ليه عودة صلاح لإيطاليا مش سهل؟ 

في الفترة الأخيرة.. اسم محمد صلاح بقى مرتبط كتير بأخبار الرحيل عن ليفربول.. خصوصًا مع اقتراب نهاية عقده وكلام الإعلام الأوروبي عن احتمال تغيير وجهته في الفترة الجاية.

بعض التقارير رجحت فكرة رجوعه لـ الدوري الإيطالي.. البطولة اللي كانت في الأساس بوابة انطلاقه الحقيقية في أوروبا قبل انتقاله لإنجلترا.

صلاح لعب هناك مع فيورنتينا وبعدها مع روما.. وفي الناديين بدأ اسمه يلمع بشكل واضح.. وقدم مستويات قوية خلت ليفربول يضمه سنة 2017.. لكن رغم إن إيطاليا كانت بداية تألقه.. فكرة عودته للكالتشيو دلوقتي تبدو معقدة شوية.

تراجع المنافسة الأوروبية

أول سبب مهم هو تراجع القوة الأوروبية لأندية الدوري الإيطالي مقارنة بدوريات تانية.. وصحيح إن الكالتشيو لسه دوري قوي تكتيكيًا.. لكن من ناحية المنافسة القارية أندية كتير ما بقتش بنفس القوة اللي كانت عليها زمان.

فرق زي ميلان ونابولي وروما مش دايمًا بتنافس بقوة على لقب دوري أبطال أوروبا.. وغالبًا خروجها بيكون بدري مقارنة بفرق إنجلترا أو إسبانيا.

حتى فكرة انتقاله لـ إنتر ميلان ممكن تكون معقدة.. لأنه لعب قبل كده مع روما وكان منافس مباشر لإنتر.. وده ممكن يخلق حساسية بين الجماهير.. ونفس الكلام تقريبًا مع يوفنتوس.. اللي كان منافس تقليدي لروما وكمان خصم تاريخي لفيورنتينا.

أزمة الرواتب 

السبب التاني.. وربما الأهم.. هو موضوع الرواتب.. صلاح حاليًا واحد من أعلى اللاعبين أجرًا في الدوري الإنجليزي الممتاز.. ومرتبه مع ليفربول بيقرب من 400 ألف جنيه إسترليني أسبوعيًا.

المشكلة إن أندية الكالتشيو عمومًا مش بتدفع رواتب بالحجم ده.. يعني على سبيل المثال.. من أعلى اللاعبين أجرًا في الدوري الإيطالي دوشان فلاهوفيتش مع يوفنتوس.. وبعده نجوم زي لاوتارو مارتينيز وباولو ديبالا.

لكن حتى الرواتب الكبيرة هناك بتبقى أقل بكتير من عقود نجوم الدوري الإنجليزي.

كمان معظم أندية إيطاليا عندها سقف رواتب واضح.. عشان تحافظ على التوازن المالي.. وضم لاعب بعقد ضخم زي صلاح ممكن يخل بتوازن الرواتب داخل الفريق.

الضرائب العالية 

عامل تاني مهم هو الضرائب.. وإيطاليا معروفة إن نظام الضرائب فيها معقد نسبيًا بالنسبة للاعبين الأجانب.. وده بيأثر على صافي الراتب اللي اللاعب بياخده.

يعني النادي ممكن يدفع رقم كبير.. لكن بعد خصم الضرائب المبلغ اللي يوصل للاعب بيكون أقل.. وده سبب خلّى كتير من النجوم يفضلوا اللعب في دوريات تانية رواتبها أعلى أو ضرائبها أقل.

طبيعة الكالتشيو الصعبة

السبب الرابع هو طبيعة الدوري الإيطالي نفسه.. والكالتشيو معروف إنه من أصعب الدوريات تكتيكيًا.. الدفاعات فيه قوية جدًا.. والاحتكاك البدني عالي.

المباريات غالبًا بتكون مغلقة وصعبة على المهاجمين.. وبالنسبة للاعب زي صلاح.. اللي دخل دلوقتي في الثلاثينيات.. اللعب في دوري مفتوح وسريع زي الدوري الإنجليزي ممكن يكون مناسب أكتر لأسلوبه.

خطوة لازم تكون محسوبة

كمان لازم ناخد في الاعتبار إن محمد صلاح حقق تقريبًا كل حاجة ممكن تتحقق مع ليفربول.. وفاز بـ الدوري الإنجليزي الممتاز.. ودوري أبطال أوروبا.. وكمان كأس العالم للأندية.

وبقى واحد من أساطير النادي في العصر الحديث.. وعشان كده أي خطوة جاية في مسيرته غالبًا هتكون محسوبة جدًا.. سواء كانت الاستمرار في إنجلترا.. أو تجربة مختلفة في دوري تاني.