ليه اليانسون حنين من زمان؟

اليانسون من المشروبات اللي بتحتوينا في كل الأوقات وعمرها ما اشتكت يعني تروحله في الشتاء وأنت عندك برد يقولك ماشي.. تروحله وأنت بطنك واجعاك يهديك.. لو متضايق تشرب منه شوية يرخي أعصابك.. تستخدمه في المعطرات والبرفانات يقولك وماله.. حتى لما بتنساه في الصيف وتقضيها سموزي وحاجات ساقعة وترجعله لما يجيلك برد الصيف بيقف جنبك ومابيقولكش إيه اللي جابك.. عشان كده في الموضوع ده هنقولك ليه اليانسون مشروب حنين وجدع من زمان

اليانسون غير المعلومات المعروفة عنه إنه ليه فوايد في الجهاز الهضمي و الجهاز التنفسي وبيهدي الأعصاب..لكنه ليه فوايد واستخدامات كتير جدًا لحد النهاردة بنكتشفها ..ومن زمان وهو جمايله مغرقة البشرية.

اليانسون نبات قديم وكان ليه مكانة كبيرة عند الفراعنة ووفقًا للهيئة العامة للاستعلامات .. علماء الآثار لقوا ثمار اليانسون في مقابر الصحراء الشرقية لمدينة طيبة وكمان كان موجود في المخطوطات الفرعونية ضمن الوصفات العلاجية.. زي بردية “ايبرز” الفرعونية اللي كان مكتوب فيها اليانسون كشراب لعلاج آلآم واضطرابات المعدة وعسر البول..
واتذكر  في بردية “هيرست “إن المصريون القدماء استخدموه  ضد انتفاخات الأمعاء لطرد الغازات.. وكمان كغسول للفم وعلاج لآلام اللثة والأسنان.. مش بس كده ده كمان كان بيتم استخدامه كمعطر.. يعني تستخدمه في أي حاجة مايقولش لا.

وكمان الرومان والإغريق اهتموا بيه وبزراعته بسبب استخدامه في العطور وفي الوصفات الطبية المختلفة.. ووفقا لموقع الشرق الأوسط غير استخداماته للهضم كان الرومان بيدوه للمرأة الحامل للتخفيف من آلام الولادة.. وكانوا بيحطوا مع بذوره لبن وشعير ويدوه للأم بعد الولادة عشان تتحمل الألم وتقدر تتعافى.

وكانت روما القديمة بتعمل الكحك باليانسون في الأفراح القديمة وبيتم توزيعه على الضيوف.. ويقال إن بذور اليانسون كانت بتستخدم كعملة لدفع الضرايب وقتها.

وابن سينا قاله عنه إن علاج بيساعد على إزالة الأرق وتهدئة النفس وقت الغضب لو تم شربه دافئ وممزوج باللبن والعسل.

وكان الألمان في القرن الـ 19 بيستخدموه في الطبخ لإنهم كانوا عارفين قيمته وفوايده الطبية.

وفي دراسات حديثة وفقًا لموقع arsco لقوا إن لليانسون نشاط مضاد للفيروسات والفطريات.. وزيت اليانسون مضاد للفطريات الجلدية وله تأثير مسكن للآلام والالتهابات مشابه للمورفين والأسبرين.

ده غير إن تم اختبار بذور وأوراق اليانسون في الأنشطة الزراعية ضد الحشرات اللي بتسبب أمراض للنباتات.. وكمان تم اختبار مستخلصات زيت اليانسون في تحسين إنتاجية البروتين الحيواني زي الأرانب والبقر ولزيادة اللبن لأنه بيأثر على هرمون الأستروجين عندهم

شوفت بقي إنك محتاج تسمع كلام ماما وكل ما تشتكي من حاجة تشربلك كوباية يانسون إزاي!