ليه الاتحاد الأوروبي ودول تانية حظرت مكون أساسي بيتم استخدامه في مناكير الچل؟
السلطات الصحية في الاتحاد الأوروبي أعلنت إنها حظرت مادة كيميائية اسمها TPO بتُستخدم في مناكير الچل في كل دول أوروبا وده من يوم الاتنين اللي فات بتاريخ 1 سبتمبر.. وقالوا إن المادة دي ليها آثار سلبية على الصحة وكمان سامة للبشر.. فإيه المادة دي أصلًا وعرفوا إزاي إنها سامة؟ ده اللي هنحكيهولك!
إيه مادة TPO؟
“أكسيد ثنائي فينيل فوسفين ثلاثي ميثيل بنزويل” أو المعروف بمادة “TPO” بتدخل في صناعة أي مستحضر تجميل خاصة المناكير وده لأن المادة دي بتدي لمعة للمانكير الچل وكمان بتخليه ينشف أسرع ويبقى قوي لما بيتحط تحت جهاز التجفيف اللي بيطلع أشعة فوق بنفسجية وطبعًا لونه هيفضل موجود لفترة أطول.. وعلى الرغم من الفايدة التجميلية للمادة دي لكن الخبراء اكتشفوا إن ليها مخاطر صحية كتير
عرفوا المخاطر دي إزاي؟ وليه حظروا المادة دي؟
فيه دراسات اتعملت على الحيوانات اكتشفوا منها تأثير المادة دي على الخصوبة والإنجاب.. وخبراء الصحة شافوا إنها بتعمل مشاكل صحية خطيرة على المدى الطويل زي الاضطرابات الهرمونية واشتبهوا إنها ممكن تبقى سامة كمان على البشر.. وأخصائية أمراض القدم الدكتورة “سايلي تولبول” قالت في صحيفة The Post في تصريح سابق إن الأشعة فوق البنفسجية اللي بتُستخدم في المانكير الچل بتزود الإصابة بسرطان الجلد ده غير إن ترقق وإضعاف الظفر قبل ما يتحط عليه لون الچل بيتلف الظفر وإن لما الظفر بينمو وهو محطوط عليه الچل بيسبب أمراض معروفة باسم بكتيريا Pseudomonas اللي بتخلي الظفر يتحول للون الأخضر أو الأزرق وده بيخلق مكان إن الأمراض تتكاثر فيه
تأثير المادة دي على الصحة
وأستاذ مساعد الأمراض الجلدية في كلية الطب والعلوم الصحية بجامعة جورج واشنطن “فيشال باتيل” قال لموقع Inquisitr لإن فيه حالة اسمها “كارولينا جاسكو” جالها سرطان الجلد في صباع من صوابعها لأنها كانت بتروح للصالون تحط مناكير چل مرتين أو مرة في الشهر واضطروا يتخلصوا من ظفرها كله عشان يشيلوا النسيج السرطاني
وأثبتت الدراسات إن فيه علاقة بين المواد الكيماوية السامة المعروفة باسم معطلات الغدد الصماء وبين مشكلات صحية خطيرة زي السكر والسمنة وبعض أنواع السرطان.. وحسب صحيفة Daily Mail فالخبراء بيقولوا إن ممكن تكون السبب في زيادة الإصابة بالاضطرابات التناسلية الصعبة.. وفكرة إن البلاستيك يبقى مرن ومتين أكتر بيزود خطر الإصابة بسرطان الثدي وارتبط بشكل مباشر بالتسبب في تأخير النمو عند الأطفال اللي بيتعرضوا ليه وهما في رحم الأم.. واستخدام المواد الكيماوية في منتجات التجميل بيخليها تتسرب من خلال الجلد وتعطل إنتاج الجسم للهرمونات الطبيعية زي الإستروجين وده بيزود خطر الإصابة بسرطان الثدي ومشاكل الخصوبة
طب إيه تفاصيل حظر المادة؟
حسب صحيفة إندبندنت البريطانية الاتحاد الأوروبي وصف مادة الـ “TPO” إنها مسرطنة وسامة للجهاز التناسلي.. وهيتم حظر بيع وتسويق المادة أو استخدام أي منتج موجودة فيه بشكل كامل.. وألزموا الصالونات والشركات تتخلص من المخزون اللي عندهم من غير أي استثناءات أو مهلة زمنية لبيع المنتجات.. لكن قرار الحظر مستبعد من استخدام المادة في حشوات الأسنان.. وأصلًا قبل قرار الاتحاد الأوروبي بحظرها كانوا بيستخدموها بتركيز معين أقصى حاجة ليه بنسبة 5% والاستخدام المهني بس
حظر مانكير الچل في دول عربية
الأردن: المؤسسة العامة للغذاء والدواء أعلنت عن سحب كل مستحضرات مناكير الچل من كل الأسواق في الأردن ومنعت تداوله أو استيراده بشكل فوري.. وتعليق تسجيل أي منتجات جديدة شبهها
المغرب: الوكالة المغربية للأدوية والمنتجات الصحية أعلنت منع تصنيع وتسويق واستيراد واستخدام منتجات التجميل اللي فيها مادة TPO ووجهت مذكرة للعاملين في قطاع الصحة والتجميل وكمان المستهلكين بتأكد فيها على حظر استخدام المانكير الچل اللي فيها مادة TPO
إمتى صدر قرار الحظر لأول مرة؟
صنف الاتحاد الأوروبي مادة TPO إنها مادة سامة للتكاثر بموجب القانون الكيميائي سنة 2023.. وبعد كده اضافت لقائمة المواد المحظورة في 18 يوليو اللي فات فقرار حظر المادة متاخد من بدري وبلغوا بيه كل الصالونات والشركات لكن هما بيتحججوا بإن تاريخ الحظر اللي الاتحاد الأوروبي محدده_ اللي هو 1 سبتمبر الحالي _ مش كفاية ليهم إنهم يقدروا يستبدلوا مخزونهم بمخزون تاني مافيهوش مادة TPO.. وعلى الرغم من قرار الحظر لكن المادة متاحة للبيع في بريطانيا وأمريكا لكن خبراء الصناعة متوقعين تطبيق حظر مشابه في بريطانيا مع نهاية سنة 2026.. وفيه أخصائية أمراض جلدية اسمها الدكتورة هانا كوبلنات قالت لموقع Wellness Pulse إن حظر الاتحاد الأوروبي للمادة دي من باب الحذر وده عشان لحد دلوقتي مفيش دراسات بشرية واسعة اثبتت ضررها وإن دي خطوة احترازية أكتر من إنها استجابة لأدلة بشرية قوية من وجهة نظرها كدكتورة
هي دي أول مادة تتحظر؟
على الرغم إن مش كل مناكير الچل فيه مادة الـ Tpo بس فيه كتير أوي منها موجود فيها.. ودي مش أول مرة الاتحاد الأوروبي يحظر مواد كيميائية غير قانونية في أمريكا فقبل كده حظر مواد كتير منها مادة اسمها “BHA” ودي كانت بتستخدم في المنتجات اللي بتشيل تراكم الجلد الميت
وبكده بعد اللي عرفتيه عن أضرار المناكير الچل هتروحي تعمليه برضه لما تتضايقي شوية ولا هتخليكي في تغيير لون شعرك أضمن؟
