ليه الستات لبعضيها؟

الستات من أكتر الكائنات الاجتماعية في العالم وبتلاقيهم بيتعرفوا على بعض بسرعة ودايمًا عندهم النية إنهم يساعدوا بعض من غير مقابل.. يعني عمرك مثلا ما هتدخل حمام نسائي إلا لو هتلاقي الستات بيدوا لبعض حاجتهم أو قاعدين يرغوا في أي موضوع.. ده غير المترو بقى ده موضوع تاني هتلاقي ستات بتتكلم في كل المواضيع وبيدعموا بعض حتى لو مش هيشوفوا بعض تاني ولا هيكونوا صحاب يمكن عشان كده في كل بلد بتتقال المقولة دي“women for women” أو بالعربي كده “الستات لبعضيها”.. طب ليه الستات لبعضيها؟

-عندهم قدرة على التعبير عن المشاعر كبيرة:
الستات كائنات حساسة أو بتميل إنها تستشعر الحاجات اللي بتحصل لوحدهم
فده بيخلي عندهم قدرة أكبر على فتح مواضيع شخصية وده بيقربهم لبعض بسهولة فممكن تلاقي ست بتحس بست تانية متضايقة وتروح تحضنها وتطبطب عليها
وده بيخلق نوع من الترابط بينهم حتى لو لمدة قصيرة.

–الذكاء العاطفي:
الستات بيتميزوا بالقدرة على التواصل بشكل فعال مع الناس اللي حواليهم وده بيخليهم يلاقوا نقاط مشتركة بينهم بسرعة يتكلموا عنها.. يعني أكيد كل ست هتلاقي موضوع تتكلم فيه مع غيرها حتى لو لون الروج اللي حطاه!


-الدعم العاطفي عندهم كبير:
جزء من شخصية الستات اللي بتأهلهم للأمومة إن دايمًا عندهم دعم عاطفي للي حواليهم وبيقدروا يسمعوا بعض كويس بشكل عاطفي وبيكون شيء فطري عندهم من غير ما يبذلوا مجهود.

-احتياجهم للدعم الإجتماعي:
عادة الستات ممكن تحس بتوتر وعدم قبول للذات فلما بيحسوا إنهم شبه بعض أو مروا بنفس التجارب ده بيخلي عندهم فرصة أكبر إنهم يتواصلوا ويكون في بينهم رابط بشكل تلقائي زي مثلا الستات اللي بيتكلموا مع بعض عن ولادهم بعد التمرين وبيشاركوا معاناتهم في التعامل معاهم.


-هرمون الأوكسيتوسين:
هرمونات الأوكسيتوسين “هرمون الترابط والحب” بيساعد الستات في التواصل وبيخلي عندهم نوع من الدعم والمشاركة.

على الرغم من الأسباب دي لكن في بعض الناس بتحس إن تواصل الستات مع بعضها بسرعة بدون سابق معرفة يعتبر شيء مش أمان وممكن يشوفوه شيء مش مريح بالنسبالهم..  لكن الستات عشان بتهتم بالتفاصيل الصغيرة ده بيخليهم يقدروا المساعدات اللي بيقدموها لبعض ويفضلوا فاكرينها وده بيخليهم أشخاص حنونة بطبعها.. وسواء اختلفت أو اتفقت مع فكرة إن الستات بتاخد على بعض بسرعة
ده جزء مهم وحقيقي من شخصيتهم واللي بيأهلهم لأدوار تانية في الحياة زي إنهم يكونوا شركاء حياة داعمين لأزواجهم أو يقدروا يلعبوا دور الأمومة مع ولادهم لأن كل المشاعر اللي عندهم دي بتخلي العالم مكان أحسن وأهدى بكتير.. يعني تخيل كده لو مفيش ستات كم الحاجات اللي مش هتبقى موجودة.. تخيلت؟.. شوفت بقى قيمة إن الستات تبقى لبعضيها!