ليه التفاهة مهمة في العلاقات الصحية؟
على عكس المتوقع والسائد.. التفاهة أوقات كتير بتبقى مفيدة لينا بشكل شخصي وفي علاقاتنا كمان، سواء في البيت أو في الشغل أو مع الصحاب أو في العلاقات العاطفية.. وللأسف من وإحنا صغيرين غالبا بنبقى متبرمجين على إن الهزار والتفاهة غلط.. مع إن فيه أبحاث ودراسات كتير أثبتت إن التفاهة حاجة مهمة جدا في أي علاقة صحية.
وبشكل عام، الناس اللي بتحس إنك قريب منهم جدا هم الناس اللي بتقدر تبقى على طبيعتك معاهم وتكون تافه وتهزر قدامهم من غير أي تفكير أو حواجز.. وبعض الدراسات بتقول إن الهزار والتفاهة بتخلينا أذكى اجتماعيا، وبتقلل التوتر، وبتوازن مستوى الهرمونات في الجسم، وبتدي طاقة إيجابية أكتر
وأكيد حصل لك قبل كده إنك قابلت حد.. حتى لو ماتعرفوش كويس.. وحد فيكوا يرمي إيفيه وتلاقيكوا بتضحكوا على نفس الحاجة.. وممكن تكونوا من خلفيات مختلفة خالص بس لما تلاقي إنك بتهزر مع اللي قدامك واللي قدامك بيهزر معاك.. أو بتضحكوا على نفس الحاجة.. أو انتوا الاتنين على نفس الدرجة من التفاهة.. فممكن تدخلوا مرحلة “إيه ده؟ إحنا تافهين زي بعض؟ انت من النهاردة صديقي”
حسب موقع Psychology Today.. اللعب والهزار والتفاهة بشكل بديهي بيسببوا سعادة وضحك لأي دايرة اجتماعية.. سواء أهل أو صحاب أو زمايل شغل.. وبيساعدوا في بناء روابط قوية في العلاقات العاطفية.
التفاهة أو الهزار للي إحنا نقصده هنا له مصطلح بالإنجليش اسمه Playfulness.. ودي كلمة معناها الحرفي شوية حاجات كده زي التفاعل مع اللي قدامك بطريقة خفيفة وهزار لذيذ والتصرف بشكل عفوي وغير متوقع.
والـ Playfulness دي مهمة جدا بشكل خاص في العلاقات العاطفية الصحية.. وبتحصل وتزيد بشكل تلقائي عن طريق الإيفيهات.. وإنكوا تفتكروا مواقف حلوة ومضحكة حصلت قبل كده وتقعدوا تضحكوا عليها.. وإن يبقى فيه نوع من الارتجال في حياتكوا.. ماتبقاش كل حاجة مخططينلها ومظبطينها.
ولو كملنا في سكة العلاقات العاطفية الصحية.. اسأل نفسك: انت وشريك حياتك بتقضوا وقت قد إيه تعملوا حاجات تافهة سوا أيا كان تفاهتها؟ ومع ضغوط الحياة والشغل طول الوقت.. هل لسه بتلاقوا وقت تضحكوا مع بعض وتهزروا وتبقوا تافهين شوية حتى لو لمجرد إنكوا تخففوا خناقة بينكم أو حوار كبير أو مشكلة حصلت؟
التفاهة عامة أو الـ Playfulness مش بيتدرس أوي في علم النفس كجزء من شخصية البالغين أو العلاقات.. بس عالم النفس “إريك إريكسون” قال إن الخيال أو القدرة على “اللعب العفوي” ليهم مكان مهم جدًا في تطور الشخصية.. والمهارة دي بتبدأ عند الأطفال في سن الحضانة لما يبدأوا يجربوا حاجات جديدة للمتعة بس.. وكل ما الطفل بيكبر.. الخيال بيفضل موجود عشان يدي مساحة للإبداع في الحياة.
وحسب دراسة من جامعة Martin Luther سنة 2021، التفاهة والهزار بتفيدك شخصيا وكمان بتأثر إيجابيًا على علاقتك الرومانسية أو العاطفية.. بمعنى إن التفاهة والهزار عند الكبار بتساعدهم يحافظوا على العلاقات الاجتماعية.. عشان بيدخلوا مشاعر إيجابية وضحك وسعادة في التفاعلات مع الناس.. وده بيقوي الروابط بينهم.. ومش معنى كده أكيد إن الحياة كلها هتبقى هزار وضحك وتفاهة.. بس اكتشاف الجانب التافه من الحياة سوا.. ده بيخفف الضغط بشكل مؤقت.. وبيخليكوا قادرين تتعاملوا مع التوترات اليومية والضغط اليومي بشكل أفضل.
طب إمتى نعرف إن التفاهة دي مفيدة فعلا وبتخلي علاقتنا بالناس صحية؟
فيه 4 مكونات كده ممكن تقيس بيهم:
1- إنها تبقى بتخفف المواقف المتوترة أو اللي فيها قلق بينكوا.. يعني لو هزرتوا مع بعض وكان فيه جزء من التفاهة.. التوتر هيقل والخناقة مش هتزيد وتكبر.
2- إنها تكون بشكل عفوي.. مش مقحمة.. ومش قاصدين تهزروا هزار تقيل.. ومش قاصدين تستخفوا بدمكوا.. هي حاجة عفوية جدا وبتحصل بشكل تلقائي
3- إنها تبقى بتساعدكوا ولو بشكل غير مباشر في التفكير في حلول للمشاكل.. لأن فيه مشاكل كبيرة جدا حلها ممكن تبقى حاجة تافهة جدا.
4- إنها تبقى بتقربك من الشخص أكتر.. وبتقوي العلاقة ما بينكوا.. وبتخليكوا عايزين تقضوا وقت أكتر سوا.. عشان انتوا مبسوطين بالوقت اللي بتقضوا سوا في تفاهة.
وفي النهاية بقى.. بعيدا عن إن الهزار بيخلي كل حاجة ألطف وأخف.. فيه فايدة تانية مهمة للتفاهة إنها بتخليك مرتاح أكتر مع نفسك.. لما تدي مساحة لحد يظهر الجزء التافه اللي جواه كأنك بتديله مساحة إنه يبقى على طبيعته.. التفاهة بتقلل الضغط اللي بنحس بيه لما يبنشوف كل حاجة جد ورسمية ومش مستاهلة.. لما تقلل التوتر والرسميات وتفتح مساحة للهزار والتفاهة، الشخصية الحقيقية اللي جواك هو اللي بتظهر.. ولما مايبقاش فيه أحكام من الناس على تفاهتك ولا خوف من كلامهم، ده بيزود الثقة في النفس وبيخلي الناس حقيقية وطبيعية أكتر.
