ليه بتحس بتُقل بعد الفطار وبتبقى عايز تنام.. وإزاي تتغلب على الموضوع ده؟

أغلبنا اليومين دول بيقعد يظبط خطط قبل الفطار ويسرح بخياله إنه هيعمل ويسوي الهوايل وييجي الفطار ويفطر بعده بيلاقي نفسه تقلان ومش قادر يقوم من مكانه وكمان بيحس إنه عايز ينام ومش قادر لحاجة.. طب إيه السبب وإزاي نحل الموضوع ده؟ تعالوا نشوف

حسب موقع medicalnewstoday وموقع healthline

إيه هي الأسباب اللي بتخليك تحس بكده؟

1- الدم بيروح يهضم:

بعد الأكل خصوصا الأكل كتير.. الدم بيروح للمعدة والأمعاء عشان يبدأ في عملية الهضم وده بيقلل المعدل بتاعه في التدفق للمخ وهنا ده بيخليك تحس بالخمول وإنك نعسان وعايز تنام

2- ارتفاع السكر وانخفاضه فجأة:

لو بتاكل سكريات كتير ونشويات ده بيرفع مستوى السكر في الدم بسرعة وبعدين يهبط فجأة وده هيسببلك كسل وخمول وإحساس بالنوم

3- الأكل بكمية كبيرة:

كتير مننا بيكون جعان أو حاسس إنه جعان فبيبدأ ياكل كمية كبيرة على مرة واحدة وده بيخلي جسمك محتاج مجهود أكبر عشان يهضمه وده هيأدي للإرهاق 

وده تفسيره إن الجسم بينتج سيروتونين بكمية كبيرة بعد الأكل كتير وده مادة كيميائية بتلعب دور مهم في تنظيم النوم والشعور بالنعاس.. وفيه حمض اسمه “التربتوفان” موجود في كتير من الأكلات اللي فيها بروتين ده بيساعد الجسم ينتج سيروتونين أما الكربوهيدرات بتساعد على امتصاص التربتوفان وده بيخليك لما تاكل أكل فيه بروتينات كتير وكربوهيدرات تحس إنك عايز تنام

4- نقص السوائل:

قلة شرب المياه طول النهار ده بيخلي يحصل جفاف وبعدها بتصدع وتحس بإرهاق

5- الكافيين:

أي مشاريب فيها منبهات وكافيين بعد الفطار على طول بتمنع امتصاص الفيتامينات وده لأنها فيها مادة اسمها “التنات” ودي بتلزق في الحديد وبتمنع امتصاصه وده بيعمل أنيميا غالبًا على المدى الطويل وطبعًا بخصوص الفطار بيخليك ما تستفادش استفادة كاملة من الوجبة وبرضه هيتعبك وتحس بإرهاق

طب إيه الحل للحوار ده؟

1- قلل الحاجات دي:

تجنب أو قلل المقليات وكمان السكريات اللي بتزود الأنسولين في الدم وده زي العصائر والحلويات.. وقلل برضه الحاجات اللي فيها كربوهيدرات زي الرز والمكرونة والحاجات اللي فيها دقيق 

2- افطر على حاجة صحية:

أول حاجة ممكن تفطر بتمر وكوباية مياه وتاخد وقتك شوية وبعدين لما تبدأ أكل ابدأ بحاجات خفيفة زي الشوربة أو السلطة وده عشان تهيأ المعدة للمعجنة اللي جاية

3- وازن في الأكل بتاعك:

خلي وجبتك دايمًا فيها توازن بين النشويات والبروتينات والكربوهيدرات وممكن نص وجبتك يكون خضروات أو سلطات والنص التاني بروتين وكربوهيدرات صحية

4- اتقل شوية على الكافيين:

طبعًا كوباية الشاي أو القهوة بعد الفطار من أجمل ما يكون بس عشان صحتنا.. محتاجين نهدى على الأقل ساعة أو ساعتين عشان الجسم يلحق يستفيد من اللي كلته وبعدها اشرب براحتك 

5- اشرب مياه بانتظام:

عشان تعوض اللي جسمك فقده طول اليوم.. حاول تفتكر إنك تشرب مياه بانتظام كل شوية

6- حاول تتمرن أو على الأقل تتمشى:

لو مشيت شوية بتاع 10-15 دقيقة كده بعد الفطار هتنشط الدورة الدموية والدنيا هتبقى فل.. أما لو أنت برنس بقى ممكن تبقى عندك تمرينة كل يوم بعد الفطار ده هيظبط معاك الدنيا وهيساعدك تقدر تنام مرتاح بالليل

7- ظبط نومك:

عارفين إنها مفاجأة كبيرة بس أنت محتاج تظبط نومك فعلًا في العموم.. لكن هنا بالتحديد عشان ماتحسش بعد الفطار إنك محتاج تنام!

في النهاية الكسل والنوم بعد الفطار مش حاجة لازم تحصل.. شوية تظبيطات صغيرة في أكلك ونظام يومك عامة هيساعدك كتير في الموضوع ده وعلى الأقل هتقدر تحط خطط بقلب جامد قبل الفطار وتنفذها!

قولنا نظامك إيه في اليوم وقت الصيام لو عندك نظام عشان تظبط نشاطك وتكون فايق بعد الفطار؟