ليه الأطفال عايزين يبقوا كبار والكبار عايزين يبقوا أطفال؟
في البداية يعني إيه شخص كبير؟ هل هو الشخص اللي بيكون أكبر منك في السن بغض النظر انت سنك كام.. ولا هو الشخص اللي بيتخطى سن المراهقة ويبقى في سن النضج يعني بعد الـ18 أو حسب تعريف كل مكان لسن المراهقة.. ولا هو الشخص اللي عنده خبرة أكتر منك في الحياة ولا هو الشخص اللي بينك وبينه صلة قرابة زي أخوك الكبير أو باباك أو مامتك؟
حسب مقالة على موقع BBC الأطفال في الفترة دي بيتعاملوا ويتعرضوا لحاجات كتير وده بيخليهم عايشين سن أكبر من سنهم.. بيتقال عليهم مصطلح KGOY أو “Kids getting older younger” بمعنى الأطفال بتكبر أكتر وهم لسه صغيرين.
ليه الناس الصغيرة عايزة تكون كبيرة؟
في أكتر من سبب يخلي الناس تحب تكون كبيرة منهم:
1- بتبقى عايز تكتشف حاجات جديده بدون قيود أو بدون ترتيب من حد تاني أكبر منك.. على الرغم إن النصائح من الكبار بتكون مهمة جداً وأغلب الوقت بتنقذك من مشكلة أو من غلط هتقع فيه ولكن بتحس إنك محتاج تكون حر وتختار وتقرر حاجات بشكل فردي بدون تعليمات من حد.. حتى لو هتغلط!
2- بتكون حابب تبدأ طريقة جديدة بتاعتك.. انت اللي اختارتها وكونتها وعايز تتعامل بيها وتشوف اللي صح فيها وتستمر عليه والغلط تبعد عنه أو تصلحه وده معناه إنك مش حابب تكون تكرار لشخص تاني قدامك أكبر منك بالفعل
3- لو انت شخص كبير هتقدر تحط جدول زمني لنفسك وترتب كل خططك حسب ما انت شايف ايه اللي مناسب ليك وايه لأ.. لكن وانت صغير بتحس إن عندك حاجات محطوطة لازم تمشي عليها حتى لو مش على هواك
4- ساعات الصغيرين بيسعوا عشان يلاقوا الاحترام اللي بياخده الناس الكبيرة.. في اهتمام واحترام دايمًا برأيهم و بقراراتهم وعلى الجانب التاني في تهميش وتقليل من الناس الصغيرة بشكل عام حتى لو بيتكلموا صح أو بيتصرفوا صح
في الآخر على الأغلب هدفك من إنك عايز تبقى كبير هو السعي للحرية في أغلب نشاطات يومك وحياتك بشكل عام
ليه الناس الكبار عايزين يكونوا صغيرين؟
هنا بداية إكتشاف إن كونك شخص كبير ده مش عبارة عن متعة الحرية في الاختيار.. لأن حرية الاختيار في الغالب بتصعب عليك القرارات اللي محتاج تاخدها.. إنك تاخد قرار أصعب من إنه يجيلك قرار جاهز وتعمله لأن الموضوع بيحتاج تفكير وتخطيط وتحمل مسؤولية القرار اللي هتعمل.. طب ليه عايزين يبقوا صغيرين؟
1- يمكن أول وأكبر سبب لده هو إنهم عايزين يفضلوا محافظين على شكلهم في سن الشباب وصحتهم والقدرة على إنهم يعملوا نشاطات كتير ويقدروا يعملوها من غير ما يتأثروا
2- المسؤولية سواء بداية إنك تشتغل ويبقى عندك روتين يومي بيخلص يومك ومابتلحقش تعمل أي نشاطات تانية زي زمان أو مافيش نفس مساحة الوقت بتاع زمان
3- إنك تبدأ تفتقد فكرة إن حد ياخد قراراتك ويجهزلك كل حاجة تخصك زي أكلك وشربك ولبسك وتحس إنك محتاج ترجع تاني لحد يشيل عنك كل حاجة
في النهاية كل واحد بيعيش عُمرة وسنه.. والمفروض يستغل كل فترة موجود فيها بأفضل شكل ممكن بإنه يتعلم من غلطاته ويحاول يعمل الصح بإستمرار لأن الحياة كل مرحلة فيها تجربة وليها سبب بتحصل عشانه.
