ليه بنحس بالزهق والتوتر في الإجازات.. وإزاي تتخطى الشعور ده

لما بيبقى عندنا إجازة طويلة بنبقى متحمسين ليها ومستنينها بفارغ الصبر وعمالين نعدي الأيام عشان نوصلها.. بس بيحصل حاجة غير متوقعة على الإطلاق وهي إننا بعد وقت قصير جدا من الإجازة بنبدأ نحس إننا زهقانين ومش لاقيين حاجة نعملها.. وخاصة الناس اللي بتقضي وقت كبير في شغلها أو في دراستها.. بتحس إنها ماعندهاش حاجة تعملها وكمان بيحسوا إنهم life less.. عشان كده هنقولك السبب وفقا لموقع calm  

في مصطلح اسمه “holiday anxitey” وهو نوع من التوتر بيحصل خلال موسم الإجازات وبيختلف عن التوتر العادي.. لأنه بيكون مرتبط بالضغوطات والتوقعات العالية اللي بنكون حاطينها على الإجازات وبيظهر من خلال شوية حاجات زي:

1-إننا نحس بمشاعر كتير مختلطة سببها بيكون وقت الفراغ لأنه بيدينا مساحة نفكر
في حاجات كتير في حياتنا ومستقبلنا وده طبعا بيتقلب لجلد ذات وليلة كبيرة تخلينا متنكدين وزهقانين أكتر من الإجازة وعايزينها تخلص بسرعة عشان نتشغل في أي حاجة تانية.

2-ممكن كمان يخلينا حاسين إننا تعبانين ومرهقين أوي وعايزين نرتاح ومانعملش حاجة.

3-بنحس بضغط إجتماعي فجأة سواء بأننا بنبتدي نشوف ناس ماكناش بنشوفها فجأة بسبب مشاغلنا.. وده بيحس بيه أكتر الناس اللي عندها رهاب إجتماعي ومابتعرفش تتعامل مع ناس فترة طويلة.

4-ممكن نحس بـ Routine disruption: لأن الشغل والحاجات الروتينية اللي بنعملها كل يوم بتقف فجأة.. وده بيسبب توتر وقلق وشعور بعدم الاستقرار للأشخاص اللي بيحبوا الروتين وبيشوفوه حاجة بتخليهم مستقرين نفسيا.

5-بيسبب تقلبات مزاجية وشعور بالحزن والاكتئاب.. ممكن يخلي الأشخاص عندهم شراهة في الأكل عشان كده بناكل كتير في الإجازة واحنا مش فاهمين ليه.

6-وكمان بيسببلنا اضطرابات في النوم ممكن تخلينا نسهر ومانعرفش
نظبط نومنا ونندم بعدين لما نرجع الشغل تاني.

ووفقا لموقع elpais دي شوية حاجات تساعدك تقلل من توتر الإجازات..

-ابدأ إجازتك بشكل تدريجي.. بدل ما تتنقل بسرعة من أسبوع شغل كامل لأجازة كاملة فده يخليك مش عارف تفصل بينهم.. حاول تريح تدريجيًا قبل الإجازة.. وواحدة واحدة تبعد عن مكالمات الشغل وتفضي دماغك شوية.

-خليك منظم: اعمل روتين ليومك حتى لو بسيط زي إنك تعرف هتصحى امتى مثلا كل يوم.. وحدد فيه حتى لو نشاط واحد هتعمله يبسطك زي إنك مثلا تتفرج على فيلم أو حتى تشوف حد من صحابك.

-حاول يكون عندك وقت لنفسك تقعد فيه في هدوء تتأمل في الحاجات الحلوة أو تتمشى شوية وتشيل أي حاجة بتضايقك من دماغك.

-عادي إنك تحس بالملل: الدكتور النفسي “ماريان روخاس” مؤلف كتاب “كيف تجعل الأشياء الجيدة تحدث لك” بيقول إننا بنلجأ لـ موبايلاتنا لما بنحس بالزهق أو بالوحدة.. والملل مش شيء وحش لأنه ممكن يطلع منه إبداع وأفكار كريتيف.. فسيب نفسك تزهق يمكن تطلع منه بحاجة إيجابية.

وحاول تتجنب السوشيال ميديا بشكل عام لأن الباحثين في جامعة “ستانفورد “وجامعة “نيويورك” عملوا دراسة عن مدى تأثير وسائل التواصل الإجتماعي على رفاهيتنا وقسموا المجموعة لاتنين.. الأولى اتمنعوا من استخدام فيس بوك لمدة 30 يوم.. و التانية تستخدمه لما تحب وكانت النتيجة إن المجموعة الأولى قل عندها الشعور بالقلق والتوتر وبقوا يقضوا وقت أكبر مع عيلتهم.