك عشان بس ترحمه من المعاناة والألم الشديد اللي بيواجهه وده بيكون أفضل له.. بس الأسوأ ليك إنت!

في دراسة اتعملت في جامعة بنسلفانيا بتقول إن أكتر ناس كان بتتعرض لحزن شديد وبيتضايقوا بشكل كبير جدا هي الناس اللي بتتحط في الموقف ده بإنهم يوافقوا على قرار إنهاء حياة الحيوان الأليف اللي بيربوه

الناس السخيفة

بعد كل المعاناة والزعل والحزن اللي بيقابلهم الشخص سواء بموت حيوانهم الأليف بشكل طبيعي أو حتى بالموت الرحيم بيلاقوا معاناة وحاجة أسخف وهي الناس اللي بتنظر عليهم وبتستكتر عليهم الزعل.. وده بكل بساطة بيكون لأنه مش عارف ولا فاهم يعني إيه تفقد حيوان أليف ومش عارف حتى قيمة الحيوان بالنسبالك إيه واللي ممكن يضايق أكتر لو الشخص ده من دايرتك المحيطة سواء أهلك أو صحابك فا هنا مش هتعرف تتكلم مع مين عشان يفهم ويقدر الموضوع ويواسيك ويساعدك تتخطاه

إزاي تتعامل مع الموضوع 

– عشان مش كل الناس بتقدر وتفهم إزاي الموضوع محزن فا حاول تنقي الشخص اللي بتشاركه حزنك وكمان ماتدخلش في جدال مع حد شايف الموضوع بسيط 

– ممكن تفكر لو حصل ده بإنك تشارك مع ناس بره دايرتك.. ممكن الناس اللي مهتمة بتربية الحيوانات أو حتى اللي فقدوهم وساعتها هتلاقي الاهتمام والمواساة المطلوبين

– بما إنك بتعمل اللي عليك تجاه الحيوان اللي بتربيه افتكر دايمًا إنه بيقدر ويحس بكل الحاجات اللي بتعملها تجاهه وكل الحب اللي اديتهوله وده ممكن يخفف شعورك بإحساس إنك قصرت أو في حاجات ناقصة ماعملتهاش 

– بالنسبة للناس الكبيرة في السن عشان الموضوع مختلف شوية فا ممكن تعالج ده بإنك تحافظ على تواصلك بأصدقائك وممكن تشوف مصدر تاني تشغل فيه وقتك لو في هواية معينة أو حاجة تقدر تتطوع فيها أو مساعدة صحابك والخطوة الأخيرة نظرا لصعوبتها إنك تجيب حيوان أليف تاني

– الأطفال كمان ممكن تكون دي أول تجربة موت يشوفوها ودي تبقى فرصة تعلمه إزاي يتعامل مع الحدث ده وتأثير الحزن بتاعه وخصوصًا إنهم ممكن يكونوا مرتبطين بيهم أكتر من ناس تانية في حياتهم.. فا أول حاجة خليه يشوفك وإنت بتعبر عن حزنك عن الحيوان وتاني حاجة طمنه بإنه مش مسؤول عن ده وفي أسئلة كتير حاول تناقشه وترد عليه فيها وتالت حاجة إشركه في عملية الموت خصوصًا لو كان “قتل رحيم” وحاجة مضطرين نعملها وعملناها ليه وإن ده مناسب للحيوان وأخيرًا قرار إنك تجيبله حيوان بديل حاول ما تلجألوش لأن تأثيره بيكون صعب على الطفل وبيحس إنه مش لويال للحيوان اللي خسره

وفي النهاية الأكيد إنك لو ماقدرتش تتعامل بشكل فردي أو حتى بعد مشاركتك لكل الناس اللي تقدر تشاركهم وماوصلتش لحل وفضلت متأثر.. حاول إنك تتواصل أو تروح لحد متخصص يساعدك على تخطي الموضوع ده