ليه الواحد بيتعصب لرأيه أحيانًا ومش بيسمع.. وممكن يفسر الكلام على مزاجه؟
كام مرة كنت بتتناقش مع حد مختلف معاك وقفشتوا في بعض بسبب إنكم مش سامعين ولا مقتنعين غير بكلامكم وبس؟
وهل حصلتلك إنك اتعرفت على حد جديد وصداقتكم بقت قوية.. وتوقعت إنه أكيد هيخزوقك وبتخسر علاقتك بيه..بسبب وجهة نظر خبراتك القديمة.. أهو اللي انت بتعمله ده اسمه التحيز التأكيدي أو Confirmation Bias هنقولك إيه هو وإزاي ماتقعش فيه؟
إيه التحيز التأكيدي – confirmation Bias؟
حسب BBC هو من أنواع التحيز المعرفي وبتكون فيه ميال إنك تسمع الجزء اللي على هواك من المعلومة وتكنسل الباقي، والجزء اللي بتهتم بيه ده بيكون شبه أفكارك أما اللي بتتجاهله بيكون عكس معتقداتك فبتعمل مش سامع ومش شايف
ليه بيحصل بقى التحيز التأكيدي؟
حسب Forbes كلنا بنحب حد يطبل لكلامنا ويقولنا إننا صح ومابنغلطش، فبندور على أي كلام من اللي بنسمعه يأكد كلامنا عشان برضه ده بيريحنا؛ لأننا لما بنلاقي حد بيعارضنا بنحس بتهديد، وبيظهر أوي لما بتشوف بوست لرأي مختلف عنك فبتديله واحدة Unfollow وهنبسطلك الكلام ده لما نحكيلك أنواعه
إيه هي أشكاله؟
1- الاهتمام المتحيز (Biased attention): ده بيحصل لما بتركز من غير ما تحس على جزء معين من المعلومة اللي بيأكد كلامك وتتجاهل الباقي، زي لمابتبقى قاعد متربص للي بتتخانق معاك عايز تمسك أي حاجة من كلامه عشان تبين إنه غلطان وخلاص
2- التفسير المتحيز (Biased interpretation): ده بقى لما بتفسر كلام اللي قدامك حسب معتقداتك وده بيحصل بوعي منك، فمثلًا حاسة إن خطيبك بيخونك وجه قالك إنه هيتشغل الفترة الجاية في شغله فانتي خلاص اتأكدتي إنه بيخونك رسمي وفسرتي الكلام على كيفك
3- الذاكرة المتحيزة (Biased memory): دماغك بتفكرك بأحداث وتنسيك الباقي، فتتخانق مع أخوك فتفتكرله إنه أكل أكلك في مرة، وتنسى إنه ياما حور معاك عشان تتطول في خروجاتك براحتك
نصائح تساعدك بدل ما تقع في التحيز التأكيدي ده:
1- تابع واقرأ كتير خاصة عن الحاجات اللي بره دايرة اهتماماتك عشان الآراء المختلفة بتنور في دماغك جوانب جديدة ماتكونش شايفها وبتساعدك تطور من نفسك
2- ماتقفش على الواحدة لكلام اللي قدامك، كأنك مستنيه يقول حاجة عشان تثبت بيها إنك انت الصح
3- حط نفسك مكان اللي قدامك قبل ما تهاجمه وشوف أفكاره يمكن يكون بيقول كلام موزون
4- اعمل حساب إنك تكون غلط عادي؛ لأن استحالة حد يكون صح طول الوقت
5- وفي الآخر ضروري من وقت للتاني تطور أفكارك وتتأكد إنها مابتعطلكش
