ليه بنحس إن ملامح الناس وصوتهم بيتغيروا لما نبطل نحبهم؟
عمرك لاحظت إنك لما كنت بتحب حد أو بتقدره كنت بتشوفه بملامح حلوة وانه شخص جميل وصوته حلو كمان وتتبسط لما تسمع صوته ولما مشاعرك من ناحيته بتتغير بتلاقي إنك مش طايق تبص في وش الشخص ده حرفيا عشان بتشوفه بقى وحش أو بتفكر إزاي كنت بتشوفه حلو أصلا وبتفتكر وقتها مثل “مرايا الحب عامية”.
طاب ليه الشخص اللي كنا شايفينه أجمل حد في الدنيا فجأة بقى عادي أو حتى ملامحه بقت غريبة؟ وليه صوته اللي كنا بنسمعه كأنه موسيقى بقى عادي أو حتى مزعج؟ الحقيقة إن ده مش مجرد إحساس، دي حاجة ليها تفسير علمي ونفسي.. فتعالي نقولك ليه ده بيحصل حسب ما قال موقع “Psychology Today” وموقع “BBC” ودراسة لجامعة هارفارد:
1- تأثير الحب على إدراكنا:
الحب مش مجرد مشاعر هو حالة عقلية وكيميائية معقدة لما بنحب حد، مخنا بيفرز مواد كيميائية زي:
– الدوبامين (Dopamine): وهو المسؤول عن الشعور بالسعادة والمكافأة، وده بيخلينا نحس إن الشخص ده مميز جدًا ومصدر للبهجة.
– الأوكسيتوسين (Oxytocin): واللي بيتسمى بـ”هرمون الحب”، وبيزود شعورنا بالارتباط العاطفي والأمان مع الشخص ده.
– السيروتونين (Serotonin): بيساعد في تنظيم المزاج وبيخلينا مركزين على الشخص اللي بنحبه بشكل كبير.
كل المواد دي بتشتغل مع بعض عشان تخلينا شايفين اللي بنحبه بصورة مثالية، وبنركز على الحاجات الحلوة ونتجاهل العيوب، وده اللي بيخلينا نشوفه أجمل وأحلى ودي الأسباب العلمية لجملة مراية الحب العامية فعلا.
2- بعد ما الحب بيخلص الكيمياء بتتغير:
لما العلاقة بتنتهي، سواء بقرار مشترك أو بانفصال مؤلم كل التفاعلات الكيميائية اللي كانت بتخلينا نشوف الحبيب بصورة مثالية بتبدأ تهدى خالص، والمخ بيرجع لحالته الطبيعية.. وده بيخلينا نشوفه بطريقة “واقعية” أكتر، فنبدأ ناخد بالنا من العيوب اللي كنا بنتجاهلها.
طيب كل ده برضه ماجاوبناش على سؤال ليه الملامح والصوت بيتغيروا في نظرنا وودانا؟
1- بيبقى فيه نظرة جديدة بدون تأثير الحب: لما بنحب حد، عيوننا بتشوفه من خلال “فلتر الحب” والكيميا بتاعت المخ اللي اتكلمنا عليها في الأول دي بتتغير لما بنبطل نحبه والفلتر ده بيختفي ونبدأ نشوفه زي أي حد تاني.
2- التأثير النفسي:بعد الانفصال، مشاعر زي الحزن أو الغضب ممكن تأثر على نظرتنا له. لو كانت العلاقة سيئة في نهايتها، ده ممكن يخلي حتى صوته يبدو مزعج أو ملامحه تبدو مختلفة.
3- العقل بيحاول يحمينا: لما العلاقة بتنتهي دماغنا بتحاول تساعدنا نتحرر منها، فبيخلي الـ EX ده يبان في عنينا أقل جاذبية عشان نقدر نكمل حياتنا من غير ما نفضل متعلقين بيه.
طيب كل دي أسباب منطقية وجميلة وتدينا مبرر بس ساعات بنفضل نسأل نفسنا هو فعلا الشخص ده اتغير ولا إحنا اللي بنشوفه بشكل مختلف بس عشان الأسباب اللي قولناها فوق؟
في بعض الحالات، الشخص نفسه بيكون اتغير فعلًا بعد الانفصال، ممكن يكون غيّر تسريحة شعره، أو حاول يطور من شكله عشان يغيظ الطرف التاني فبيبقى أسوأ وممكن يبقى بيمر بفترة اكتئاب فبدأ يبقى مبهدل ومش مهندم زي ما كنت متعود عليه، أو طريقته في الكلام تتغير أو حتى نبرة صوته بسبب الضغط النفسي اللي مر بيه. لكن في معظم الحالات، التغيير بيكون في نظرتنا إحنا له، مش في شكله الحقيقي.
وأكبر مثال على ده إن مثلا لو شوفنا صورة قديمة للـ EX ممكن نحس إنه كان شكله مختلف عن اللي كنا فاكرينه، لأن مخّنا خلاص غيّر الفلتر اللي كنا بنشوفه بيه.
وأخر سؤال بنسأله لنفسنا هل ده معناه إن الحب كان وهم أو إحنا فعلا ماكناش بنحب كنا موهومين؟
لأ مش وهم، وماكنش وهم لكن بيبقى حالة نفسية و كيميائية بتأثر على إدراكنا للحب مش بس انجذاب للمظهر، لكن كان إحساس كامل على بعضه زي باكيدج كده كانت بتخلينا نشوف الشخص بطريقة مختلفة وبمجرد ما المشاعر دي بتختفي أو العلاقة بتنتهي، المخ بيبدأ يستوعب الأمور بشكل مختلف، وده طبيعي جدًا.
وفي الأخر خلينا نقولك إن ده لو حصل معاك أنت ممكن تستغل نظرتك للشخص ده لصالحك طاب إزاي تستغله:
1-بعد الانفصال مهم نفتكر إن نظرتنا للشخص بتتغير وإن ده مش معناه إنه كان مثالي ولا إنه بقى سيئ فجأة.
2- لو حاسين بالألم بعد الفراق ده جزء من عملية التكيف والمخ بيشتغل عشان يساعدنا نتحرر من المشاعر القديمة.
3- الوقت بيساعدنا في تحسين نظرتنا للأمور وكل ما الوقت عدى أكتر كل ما هنشوف الأمور والوضع بطريقة أوضح وأقرب للحقيقة.
