ليه الرجالة بتخاف من الالتزام أكتر
أكيد كلنا سمعنا أغنية أنا بخاف من الكوميتمنت وغنناها وحبة مننا كان شايف إنها بتوصف حالته وحبة كان بيقلح بيها على ناس شاف أنهم كانوا خايفين من الكوميتمينت معاه.. يمكن الالتزام في الحياة حاجة فعلا مش سهلة وبتبقي عايزة مجهود فعلا من الشخص سواء بقى الالتزام في علاقة أو دراسة أو دايت أو رياضة أو صداقة حتى.
ولو بنلاحظ يعني هنلاقي إن الرجالة بالذات ساعات بيحسوا بخوف أو توتر لما يجي الموضوع للسيريس كوميتمنت أو الالتزام اللي بجد اللي هو بتاع الجواز والخطوبة بقى والعلاقات طويلة المدى والحاجات دي.. فدورنا ورا الموضوع ده ولقينا موقع “psychology today” اتكلم عن الموضوع ده في واحد من مقالاته وقال 8 اسباب بتخلي الرجالة يهربوا من الالتزام في العلاقات ويحسوا إنهم مش جاهزين دلوقتي:
1- الخوف من الرفض
الراجل اللي عنده خوف من الرفض دايمًا متوتر من فكرة إن الست ممكن تفقد اهتمامها به فجأة وتسيبه، عشان كده بيبقى صعب عليه إنه يتكلم بصراحة أو يواجه المشاكل خصوصا لما تحصل خلافات في العلاقة فبدل ما يعبر عن نفسه بيكمل ساكت ويبعد وبيحب يتعامل مع المواضيع الصعبة من بعيد لبعيد زي إنه يبعث رسالة بدل ما يتكلم وش لوش ولو التوتر زاد، ممكن يقرر يسيب العلاقة بطريقة سلبية بدل ما يواجه شريكة حياته وأكبر حاجة بتخوفه هو الرفض، لأنه بالنسبة له إحساس مؤلم جدًا كأنه بينهار تمامًا.
علامات الخوف ده:
بيتجنب الخناق بأي شكل.
بيبعد لما يحصل خلاف، ويميل للتعامل بالنصوص بدل المواجهة المباشرة.
2- الخوف من السيطرة والخنقة:
كتير من الرجالة بيخافوا من إن الست تسيطر عليهم وتخنقهم وتضيع حريتهم وده بيرجع إنهم من صغرهم بيحاولوا يثبتوا نفسهم بعيد عن السيطرة الأبوية، خصوصًا لو أمهاتهم كانت ضاغطة عليهم.. فبالنسبة لبعض الرجالة الجواز بيمثل سجن أو قفص.
علامات الخوف ده:
بيبقى متوتر لما يتكلمي عن المستقبل.
بيحس إن العلاقة بتاخد منه حريته.
بيميل لعلاقات مش ثابتة زي الـ situationship والحاجات دي
3- الخوف من إنه مش محبوب:
في رجالة عندهم عدم ثقة في نفسهم لأنهم ما حسوش بالحب أو التقدير وهم صغيرين دايمًا بيشكوا في نفسهم وبيحسوا إنهم مش كفاية وبيبقوا معتمدين جدًا على رأي شريكتهم عشان يحسوا إنهم مقبولين.
علامات الخوف ده:
بيتجنب إنه يتكلم عن احتياجاته.
بيحس إنه أقل من شريكته.
ما يقدرش يتحمل فكرة المنافسة مع رجالة تانية.
4- الخوف من إنه مش كفاية:
أغلب الرجالة بيتوتروا من فكرة إن قيمتهم بتتقاس بإنجازاتهم سواء في الشغل، الرياضة، أو حتى العلاقات فلو حس إنه مش قادر يدي شريكته اللي تستحقه، بيبدأ ينسحب.
علامات الخوف ده:
بيميل للتفاخر بإنجازاته بشكل مبالغ فيه.
لو فشل في الشغل أو حياته، بينسحب من العلاقة.
5- الخوف إن حقيقته تتكشف:
لما الراجل يقرب أكتر من الست ممكن يخاف إنها تكتشف حقيقته لأنه ممكن يضطر يعترف بمخاوف أو مشاعر هو شايفها “غير رجولية” أو أسرار عائلية مخجلة، ده بيكون واضح أكتر لو كان أهله كانوا صعبين أو دايمًا بينتقدوه لما يعبر عن مشاعره أو يبان عليه الضعف.
