ليه بنحتاج Closure؟وتتشافى إزاي لو ماخدتهوش؟
“مالحقتش حتى أودعه”.. لو اتفرجت على كرتون “الجميلة والوحش” أكيد هتكون عديت عليك الجملة دي وهي بتعيط لما اتخطفت قبل ما يحصل وداع بينها وبين باباها.. النهايات من غير وداع صريح بيحطك قدام تساؤلات كتير إجابتها موجودة بس عند الشخص اللي سابك.. والنهايات هنا مش لازم تكون نهاية علاقات عاطفية بس.. ممكن كمان وفاة حد عزيز عليك أو خسارة وظيفة.. وبنكون محتاجين Closure
إيه هو الـ Closure؟
الجمعية الأمريكية لعلم النفس بتعرف الـ closure على إنه الشعور بإكمال شئ ما أو حله.. وبيقولوا إنه قريب من شعور المريض النفسي لما بيفهم مشكلته فبيعرف يلاقيلها حل.. احتياجنا للـ closure ممكن يكون بسبب رغبتنا في السيطرة على اللي بيحصل في حياتك وده لأنه بيدفعك تاخد قرار التخطي.. وعلم النفس بيشرح إن دماغنا دايمًا بتميل إنها تكمل أي شئ ناقص.. فمثلًا لما بتبص لصورة انت عارفها بس فيه جزء منها ناقص دماغك تلقائيًا بتملى الفراغ ده علشان تدرك الصورة كلها
ليه الـ Closure مهم؟
حصولك على أسباب منطقية لنهاية أي حاجة بيخليك قادر تقفل الصفحة للأبد وماتعيش على أمل الرجوع.. وبتبدأ تتقبل النهاية أو الخسارة وتـ move on وده لأنك بتتخلص من المشاعر السلبية وبتبدأ تركز على التعافي.. وفيه دراسات أثبتت إن الناس اللي بياخدوا closure بيمروا باضطرابات داخلية أقل أثناء الانفصال وبعده
بس السؤال يجي هنا هو انت فعلًا محتاج closure ؟ وتعمل إيه لو ماخدتهوش؟
الدكاترة بيقولوا إن عندك ربط غلط بين الحصول على الـ closure والراحة.. بس انت ممكن تحس بالسلام والراحة حتى لو ماخدتش closure.. وده علشان انت مش محتاج منهم الـ closure عشان تتخطى.. لأن حتى لو عرفت هما سابوك ليه ده مش هيغير ولا هيقلل ألم خسارتك ليهم.. فهقولك على شوية حاجات ممكن تسهل على قلبك الموضوع.. اسمح لنفسك تنهار وعيط براحتك وتقبل اللي حصل واعرف إن الأشخاص المُقدرين ليك وبيحبوك من قلبهم مش هيهون عليهم تفضل مع دماغك لوحدك ففي الحالة دي مش انت اللي خسرتهم هما اللي خسروك.. وافتكر إن عدم الرد بيعتبر رد.. واعمل انت الـ closure لنفسك واسألها هل كان فيه حاجة معملتهاش كانت ممكن تخلي العلاقة تكمل؟ لو لقيت الإجابة لأ اعرف إنها مش مشكلتك
وزي ما اتكلمنا عن اللي محتاج closure.. خليني أكلمك لو انت عاوز تنهي علاقة تنهيها إزاي؟
حدد ميعاد مع الطرف التاني يناسبه ويناسبك وتكونوا انتوا الاتنين قادرين نفسيًا تتكلموا.. ولو حاسس بالإحراج أو عدم الارتياح من المقابلة فيس تو فيس تقدروا تتكلموا في الموبايل.. وعبر عن حدودك بشكل مباشر إذا كنت هتقدر تكون معاه في نفس المناسبات والتجمعات ولا لأ أو حتى هتكون مرتاح أو لأ مع فكرة وجوده عندك على السوشيال ميديا
وفي الآخر أحب أقولك إن النهايات سنة الحياة.. ومع كل قصة بتنتهي بتتولد قصص تانية كتير هتلاقي فيها السعادة والراحة اللي بتدور عليها
