ليه بنشارك حاجات عجبتنا مع ناس حتى لو مش مهتمين.. والوقت المناسب لمشاركة الحاجات دي؟
أوقات بتبقى بتعمل حاجة معينة سواء بتسمع أغنية أو بتتفرج على فيلم أو حتى داخل تحدي في شغل ولا دراسة وبتكون النتيجة إنك بتعجب أوي بالحاجة دي أو باللي سمعته وشوفته وعايز تشاركه مع حد حواليك حتى لو متأكد إنه مابيحبش الحاجة دي وبعيدة عن ذوقه.. فإيه التفسير وامتى تعرف إن الحاجة دي والوقت مناسبين إنك تشاركها ؟
حسب موقع Psychologytoday وموقع Psychologicalscience
ليه بنشارك حاجات عجبتنا مع ناس حتى لو مش مهتمين؟
1- التوثيق العاطفي:
لما بتعمل حاجة بتحبها وتشاركها مع الناس بيكون كأنك بتقول “الحاجة دي جزء مني” أو بتنتمي ليها.. وده زي الأغنية اللي بتسمعها وتعجبك أو تحرك مشاعرك بشكل كبير سواء فرحة أو حزن.. الفيلم اللي اتفرجت عليه وحسيت إيه الجمدان ده! أو المكان اللي خرجت فيه واتبسطت أو حسيت فيه بالأمان.. كل ده لما تعبر عنه وتقوله بتوثق الإحساس نفسه وتخليه ملموس أكتر
2- طريقة من طرق التواصل:
إحنا بطبعنا كبشر كائنات اجتماعية وبتحب التواصل أو المشاركة وبنحاول نوصل ليها بأي شكل.. فحتى لو شايف قدامك شخص مش مهتم بالحاجة دي أو أنت عارف إنه مش بيحبها هتجرب تشاركها معاه عشان تقرّب المسافة بينك وبينه
3- الفخر أو الانبهار:
زمان لما كنا أطفال ونرسم صورة حلوة أوي ونتبسط بيها كنا بنجري على أهلنا نشاركهم الحاجة من باب الفشخرة والجمدان وفرحتنا كانت بتكمل لما نسمع تعليق حلو على الرسمة.. نفس الكلام لما كبرنا ونفس الشكل
أما لو حاجة شوفتها أو سمعتها وأنت من أول الناس اللي عملوا ده.. بتكون حابب تشاركها للناس كلها وتعرفهم برضه بعدها إن أنت من أول الناس اللي وصلت للحاجة دي
4- تساؤلات واستكشافات وفضول:
الإنسان فيه حتة كده بتحب تعرف رد فعل الناس: هل هم هيحبوا الحاجة زي ما أنا حبيتها؟
هل هيفهموني لو تجربة؟ هل هيفهموا ذوقي لو حاجة بشاركها؟ هل حد فيهم هيضيف ليا حاجة جديدة كمعلومة أو نصيحة؟
5- جواك Influencer صغير:
بشكل لا واعي شوية فيه أوقات بتبقى عايز تكون فيها مؤثر على الناس فبتشارك معاهم الحاجات.. وأوقات تانية بتبقى عايز تشوف لو الشخص ده حب الحاجة يبقى ده انتصار شوية لوجهة نظرك أو رأيك أو ذوقك أو حتى رؤيتك للعالم عاملة إزاي
امتى يكون ده الوقت المناسب للمشاركة؟
- أول حاجة لما تحس الشخص اللي قدامك منفتح على حاجة زي كده وفاضي.. فلو لقيت حد متضايق بلاش تشاركه ممكن تستنى يبقى تمام أفضل
- تاني حاجة يكون فيه سياق مناسب كده.. مثلا تكونوا بتتكلموا عن الذوق الموسيقى فهنا ممكن تقترح عليه أغنية وتشاركها معاه
- تالت حاجة لو فيه تجربة مشتركة.. حاجة بتفكرك بالموقف اللي أنت فيه مع حد وده مثلا لما تكون شوفت فيلم بيفكرك بمكان أو سمعت أغنية بتفكرك بشعور وأنت والشخص ده بتمروا بشعور مشترك في تجربة مشتركة
- رابع حاجة والأخيرة لما يكون اللي قدامك نفسه بيدور على الحاجة أو على ترشيحات.. ودي بتكون فرصة جميلة تشاركه بقى الخبرات والحاجات اللي بتحبها عادي
في النهاية مشاركة الحاجات اللي بتحبها بتخلي العلاقة أقوى وفيها ترابط وكمان بتديك مساحة للتواصل وإنك تبين ذوقك وطريقة تفكيرك في كل حاجة.. لكن لو المشاركة دي اتعملت في الوقت المناسب.. المردود بتاعها هيكون أحلى بكتير ومفيد أكتر ليك وللي قدامك
