ليه بنحب نتحب قدام الناس؟
معروف من زمان إن الناس كلها مش بتتفق على حاجة واحدة.. بس أكيد إن مفيش حد مش عايز يتحب يعني؟!
لكن الأكيد أكتر إنه أوقات بنحب نتحب قدام الناس
وده اللى بيتسمى في علم النفس: التأكيد الإجتماعي للحب.
واللى معناه إنه الشخص بيحب يحس إنه محبوب ومتقدر “في العلن” مش بس بينه وبين نفسه أو بينه وبين شريكه.
فا هتلاقي إن الفترة الأخيرة مثلًا شوفنا مشاهير كتير مش بيتكسفوا يعبروا عن حبهم لازواجهم أو زوجاتهم أيًا كان المكان اللى هم فيه
سواء بكلمة شكر أو هدية أو تصرف “رومانسي” لطيف يبين حب الطرف ده للتاني.
الفيلسوف الألماني “أكسيل هونيت – Axel Honneth” اتكلم عن أهمية التأكيد الاجتماعي للحب في نظرية سماها “الاعتراف”
النظرية بتقول إن صحة الإنسان النفسية واستقراره بيعتمدوا
على “الاعتراف” بحاجات معينة بس أهمهم هما:
- الإعتراف العاطفي: وده باختصار الحب نفسه.. إحساسك إنه في شخص بتحبه ويحبك
- الإعتراف بالتقدير الاجتماعي: إنك تتقدر من اللى حواليك يعني
فا لما الزوج يقول كلام حلو أو يعمل تصرف حلو لمراته قدام الناس.. التصرف ده يحول الحب من مجرد شعور عاطفي لوضع اجتماعي.
ده هيخلي تأثير الحب ده “أقوي” بكتير ومش مجرد مشاعر والسلام.. لأ هو واقع معكوس في عين الناس اللى حواليهم نفسهم.
بس بما إننا جبنا سيرة الواقع فا ده مش بالضروري يحصل.. يعني مش لازم أبدًا تتخانقوا سوا عشان ماحطش أول حرف من اسمك في البايو مثلًا.
إننا نظهر حبنا لحبايبنا في العلن حاجة جميلة وبتقوي العلاقات.. لكن مش دايمًا مناسبة للكل.. في ناس بتتكسف.. وناس تانية بتخاف من الحسد.. وناس تالتة مش حابة تظهر حبها وخلاص “هو كده” بلا سبب.
المهم مش إظهار الحب نفسه على قد ما المهم يكون فيه “تقدير ضمني” ومشاعر حقيقية من غير تقليد لحد ومن غير ما نشيل بعض فجأة.. لأن وارد جدًا نقع على وشنا.
