ليه بنحس إننا صغيرين مهما كبرنا
لما بنسمع إن الناس اللي حوالينا بيتجوزوا أو بيعملوا حاجات بتدل إنهم دخلوا حياة الكبار بنستغرب جدًا وبنقول ياااه دول لسه صغيرين مع إن لو بصينا لسنهم هنلاقيهم في أواخر العشرينيات أو أصلا دخلوا في التلاتينات وعمرهم قدنا بس إحنا دايمًا من برة بنشوف إننا لسه صغيرين وإحنا لسه ماكبرناش زيهم عشان كده بنتفاجئ أوي.. والفنان عمرو دياب قال وأقر الموضوع ده من زمان لما قال ” أنا مهما كبرت صغير”.. بس ليه أصلًا بنحس بكدة؟.. في الموضوع ده هنقولك وفقًا لموقع psychologytoday وموقع BBC
وفقًا لموقع hearing healthcare.. بعد سن الـ 25 تقريبًا بيبدأ معظم الناس يحسوا إنهم أصغر من عمرهم الحقيقي والفجوة بتبدأ تزيد واحدة واحدة بين عمرهم الحقيقي وعمرهم اللي متخيلينه عن نفسهم (عمرهم الذاتي).. وفي دراسة عملتها جامعة ميتشيجان على 50 ألف شخص من أعمار مختلفة.. لقوا إن معظم الناس بيحسوا إنهم أصغر بحوالي 20% من أعمارهم الحقيقية.. يعني مثلًا في سن الخمسين بيحس الشخص بإنه في الأربعين من جوه.. والدراسة كمان لقت إن الشباب بيشوفوا إن الخمسين سن كبير لكن الناس اللي في الخمسين بيشوفوه سن عادي.. والاختلاف في رؤية عمرنا الحقيقي ده ممكن يكون بسبب الاختلاف في إدراك الوقت لأن دماغنا بتتقدم في العمر أسرع من جسمنا.
وفي ورقة بحثية في مجلة Psychological Science لقوا إن من العوامل اللي بتأثر على روية الإنسان نفسه أصغر كانت:
-الحصول على تعليم أعلى
-وكمان الناس اللي صحتها كويسة بيحسوا إنهم أصغر على عكس الناس اللي كانوا عندهم شعور بالوحدة كانت الفجوة بين عمرهم الحقيقي واللي فاكرينه عن نفسهم أقل بكتير.
طيب إيه هي مميزات إننا نحس إننا أصغر؟
-بنحس بالرفاهية أكتر في شغلنا وصحتنا ورؤيتنا لنفسنا وكمان الشعور بالشباب مرتبط بالحفاظ على الصحة وممارسة الرياضة والأكل الصحي اللي مرتبط بالعيش فترات أطول
-إنك تكون بتسعى أنك تجرب حاجات جديدة وتكون بتشارك في أنشطة شبابية دايمًا زي السفر والمغامرات وماتخليهاش ترتبط بالعمر.
-بيساعدك تكون أهدا وأقل عصبية وكمان بتتعامل بنضج.
-شعورك بالشباب بيقلل من خطر الإصابة بالإكتئاب وبيحسن الحالة النفسية.
-وبعض العلماء شايفين إن العمر الذاتي نوع من الدفاع عن النفس عشان نحمي نفسنا من الصورة النمطية عن العمر.
بس ماتنساش مش معنى إنك شايف نفسك أصغر إنك تفضل عايش في الـ dululu وتستخدم الموضوع بطريقة سلبية إنك ماتتحملش مسؤوليات أو تهرب من مشاكلك بحجة إنك حاسس إنك لسه صغير هااا!
