ليه البنت حبيبة أبوها؟
البنت حبيبة أبوها.. جملة كبرنا عليها وعيشناها.. إن البنت هي الأقرب للأب ونقطة ضعفه وعلى مدار السنين علم النفس كان بيحلل سبب تعلق الأب والبنت ببعض.. و دي يعض من الأسباب:
1- الشعور بالأمان
الست بطبيعتها دايما بتدور على الأمان.. وأول مصدر للأمان في حياة أي بنت هيبقى أبوها وبالتالي بيزيد تعلقها بيه لأنه بيمثل مصدر للأمان في حياتها
2- قدرة البنت على التعبير
عادة الستات بيبقوا أفضل في القدرة على التعبير عن المشاعر.. وده اللي بيخليها ممكن تعبر عن الحب والامتنان لابوها اكتر من الولد من خلال الكلام والأفعال.. وده بيخلي الأب بيحس بالحب والحنان من بنته فبيتعلق بيها أكتر
3-Opposite Attract
ودي قاعدة فيزيائية معروفة بس كمان بتتطبق في علاقاتنا الإنسانية.. إن المتضادين بينجذبوا لبعض.. وأثبتتها استطلاعات رأي كتير اتعملت على آباء وأمهات في أكثر من بلد في موقع parents .com وكانت النتيجة أن 55% من الأمهات قالو إنه من الأسهل الاندماج مع الولاد عن البنات.. وإن الآباء يفضلون تربية الإناث عن الذكور.. من خلال تجربتهم مع أطفالهم
4-البنات مطيعة أكتر
عادة البنت بتكون مطيعة وأقل حدة وصدامية من الولد وده بيدي شعور للأب بإن التعامل معها أسهل وده بيرضي غرور الأب ويخليه متعلق بيها.
5- مفيش تنافس بينهم
في مرحلة معينة ممكن البنت تشوف أمها على إنها منافسة ليها وبيكون فيه مقارنات، وده بيخليها تصطدم بيها و تنتقد تصرفاتها وده بيخلق نوع من التوتر في العلاقة.. على العكس مع الأب مفيش اي مجال للمقارنة فبالتالي الرابط العاطفي بينهم بيبقى أقوى، ووجوده جمبها ودعمه ليها بيساعد في زيادة ثقتها في نفسها.
6-نظرية الارتباط أو التعلق
أسس النظرية دي “جون بولبي” طبيب علم النفس الإنجليزي واللي تخصص في علم نفس الأطفال.. النظرية بتقول إن إرتباط الشخص عاطفيا بشخص تاني بتزيد من استقراره النفسي وقدرته على مواجهة الخطر وبناء شخصيته بشكل أحسن.. الأطفال في بداية حياتهم بيكونوا مرتبطين بالأم لأنها مصدر الأكل والحب والحنان، بس مع مرور الوقت بتميل البنت للأب لأن احتياجاتها بتتطور والأب بيكون أكتر قدرة على إشباعها.
غير كل الأسباب دي علاقة قوية وصحية بين البنت وأبوها.. هتساعدها في اختيار شريك حياتها في المستقبل.. مش هترضى بحاجة أقل من اللي تستحقها ومش هتقدم تنازلات لمجرد إن يبقى في راجل في حياتها عشان تحس بأمان.. علاقتها مع أبوها هتخليها تتعامل مع شريكها بشكل أحسن وتقدر تفهمه
وده كله بسبب أول حب ليها في الدنيا “الأب”!
