ليه بنشوف نفسنا يوم حلوين ويوم وحشين؟
كام مرة نبقى خارجين ونبص في المراية “بصة” أخيرة قبل ما ننزل ونحس إن: طب والله شكلي حلو النهاردة.
تاني يوم الصبح قدام نفس المراية بنقول: هو أنا ليه شكلي عامل كده؟!
مع إن ممكن نكون لابسين نفس اللبس أو الألوان.. وهو هو وشنا عادي
طب إيه الجديد؟ الموضوع ده له أسباب كتيرة…
1- المود:
عامل أساسي ومهم لأن لو صحينا في يوم متضايقين أو مخنوقين مخنا
هيدور علي أي عيب في الوش حتى لو “مش متشاف” ويسقط عليه الخنقة دي.. كإن الحباية الصغيرة اللي مش باينه هي السبب في اللي احنا فيه.
والعكس صحيح.. لو مودنا كويس.. يوم أجازة مثلًا هنبقى شايفين إن وشنا رايق حتى لو نفس الحباية لسة موجودة.. ودي ظاهرة بتتسمى بالـ “Body Dysmorphia”
2- الهرمونات:
السبب الرئيسي والأكثر تأثيرًا على وشنا هو الـ”Hormonal Cycle”.. تغير الهرمونات ومستوياتها في الدم ليها تأثير مباشر على شكلنا وتوزيع السوائل في الجسم.. يعني مثلًا:
لما الهرمونات بتكون “متوازنة” البشرة بتبقى مشدودة ومرتاحة وشكلنا أحلى.. وفي أوقات تانية الجسم ممكن يحتفظ بسوائل زيادة بسبب لخبطة في الهرمونات فهنحس إن وشنا منفوخ وبهتان أكتر من العادي.
التغيرات دي بتحصل لأسباب كتير زي الضغط نفسي أو قلة النوم والإجهاد.
3- الإضاءة وزاوية المراية
الإضاءة القوية من فوق أو الجنب بتبرز الظل.. فتظهر الهالات والخطوط التعبيرية أو أي تفاصيل صغيرة في الوش بشكل أوضح من الحقيقي.. على عكس الإضاءة الهادية أو الطبيعية اللى بتخلى الملامح أنعم بكتير.
زاوية المراية كمان بتفرق… الوقفة القريبة بزيادة أو المراية اللي بتيجي من تحت لفوق ممكن تغير تناسق الملامح وتخلي الشكل يبان مش مظبوط.
4- اللبس
لون اللبس وحاجات زي الـ Hairstyle أو لفة الطرحة مثلا بيفرق جدًا في الشكل.
-
طب في وقت زي ده المفروض نعمل إيه؟
- ولا أي حاجة… ده شئ طبيعي جدًا وبيحصل مع كل الناس
- كل اللي علينا إننا نفهم الموضوع ولو حسيت إن شكلك النهاردة مش حلو
- قول لنفسك: عادي ده يوم وهيعدي ومشي دنيتك
وافتكر إن “محدش بيركز” وده ممكن يبقي في دماغنا إحنا بس… وكده كده كلنا حلوين ومش شوية هرمونات اللي هتنكد علينا ولا إيه؟
