ليه الستات بتحس بالبرودة أكتر من الرجالة؟
لو شغال في مكتب وفي ستات وبنات بتشتغل معاك وفجأة حسيت بـ حر.. ماتتهورش وتقرر تشغل التكييف قبل ماتسألهم
وده لأن الستات بتحس بالبرد أكتر من الرجالة فعليًا مش مجرد دلع ولا “كياتة”.. حسب جامعة ماكجيل الكندية ففي أسباب علمية بتقولك ليه الست بتحس بالسقعة أكتر من الراجل..
أولًا.. الحرق
جسم الستات بيحرق أبطأ من جسم الراجل.. يعني بيطلّع حرارة أقل حتى وهو مرتاح
بمعنى إن الجسم بياخد الأكل يكسره كيميائيًا فيطلع منه طاقة
جزء من الطاقة دي بيتحوّل لحرارة فـيحرّر طاقة بس تحرير كيميائي مش نار.. عشان كده لما الحرق يبقى سريع يدي حرارة أكتر
ولما الحرق يبقى بطيء يدي حرارة أقل فـ يدي إحساس بالبرد
ثانيًا.. العضلات
العضلات بتولّد حرارة.. الرجالة غالبًا عندهم عضلات أكتر فبيسخنوا أسرع.. طب الدهون بقى؟ آه بتعزل شوية بس مش بتدفّي زي العضلات خالص
ثالثًا.. الجسم بيدافع عن نفسه
لما تحسي بالبرد جسمك يقول: لا.. أنا أهم حاجة عندي القلب والمخ.. فيقلل الدم اللي رايح للإيدين والرجلين.. عشان كده أول حاجة تبرد دايمًا إيدك بس ده ليه ثمن زي إن الأطراف تبقى تقيلة ومش شغالة زي الأول
رابعًا.. الهرمونات
الإستروجين عند الستات بيقلل حرارة الجسم وكمان بيخلي الدم يوصل أقل للإيدين والرجلين.. ده لإن الإستروجين بطبيعته بيقلّل شوية من درجة حرارة الجسم الأساسية وبيخلّي الجسم يصرّف الحرارة أسرع.. يعني إيه؟
يعني الجسم مش متمسك بالحرارة قوي.. فمجرد نسمة هوا أو تكييف يحس بيها على طول
طب ليه الموضوع بيزيد في أوقات معينة في الشهر؟
خلال الدورة الشهرية..مستوى الإستروجين بيطلع وينزل وطريقة الجسم في تنظيم الحرارة بتتغير معاه
في فترات معينة الست بتحس إنها سقعانة أكتر من العادي.. نفس الجو اللي كانت الست مستحملاه فجأة يبقى مش محتمل وده مش وهم ولا دلع.. ده تغير هرموني حقيقي
أما الرجالة هرمونهم الأساسي (التستوستيرون) بيشجّع على العضلات.. والعضلات بتطلع حرارة أكتر.. فالراجل يفضل لابس نص كم والست قاعدة ببلوفر وهي بتقول اشمعنا أنا!
خامسًا.. شكل الجسم نفسه
جسم الست بيفقد حرارة أسرع عشان مساحة الجلد مقارنة بالحجم أكبر.. وده في الأغلب لأن جسم الست حجمه أصغر.. ولما مساحة الجلد بالنسبة لحجم الجسم تبقى كبيرة بيحصل إيه؟
الحرارة اللي جوه الجسم بتلاقي طريق سهل تطلع منه فالجسم يبرد أسرع.. عشان كده الست بتبرد أسرع من الراجل وإيديها بتبرد قبل أي حاجة.. ويبقى نفس الجو اللي الراجل شايفه معتدل بيبقى عليها ساقع
طيب ليه بقى المكاتب دايمًا تلج؟
عشان التكييفات معمول حسابها على جسم الراجل.. وبمقاييس قديمة من الستينات أصلًا يعني مش واخدين في الاعتبار إن الستات حرقهم أقل فدرجة الحرارة اللي بتريح الراجل بتبقى ساقعة على الست
والأغرب لما درجة الحرارة تعلى شوية الستات تركز وتشتغل أحسن والرجالة يتأثروا أقل.. يعني رفع درجة التكييف كسبان من كل ناحية.. فلو إنتي سقعانة فانتي مش ضعيفة ولا بتتدلعي انتي بس جسمك شغال بنظام مختلف.. والعلم في صفك المرة دي
