ليه بنفتكر أماكن معينة وبتظهر صورتها في دماغنا من غير مناسبة!
في فترة الخريف والوقت اللي الشمس بتقل فيه بنلاقي نفسنا بنرجع نحن لذكريات كتير ونفتكر مواقف وأشخاص وأماكن موجودين في مكان مستخبي كده جوانا وجوا دماغنا وإحنا مش عارفين ليه!
وفي نفس الفترة دي ساعات بنبقى قاعدين كده بنشتغل أو بنذاكر أو بنعمل أي حاجة مهمة وتلاقي نفسك افتكرت مكان عشوائي جدا بقالك فترة ماروحتوش سواء بقى المكان ده كان ليك فيه ذكريات كويسة أو وحشة بس مرة واحدة بتبقى قاعد تلاقي دماغك وديتك للمكان ده.. طب ليه أو ازاي مابتبقاش عارف
لما دورنا ورا الموضوع ده لقينا أسباب فعلا ورا الفلاش باك اللي بيحصل ده.. وحسب ما قالت دراسات عن شبكة العقل الافتراضية أو الـ (DMN) في موقع frontiersin وموقع psychologytoday:
1- الذكريات والارتباطات اللي مش بنلاحظها:
عقلنا بيشتغل طول الوقت في الخلفية حتى لو مش واخدين بالنا.. ساعات حاجات بسيطة حوالينا ممكن تخلّي عقلنا يفتكر حاجة أو مكان زي مثلاً، لو ريحة معينة أو صوت معين سمعته جنبك ممكن عقلك يربطهم بمكان زرتُه قبل كده وده بيحصل من غير ما تكون أنت واعي بيه، لأن العقل بيحب يربط كل حاجة ببعضها
2- العقل بيحب يحلم:
وقت ما نبقى مش مركزين جامد أو في حالة استرخاء، زي لما نكون قاعدين لوحدنا أو حتى قبل النوم، عقلنا ممكن يدخل في حالة شبه الحلم في الحالة دي بيبدأ يجيب أفكار وصور عشوائية من الذكريات والمشاعر اللي متخزنة جواه.. وبالتالي بيفكرك بأماكن أو مواقف قديمة ممكن تطلع كده من غير أي مقدمات
3- المواقف اللي لسه مخدتش وقتها في المعالجة:
لو فيه حاجة شاغلاك أو مكان معين له ذكرى معاك لسه مخدتش حقها في التفكير، عقلنا بيستمر يجيبها لحد ما نقدر نحلها أو نرتاح منها. ممكن تكون فيه ذكريات مرتبطة بمكان معين ومش عارف إنت ليه بتفتكرها، بس ده لأن عقلك لسه بيحاول يفهمها أو يعالجها.
4- المشاعر والمكان:
الأماكن مرتبطة بشكل كبير بمشاعرنا يعني لو كنت في مكان معين وحسيت بشعور قوي فيه، زي الفرح أو الحزن، عقلنا ممكن يرجع يفتكر المكان ده لما نحس بنفس المشاعر مرة تانية.. زي مثلًا لما نكون بنسمع أغنية معينة أو ريحة معينة ترجعنا لمكان كنا فيه وحاسين بشيء مشابه، نفس الفكرة لو كنت متضايق أوي في مكان معين قبل كده ولأسباب مختلفة بعد سنين اتضايقت تاني احتمال كبير ترجع تفتكر المكان ده تاني ودماغك تفكرك بيه وبصورته.
5- العقل في الوضع الافتراضي:
الوضع الافتراضي أو Default Mode Network (DMN) هو مصطلح بيوصف مجموعة من المناطق في المخ اللي بتشتغل سوا لما المخ مش بيكون مركز على حاجة محددة.. الشبكة دي مسؤولة عن “التفكير الداخلي” أو stimulus-independent thought، يعني الأفكار اللي بتيجي بدون ما تكون ناتجة عن حاجة حصلت في اللحظة دي ممكن تبقى مرتبطة بالذكريات أو التخطيط للمستقبل أو حتى التفكير في مواقف اجتماعية.
والوضع ده بيشتغل لما نكون في حالة راحة أو مشغولين بحاجة مش عايزة تركيز شديد والمناطق دي في المخ بتنشط وده اللي بيخلينا نلاقي نفسنا بنفكر فجأة في حاجات قديمة أو أماكن كنا فيها، أو حتى مواقف عشوائية من حياتنا. ده لأن المخ في الحالة دي بيربط بين الذكريات أو المعلومات اللي مخزونة، وبيحاول يرتبها أو يفهمها أكتر.
وفي الأخر أكيد عقلنا بيشتغل بطرق غريبة وصعب نفهمها بشكل واضح طول الوقت.. فلو بتلاقي نفسك دايمًا بتفكر في أماكن معينة أو مواقف معينة بدون سبب واضح خليك عارف إن ده مش حاجة وحشة بالعكس ده معناه إن عقلك شغال في الخلفية وبيحاول يرتب كل حاجة.. بس لو عايز تهدى الأفكار دي، ممكن تحاول تشغل نفسك بحاجة جديدة، أو تفكر في الأسباب اللي ممكن تخلي المكان ده يظهر في دماغك عشان تفهم مخك أكتر.