الخوف ده ممكن يكون سببه إنه مكسوف من ماضيه أو عيلته زي لو كان عنده قرايب في مستشفيات نفسية أو في السجن أو حتى فقر.. ممكن تشوفي النوع ده في الأفلام، زي شخصية “دون درابر” في مسلسل “Mad Men” وهو الراجل الناجح اللي مخبي كل تفاصيل ماضيه حتى اسمه الحقيقي حياته كلها مبنية على أسرار والخوف من إن حد يعرف الحقيقة.
في العلاقات، النوع ده من الرجالة ممكن يكون ناقد جدًا لشريكته، ويدور على “عيب قاتل” فيها، لأنه مش عايز يبقى مع حد ممكن يقبله زي ما هو
علامات الخوف:
بينكر إنه محتاج دعم أو عنده مشاعر زي القلق أو الوحدة
بينتقد الآخرين بشكل مبالغ فيه
6- الخوف من الثقة في الستات
لو الراجل عنده أم متقلبة أو متسلطة، أو لو مر بتجارب سيئة مع ستات قبل كده زي الخيانة أو الاستغلال ممكن يواجه صعوبة في الثقة.. وده بيخليه يعتقد إن كل الستات مستغلات أو مؤذيين.
علامات الخوف:
بيتكلم بشكل سلبي عن أمه أو اكساته
بيحس إنه ضحية دايمًا
7- الخوف من النضج:
فيه رجالة بتحس إنها مش مستعدة تتحمل مسؤوليات الحياة زي الجواز أو العيلة والنوع ده بيهرب من أي حاجة تتطلب جدية أو التزام.
علامات الخوف:
بيتصرف زي الأطفال وبطريقة غير ناضجة
8- الخوف من إنه ياخد القرار الصح:
فيه رجالة بتخاف تاخد قرارات مهمة ودايمًا عندهم شكوك في اختياراتهم حتى لو كانت الحاجة الصح واضحة.
علامات الخوف:
بيفكر كتير زيادة عن اللزوم
دايمًا عنده شكوك في قراراته
وفي الأخر كلنا بنواجه صراعين داخليين: الرغبة إننا نندمج ونبقى واحد، والرغبة في إننا نحافظ على استقلالنا وحريتنا. لما راجل أو ست بيقعوا في الحب ويبدأوا علاقة طبيعي جدًا إن تظهر عليهم مخاوف زي فقدان الإحساس بالاستقلالية والمساحة الشخصية وإن هويتهم لوحدهم هتضيع والاهتمامات الخاصة.. الرجالة والستات بيحسوا بالمخاوف دي وده منطقي لأن وجود علاقة بيتطلب تنازلات ولازم يبقى عندك وقت للعلاقة.. فلو أنتي بنت فكري كده كام مرة حصل إنك دخلتي في علاقة مع حد ولقَيتِ نفسك مش بتلاقي وقت كافي لأصحابك البنات وهما بيزعلوا منك؟
في أي علاقة جديدة، طبيعي إن شريكك يكون عنده شوية شكوك ومخاوف زي اللي بنتكلم عنها بس اللي بيفرق هنا هو: هل المخاوف دي طبيعية ومش بتمنعه إنه يتقدّم مع الوقت في العلاقة ويقرب منك أكتر ولا عادي؟
أكيد طبعا صعب تفرقي لوحدك إذا كان الراجل ده عنده فوبيا من الالتزام خالص ولا عنده مخاوف طبيعية ومستعد يشتغل عليها.. وعشان تعرفي ركّزي إذا كان بيحاول يكون صادق مع نفسه ومستعد يتطور بيقرب منك أكتر زي إنه يعرفك على أصحابه وأهله؟ هل بيشركك في مساحته الشخصية؟ أو يقدر يتكلم معاك بصراحة عن اللي عايزه في المستقبل؟ أو يكون مستعد يعبر عن حبه ليكي؟
لو هو بيتطور في الحاجات دي، فده دليل إن مخاوفه طبيعية وممكن تتعاملي معاها، وإنه مستعد يتحرك لقدام معاكي بس لو لا اطلعي اجري أنتي اصل العمر مش بعزقه عشان تضيعيه.
