ليه الراجل أوقات بيبقى أحن عليكي من أمك

في الفترة الأخيرة انتشرت بوستات بتتكلم عن إن الرجالة نسبة حنيتهم بتتضاعف
لما بيكونوا عايزين يوصلوا لحاجة سواء في الشغل أو الكارير أو كمان على مستوى العلاقات.. فلو حاسة إن الراجل اللي بتتعاملي معاه أحن عليكي من أمك.. أو لو حاسس إن زميلك في الشغل اللي عايز يترقى ويوصل لمنصب بقى أحن عليكم من أمكوا في الشغل.. تعالى نقولك الأسباب اللي ورا الموضوع ده وفقًا لموقع entrepreneur  وموقع psychologytoday.

الحقيقة إن مش الراجل بس اللي ممكن يكون بيستعمل الحنية والاهتمام المبالغ فيه عشان يوصل للي عايزه الستات كمان.. البشر بطبيعتهم لما بيتحمسوا لحاجة أو بيكونوا عايزين يوصلولها نسبة شغفهم واهتمامهم بتتضاعف عشان يعملوا ده
بس للأسف أحيانًا بيستعملوا طرق بوعي أو من غير وعي بتكون سامة بس ليه أصلا بنعمل كده!؟

الاحتياج للقبول:


البشر بيحتاجوا يحسوا إنهم مهمين أو بينتموا لفئة معينة وبيحاولوا يعملوا كده من خلال إنهم يعملوا تصرفات لطيفة حتى لو معاكسة لطبيعتهم عشان من الآخر
ياخدوا الاتنشن من اللي قدامهم.. وطبعًا لأن ده غالبًا مابيبقاش جزء من شخصيتهم
بيختفي تدريجيًا أو بينعدم تمامًا لما يوصلوا للي عايزينه.

الشخص في الأساس متلاعب نفسيًا:


التلاعب النفسي مش بس بيكون في العلاقات لا كمان بيكون في الحياة الإجتماعية والمهنية وتعريفه بالظبط إن الشخص يستغل سلطته عشان يستفاد من ضحاياه سواء سلطته كشريك في العلاقة أو في الشغل كمنصب إداري أو غيره.. وغالبًا الشخص بيكون قاصد يستغل الناس اللي قدامه بإنه يوهمهم إنه هيقدملهم مكاسب وهمية لمجرد إنهم يقبلوه ويسمعوا كلامه وطبعًا لما بيوصل للي عايزه مش بيتعامل معاهم بنفس الوعود وبيتبخر.


الأنانية الدفاعية:


ودي زي ما بيقولوا بالبلدي كده الغاية تبرر الوسيلة.. يعني هنا الشخص بيحاول يحلل أي حاجة بيعملها عشان يوصل لهدف محدد
ومن ضمن الحاجات دي إنه يحوش لطفه ويستخدمه بص عشان يوصل لمصلحة وغرض معين بحجة إنه هيستهلك طاقته ليه على حاجات مش هيستفاد منها؟

الشخص عنده غباء إجتماعي:

ايوه بالظبط عكس الذكاء الإجتماعي مابيعرفش يكسب اللي حواليه أو يتعامل معاهم إزاي فبيبص في ورقة اللي جنبه يشوف الناس بيتعاملوا إزاي فيحاول يبقى ودود زيادة عشان يحبوه ولكن بتبقى علاقات مبنية عالمصلحة أو السطحية عشان يمشي دنيته وخلاص.

طيب وأنت/إنتي تعمل إيه بقى مع الناس اللي زي دي؟
هتتجاهلهم تمامًا لأنهم بيبقوا مقفوشين ومش محتاجين شرح هتلاقي سلوكهم متناقض ومهما حاولوا يبينوا العكس هيزهقوا وحقيقتهم هتظهر.. وماتدخلش في دايرة إنك تحاول تبررلهم أفعالهم وتدور ورا الأسباب وتحاول تصلحهم وتعالجهم لأن أنت اللي هتمشي بعلاج في الآخر.