ليه بنحب نتفرج على التلفزيون أو نسمع الراديو رغم التكنولوجيا؟

مع التطور الكبير اللي حصل في التكنولوجيا اللي حوالينا وخلينا نعرف نختار براحتنا الأغاني أو الأفلام والمسلسلات اللي عايزينها في أي وقت وأي مكان لسه فيه ناس كتير بتفضل تتفرج على التلفزيون أو تسمع الراديو بشكل يومي، وممكن تبقى منهم أصلا بس السؤال دايما بيبقى ليه بنفضل الحاجات دي رغم إننا بنقدر نختار المحتوى اللي عايزينه بسهولة؟

فتعالى نقولك بقى ليه بنفضل نتفرج على التلفزيون أو نسمع الراديو رغم كل التكنولوجيا دي حسب ما قالت شوية دراسات وأبحاث اتعملت عن الموضوع ده:

1- الراحة النفسية في الروتين وعدم اتخاذ القرارات:

واحدة من أهم الأسباب اللي بتخلينا نرجع للتلفزيون والراديو هي إننا مش محتاجين نفكر كتير أو نختار. الدراسات النفسية بتقول إن الناس بتتعب من كثرة الاختيارات وده بيسموه “إرهاق القرار” أو (Decision Fatigue). . الدكتور “Barry Schwartz” قال في كتابه “Paradox of Choice” إن كتر الخيارات ممكن تخلي الشخص يحس بالتوتر بدل ما يحس بالحرية

فالراديو والتلفزيون بيقدمولنا محتوى جاهز من غير ما نحتاج نختار، وده بيخلينا نحس براحة نفسية.

2- الإحساس بالمفاجأة والتشويق:

الراديو والتلفزيون عندهم عنصر المفاجأة، لما تشغل التلفزيون أو الراديو، مش دايمًا بتكون عارف إيه اللي جاي، وده بيخلق نوع من التشويق، واللي غالبا كلنا بنحبه بس مابنقولش.. وده حسب دراسة اتعملت سنة 2015 واتنشرت في مجلة “Journal of Consumer Research” ولقوا إن عنصر المفاجأة بيزود المتعة في التجربة بشكل عام، على عكس لما تختار أغنية أو فيلم، اللي بيبقى متوقع ومحدد.

3- التواصل الاجتماعي والشعور بالانتماء:

التلفزيون والراديو بيوفروا محتوى جماعي، يعني ممكن ناس كتير تكون بتتفرج أو بتسمع نفس البرنامج أو الأغنية في نفس الوقت.. وده بيخلق شعور بالانتماء الاجتماعي.. وفيه دراسة اتنشرت في “Journal of Broadcasting & Electronic Media” سنة 2020، قالت إن البرامج التلفزيونية والراديو بتلعب دور في تقوية الروابط الاجتماعية، سواء داخل العيلة أو بين الأصدقاء ولما بنتكلم عن برامج معينة أو أخبار شفناها في التلفزيون، بنحس إننا جزء من مجتمع أكبر.. وغالبا الإحساس ده هتلاقي أغلب المصريين بيحسوا بيه في رمضان وقت عرض المسلسلات والإعلانات.

4- النستولوجيا: 

في دراسة اتنشرت في “Frontiers in Psychology” سنة 2020 لقت إن الحنين بيلعب دور كبير في اختياراتنا الترفيهية.. زي التلفزيون والراديو بيخلونا نفكر في ذكريات جميلة من الماضي، لما كانت الحياة أبسط وكنا بنتفرج أو بنسمع من غير ما نقلق على الاختيار، فمن ضمن الأسباب اللي بتخلي الناس أحيانًا بترجع للتلفزيون والراديو هو الشعور بالحنين لأوقات أبسط.

5- التخلص من التوتر عن طريق الأصوات اللي في الخلفية:

ناس كتير أوي في البيوت المصرية بيشغلوا إذاعة القرآن الكريم وناس تانية بيشغلوا التلفزيون وهما قاعدين أصلا بيلعبوا في الموبايلات وناس تانية بتشغل الراديو وهي قاعدة بتسوق يشغل أغاني بقى أو أخبار أو برامج مش مهم المهم إن فيه صوت في الخلفية للتلفزيون أو الراديو.. والأصوات دي بيساعد ناس كتير على التركيز أو الراحة، خصوصًا لو كانوا بيشتغلوا أو بيعملوا حاجة في البيت. وده حسب دراسة عملها معهد “Media Psychology Research Center” قالت الدراسة دي إن الصوت الخلفي بيخلق جو من الراحة النفسية وبيقلل الشعور بالوحدة.

6- ثقة في الخبرة والتحكم المهني

في ناس بتفضل تسمع الراديو أو تتفرج على التلفزيون لإنهم واثقين في الناس اللي شغالين فيه،  زي المذيعين مثلا بيشوفوا إنهم عندهم خبرة في اختيار المحتوى أحسن أو مصادرهم دايما موثوقة.. وده اللي اتكلمت عنه دراسة اتنشرت في “International Journal of Communication” سنة 2019 وأكدت إن بعض الأشخاص بيحبوا يستمتعوا بمحتوى مختار من ناس متخصصة بدل ما يعتمدوا على نفسهم في اختيار الأخبار.

وفي النهاية بالرغم من إن التكنولوجيا دلوقتي بتسمح لنا نختار المحتوى اللي نحبه ونفضله سواء أفلام أو أغاني أو حتى أخبار لكن لسه  فيه ناس كتير بتفضل التلفزيون والراديو لأسباب نفسية واجتماعية